Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
પહેલાં સમીરભાઈને આશ્ચર્ય થતું કે જેની સાથે કશીય નિસ્બત ન હોય, સાવ ભિન્ન ક્ષેત્રના હોવાના કારણે ક્યારેય કોઈ કામ પડવાનું ન હોય એની સાથે આવો ઘરોબો રાખવાનો અર્થ શો ? પછીથી સમીરભાઈને સમજાયું કે આ રીતે જુદા જુદા ક્ષેત્રની વ્યક્તિઓ પાસેથી ભિન્ન ભિન્ન દૃષ્ટિબિંદુ મેળવતા હતા. એમની સાથે વિચારોનું આદાનપ્રદાન કરતા હતા અને એ દ્વારા પોતાની વિચારસૃષ્ટિ સમૃદ્ધ
કરતા હતા.
એમનાં પુત્રવધૂ અનિતાબહેનને મોટું આશ્ચર્ય એ થતું કે આટલી બધી અસ્વસ્થ તબિયત હોવા છતાં કોઈને ત્યાં નાનામાં નાનો પ્રસંગ હોય તો પણ તેઓ ઉપસ્થિત રહેતા હતા. જેટલી કંકોતરીઓ આવી હોય, એટલાનાં કવર બનાવતા હતા. તબિયત અસ્વસ્થ હોય તો પણ બે મિનિટ માટે પણ એને ત્યાં જઈ આવતા હતા. આમાં તેઓ માત્ર ધંધાદારી સંબંધ જ સાચવતા નહીં, બલ્કે વ્યવસાય સિવાયનાં ક્ષેત્રોના સંબંધો પણ એટલી જ ચીવટથી જાળવતા હતા.
કોઈ સ્વજન સૂચન કરે કે એમને આટલા સહયોગની જરૂ૨ છે, તો ઉત્તમભાઈ તરત જ એને મદદ કરવા માટે દોડી જતા હતા. એનો પ્રશ્ન એ પોતીકો પ્રશ્ન બનાવી દેતા હતા અને પછી એની જરૂરિયાત પૂરી કરવા માટે બધી જ કોશિશ કરી છૂટતા હતા. જયંતિભાઈ મહેતા ઉત્તમભાઈના ભત્રીજા થાય. તેઓ જ્યારે અમદાવાદ અભ્યાસાર્થે આવ્યા ત્યારે લલ્લુ રાયજી બોર્ડિંગમાં રહેવાની વ્યવસ્થા ઉત્તમભાઈએ કરી આપી હતી. ૧૯૫૮-૫૯માં ઉત્તમભાઈની કંપની ટ્રિનિટીમાં જયંતિભાઈએ બે-ત્રણ મહિના કામ કર્યું હતું. કૉલેજમાં ભણતા શ્રી જયંતિભાઈને હૂંફ અને માર્ગદર્શન આપતા હતા, જયંતિભાઈએ કૉલેજના પહેલા વર્ષમાં કેટલો ખર્ચ કર્યો તેની વિગત પણ પૂછતા હતા. વળી જો વધારે ખર્ચ લાગે તો ઠપકો આપતા હતા. બીજી બાજુ કોઈ વાર ફીની રકમ થોડા સમય માટે આપવાની હોય તો તરત આપી દેતા હતા. કુટુંબના વડીલ તરીકે ઉત્તમભાઈ સગાં-સ્નેહીની ખબર પૂછે અને એના કામમાં મદદરૂપ થાય. સગાંવહાલાંઓનું આતિથ્ય અને સરભરા શારદાબહેન કરે. કુટુંબકથા કહેવાનો કે સાંભળવાનો ઉત્તમભાઈને સહેજે શોખ કે રુચિ નહોતાં, આથી જરૂર પડ્યે સલાહ આપતા હતા અને કોઈ સગાને મુશ્કેલી હોય તો એમાંથી માર્ગ કાઢી આપતા હતા.
ઉત્તમભાઈના મોટાભાઈ આંબાલાલભાઈના અવસાન પછી ઉત્તમભાઈએ એમના ત્રણે પુત્રો લલિતભાઈ, કમલેશભાઈ અને સુનીલભાઈને પિતાનો સ્નેહ આપ્યો હતો. પોતાના વ્યાવહારિક કે અન્ય પ્રસંગમાં એમને યાદ કરીને નિમંત્રણ આપતા હતા અને જ્યારે આવે ત્યારે ભાવથી ખબરઅંતર પૂછતાં હતાં.
લલિતભાઈને એમના લગ્નના સમયગાળામાં જ કમળો થયો ત્યારે
188
