Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
અપાર વેદના થઈ હતી. પોતાની બહેનની પુણ્યસ્મૃતિમાં એમણે પૂજા ભણાવી અને એક ધાર્મિક પુસ્તક પણ પ્રગટ કર્યું હતું.
ઉત્તમભાઈની ધર્મભાવના એ આડંબર નહીં, પણ અંતરની ચીજ હતી. તેઓ ઓપેરા જૈન સંઘ અને જૈનનગર સંઘ બંનેના પ્રમુખ હતા. ઉત્તમભાઈ ઓપેરાના કે જૈનનગરના ? – એવો મીઠો વિવાદ પણ ક્યારેક થતો હતો. સ્વાસ્થ્ય સારું હતું ત્યાં સુધી ઉત્તમભાઈ રોજ સવારે નિયમિત દેરાસર, ઉપાશ્રય જતા હતા. જે મહારાજસાહેબ બિરાજમાન હોય તેમને વંદન કરતા હતા.
ઉત્તમભાઈમાં ધર્મનિષ્ઠા હતી, પરંતુ એમની દૃષ્ટિમર્યાદા સ્વધર્મની સીમામાં બંધાયેલી નહોતી. કોઈપણ ધર્મના સાધુ-સંતો એમને ત્યાં આવતા, તો એમનો હૃદયપૂર્વક આદર-સત્કાર કરતા હતા. અન્ય ધર્મનાં ટ્રસ્ટોમાં પણ દાન આપવાની એટલી જ ઉત્સુકતા દાખવતા હતા. શાહીબાગની અક્ષર પુરુષોત્તમ સંસ્થા અને એના જેવી અન્ય કેટલીય ધાર્મિક સંસ્થાઓને એમણે મદદ કરી હતી.
શારદાબહેનમાં પણ એટલા જ ઊંડા ધર્મસંસ્કાર આજે જોવા મળે છે. તેઓ નિયમિતપણે વ્યાખ્યાન સાંભળે અને સામાયિક પણ કરે છે. આમ બંનેમાં ઊંડી ધર્મભાવના હોવાથી દેરાસર હોય કે ઉપાશ્રય, સાધર્મિક વાત્સલ્ય હોય કે સાધર્મિકની સારવારની વાત હોય – એ બધાં ધર્મકાર્યોમાં મોખરે રહ્યાં હતાં.
–
ઉત્તમભાઈના વ્યક્તિત્વનાં આવાં અનેકવિધ પાસાંઓ હોવાને કારણે પાટણના ડૉ. અનિલભાઈ પટેલ એમને “આદર્શ માનવી” તરીકે ગણતા હતા. તેઓ કહે છે કે “બીજો કોઈ પણ માણસ છ મહિનામાં માનસિક રીતે ભાંગી પડ્યો હોય, ત્યારે ઉત્તમભાઈએ જીવલેણ બીમારીઓ પાર કરીને વિશાળ ઔદ્યોગિક સામ્રાજ્ય રચ્યું.” ડૉ. અનિલભાઈએ કહ્યું કે, “અમારા જીવનમાં નાની-મોટી બીમારી આવે અને થોડી ચિંતા જાગે ત્યારે અમે મોટી બીમારીઓ સામે યુદ્ધ કરનારા ઉત્તમભાઈને યાદ કરીએ છીએ.” એ અર્થમાં તેઓ આજે પણ ઉત્તમભાઈને પોતાના પ્રેરણામૂર્તિ માને છે.
જીવનની છેક ટોચ પર બેઠા પછી ઉત્તમભાઈને કેવો અનુભવ થતો હશે ? આટલું બધું સુખ અને સમૃદ્ધિ હોવા છતાં ઉત્તમભાઈને ક્યારેક જીવનમાં શૂન્યતા લાગતી હતી. પર્વત પર આરોહણ કરતી વખતે તો આખી દુનિયા આસપાસ ઘૂમતી હોય, પરંતુ પર્વતના શિખર પર એક પ્રકારની શૂન્યતા અને એકલવાયાપણું હોય છે. આવું એકલવાયાપણું ઉત્તમભાઈને સતાવતું હતું ખરું?
ક્યારેક ઉત્તમભાઈના મનમાં એક વિચાર પણ જાગતો હતો. એમણે પહેલી નોકરી મુંબઈમાં રૅશનિંગની ઑફિસમાં કરી હતી. થોડા જ સમયમાં એ સ૨કા૨ી
215
