Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
શત્રુ પણ બને મિત્ર
ગુજરાતના “બિઝનેસમેન ઑફ ધ ઇયર”નો એવોર્ડ મેળવનાર ઉત્તમભાઈની ખાસિયત કઈ ? એમની સૌથી પહેલી વિશેષતા તો એમની આશ્ચર્ય પમાડે તેવી ચોકસાઈ. આને માટે ક્યારેક કોઈને કડક સ્વભાવના પણ લાગે. શ્રી સુમતિભાઈએ કહ્યું કે પોતે જેવા ચોક્કસ અને નિયમિત એટલી જ ચોકસાઈ અને નિયમિતતાનો તેઓ બીજા પાસે આગ્રહ રાખતા હતા. કામની ચીવટ એવી કે આગલી રાત્રે સૂતાં પહેલાં આવતી કાલે શું કરવાનું છે એની સંપૂર્ણ યાદી તૈયાર કરી લેતા હતા. કોને ફોન કરવાના છે અને કોને મળવા જવાનું છે તે બધું જ કાર્ય નક્કી કરી દેતા. એ પછી દિવસ દરમિયાન કોઈ કામ યાદ આવે તો પીળા રંગના ચપકાવેલા નોટપેડમાં એની નોંધ કરતા હતા. બહારગામ જવાનું હોય તો ટિકિટ બરાબર જોઈ લે. ઘણી વાર તો ફેક્ટરીનું સ્ટેટમેન્ટ જોતા હોય તો તેના મહત્ત્વના મુદ્દા કે આખું સ્ટેટમેન્ટ તેઓ જાતે જ ઉતારી લેતા હતા.
ઉત્તમભાઈ પોતાની પાસે અંગત ડાયરી રાખતા હતા અને એમાં પોતાનાં કામોની નોંધ રાખતા. લીધેલું કામ સમયસર પૂરું થાય ત્યારે તેઓ ખુશ થઈ જતા. કોઈ જુઠું બોલીને વાત છાવરવાનો પ્રયાસ કરે અથવા દાવપેચ ખેલે ત્યારે ઉત્તમભાઈનો અણગમો તરત દેખાઈ આવતો હતો અને મોઢામોઢ સાચી વાત સંભળાવી દેતા હતા.
અમુક મિત્રોને તેઓ નિયમિતપણે ફોન કરતા હતા અને ખબરઅંતર પૂછતા હતા.
આજુબાજુ સહાયકો હોય તેમ છતાં ઉત્તમભાઈ જાતે જ ફોનનો નંબર લગાવીને વાત કરતા હતા. એમના સહાયકો કહે કે અમે તમારી પાસે છીએ તો અમને એ કામ કરવા દો ને ! પણ જીવનના આરંભકાળથી જ જાતમહેનતનો પાઠ શીખેલા ઉત્તમભાઈને બીજાની પાસે પોતાનું ઓછામાં ઓછું કામ કરાવવું ગમતું હતું.
પોતાના વ્યવસાયી જીવનની શરૂઆતમાં તો બે હાથમાં વજનદાર બૅગ લઈને જુદાં જુદાં ગામમાં ઘૂમતા હતા. વળી એ ગામમાં સાઇકલ પર બેસીને ડૉક્ટરોને મળવા જતા હતા. જે કંઈ પ્રાપ્ત કરવું હોય તેને માટે પુરુષાર્થ કરવામાં કશી કચાશ છોડતા નહોતા. ડૉ. નરેશભાઈ શાહે કહ્યું કે ઉત્તમભાઈનો છેક ટ્રિનિટી'ના કાર્યકાળથી એમને પરિચય હતો. તેઓએ જે સમય આપ્યો હોય બરાબર એ જ સમયે ડૉક્ટરોને મળવા આવતા હતા. પોતાના મિત્રોને ડૉ. નરેશ શાહ કહેતા, “પ્રારબ્ધ કરતાં પુરુષાર્થની મહત્તા જોવી હોય તો ઉત્તમભાઈમાં જોવા મળશે.” ઉત્તમભાઈને પહેલેથી જ ડાયરીમાં લખવાની ટેવ હતી. એકેએક વસ્તુની નોંધ
183
