Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
પણ લાંબો વખત સહયોગ આપે તો તો ઉત્તમભાઈ એને આગ્રહપૂર્વક વળતર લેવાનું કહેતા હતા. અમેરિકામાં ટ્રીટમેન્ટ માટે આવ્યા ત્યારે એમને ખ્યાલ હતો કે અહીંની મેડિકલ ટ્રીટમેન્ટ ખૂબ મોંઘી હોય છે અને ઘણો ખર્ચ થશે, પરંતુ લૉસ ઍન્જલસના લાગણીવાળા ડૉક્ટરોએ કશીયે ફી લેવાની ના પાડી.
ઉત્તમભાઈએ અતિ આગ્રહ કર્યો ત્યારે એમણે કહ્યું કે અમે તમને આ રોગના સંશોધન (રિસર્ચ) અર્થે બોલાવ્યા છે તેમ માનજો. આમ છતાં ઉત્તમભાઈએ એમને ખૂબ આગ્રહ કર્યો ત્યારે ડૉક્ટરોએ કહ્યું કે જો તમારો વિચાર ફી આપવાનો જ હોય તો આ સંસ્થાને એકસો ડૉલર દાન રૂપે આપો. ઉત્તમભાઈને એક અત્યંત વિલક્ષણ અનુભવ થયો. અજાણ્યા પ્રદેશમાં અને સાવ અજાણ્યા લોકો વચ્ચે અને એમાં પણ જ્યાં ધનની બોલબાલા હોય એવા ભૌતિક જગતમાં આવી વ્યક્તિઓ મળે તે એમને માટે કલ્પના બહારની વાત હતી.
લૉસ ઍન્જલસમાં એકવીસ દિવસ રહ્યા. ડૉક્ટરોએ એમને અમેરિકામાં ફરવાની રજા આપી. માત્ર એટલું જ કહ્યું કે વધુ પડતા થાકથી કે ઇન્ફેક્શનથી કે એમણે સાવધ રહેવું. એ પછી ટોરન્ટો ગયા. ત્યાંથી એમના સ્નેહી શ્રી જનકભાઈ દવે સાથે આવ્યા. તેઓ પણ ભારત આવવાના હોવાથી ઉત્તમભાઈને એમની સાથે ઘણું ફરવાનું બન્યું. એ પછી નાયગ્રાનો ધોધ જોવા ગયા. ત્યારબાદ ન્યૂયૉર્ક, શિકાગો, વૉશિંગ્ટન ગયા અને વળતાં ત્રણ દિવસ લંડન રહીને ભારત પાછા આવ્યા.
ઘણી ભીતિ અને ઘણી તૈયારીઓ સાથે સારવાર માટે અમેરિકા ગયેલા ઉત્તમભાઈને લૉસ ઍન્જલસમાં કોઈ વિશેષ ટ્રીટમેન્ટ લેવી પડી નહીં. વિશેષ તો ભયાનક રોગનો ઓથાર મનમાંથી હળવો થયો. ડૉક્ટરોની સ્નેહભરી કાળજીએ હૃદયમાં નવા આનંદનો સંચાર કર્યો. વગર આશાએ અને કશીય યાચના વિના મળેલો પ્રેમ અમૂલ્ય હોય છે !
આવા સાહજિક પ્રેમનો ઉત્તમભાઈને હૃદયસ્પર્શી અનુભવ થયો. વળી કશાય પરિચય વિનાની અજાણી વ્યક્તિઓ પાસેથી સ્નેહ સાંપડ્યો ત્યારે એ સમયે કવિ કલાપીની આ પંક્તિઓ એમના હૃદયમાં ગુંજતી –
“સ્નેહના રંગથી જો ના રંગાયું હોત વિશ્વ આ, મૂલ્ય શું હોત જીવ્યાનું માનવી સૃષ્ટિમાં અહા !”
આ ઘટનાની વાત કરતાં ઉત્તમભાઈ ગળગળા બની જતા હતા. તેઓ આ ડૉક્ટર-ત્રિપુટીનાં સ્મરણોને પોતાના જીવનની અતિ મોંઘેરી મૂડી સમાન ગણતા
હતા.
129
