Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
ઉત્તમભાઈનાં સૌથી મોટા પુત્રી મીનાબહેનનાં લગ્ન દિનેશભાઈ સાથે થયાં હતાં. દિનેશભાઈએ બી.એસસી. સુધી અભ્યાસ કર્યો અને પછી એ સમયે જેમ બીજા યુવાનો હીરાના ઉદ્યોગમાં જતા હતા એ રીતે દિનેશભાઈએ નવસારીમાં ૧૯૬૬માં પચીસમા વર્ષે હીરાનું કામ શરૂ કર્યું. અત્યંત સજ્જન અને ઉદાર એવા દિનેશભાઈનો હીરાનો વ્યવસાય પ્રમાણમાં ઠીક ઠીક ચાલતો હતો. કશાય પીઠબળ વગર દિનેશભાઈએ વ્યવસાયમાં પ્રગતિ સાધી, પણ એક પાર્ટી તૂટી પડતાં થોડી મુશ્કેલીમાં મુકાયા. બીજી બાજુ ઉત્તમભાઈના વેપારની પ્રગતિ એટલી બધી હતી કે એમને વિચાર આવ્યો કે મારા ઉત્કર્ષની સાથે મારી પુત્રીઓનો પણ ઉત્કર્ષ થવો જોઈએ. આથી એમણે પોતાના જમાઈઓને પોતાની સાથે વેપારમાં જોડાવાનું કહ્યું.
સામાન્ય રીતે કોઈ સસરા પોતાના જમાઈને વેપારમાં સાથે રાખતાં પહેલાં હજાર વાર વિચાર કરે, કારણ કે એના ઘણા પ્રત્યાઘાત પડતા હોય છે. એક અર્થમાં આ દુસ્સાહસ જ કહેવાય, પરંતુ ઉત્તમભાઈ પોતાની પુત્રીઓને સુખી અને સમૃદ્ધ કરવા ચાહતા હતા અને તેથી એમણે જૂની રૂઢિ ફગાવી દીધી. એમણે દિનેશભાઈને કહ્યું કે તમે મારી સાથે વેપારમાં જોડાઓ તો મને આનંદ થશે. પૂરેપૂરો વિચાર કરજો, તેમજ તમારી અપેક્ષા શી છે તે સ્પષ્ટપણે કહેજો.
દિનેશભાઈએ એકાદ વર્ષ વિચાર કર્યો અને પછી ૧૯૭૭માં ઉત્તમભાઈ સાથે એમના વ્યવસાયમાં જોડાયા. દિનેશભાઈ નવસારીથી અમદાવાદ આવ્યા અને અમદાવાદમાં ફ્લેટ લઈને પોતાની કામગીરીની શરૂઆત કરી. આજે દિનેશભાઈ ટોરેન્ટ કેબલ નામની કંપની સંભાળે છે, જેનું વાર્ષિક ટર્નઓવર ૧૦૦ કરોડ રૂપિયાનું છે.
૧૯૭૬માં ઉત્તમભાઈના બીજી પુત્રી નયનાબહેનનાં લગ્ન થયાં. આ સમયે જૈન નગરમાં આવેલા એક ફ્લેટમાં દુષ્યતભાઈ રહેતા હતા. એમને કાપડની એજન્સી હતી. કાપડના વેપાર માટે બેંગ્લોર ગયા. વેપાર ઠીક ઠીક ચાલે, પરંતુ બેંગ્લોરની હવા દુષ્યતભાઈને અનુકૂળ આવી નહીં. બીજી બાજુ ઉત્તમભાઈનું પોતાની સાથે જોડાવાનું નિમંત્રણ તો ઊભું જ હતું અને એ રીતે દુષ્યતભાઈ પણ ટોરેન્ટમાં જોડાઈ ગયા. આજે દુષ્યતભાઈ ટોરેલ કોમેટિક્સ પ્રા. લિ. સંભાળે છે અને નયનાબહેન તેનો પરચેઝ તથા એડમિનિસ્ટ્રેશન વિભાગ સંભાળે છે.
ઉત્તમભાઈએ પોતાના પુત્રોની માફક જમાઈઓને પણ વ્યાપારમાં કામ કરવાની પૂરેપૂરી મોકળાશ અને સ્વતંત્રતા આપી. ઉત્તમભાઈ વ્યવસાયમાં શું કરવું અને શું ન કરવું એવી સતત શિખામણ આપવાને બદલે એમ કહેતાં કે કોઈ બાબતમાં તમને મારા અભિપ્રાયની જરૂર લાગે તો મને જરૂર મળજો, પણ એ સિવાય તમે તમારી રીતે વ્યવસાય કરતા રહેજો.
161
