Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
એક વાર શ્રી પી. કે. લહેરી ઉદ્યોગ કમિશનર હતા ત્યારે એમને એમની કચેરીમાં શ્રી સમીરભાઈ મળી ગયા. સમીરભાઈને પૂછ્યું કે તેઓ શા કારણે આવ્યા છે, પણ સમી૨ભાઈએ કામ કહ્યું નહીં. કારણ કે ઉત્તમભાઈએ એમને જાતે જ કામ ક૨વા કહ્યું હતું. અને ખાસ તો અંગત સંબંધનો ઉપયોગ ન થાય એની તકેદારી રાખતા. પણ એ જ ઉત્તમભાઈ મિત્રો સાથે એટલી બધી આત્મીયતા ધરાવતા કે એક વર્ષ માટે શ્રી પી. કે. લહેરી લંડનમાં હતા તો લંડનમાં એમને ડાયરી અને કૅલેન્ડર મોકલ્યાં હતાં. એક વાર ઉત્તમભાઈ જેની સાથે લાગણીનો તંતુ બાંધતા એ પછી તેઓ ક્યારેય વિચારતા નહીં કે એ વ્યક્તિના સંબંધથી ફાયદો થાય એવું છે કે નહીં ? એ હોદ્દા પર હોય કે ન હોય પણ ઉત્તમભાઈનો સ્નેહ એવો જ રહેતો. આથી જ એક કરોડના ટર્નઓવરમાંથી કંપની ૨૦૦૦ કરોડના ટર્નઓવરે પહોંચી તેમ છતાં ઉત્તમભાઈની વૃત્તિ, પ્રવૃત્તિ કે વિચારધારામાં ક્યારેય કોઈ ફરક જોઈ શકાતો નહીં.
છેક અભ્યાસકાળથી ઉત્તમભાઈને વાચનમાં ઊંડો રસ હતો. કોઈ પણ વિષયમાં ઊંડા ઊતરવાની જિજ્ઞાસા એમના જીવનમાં પ્રતિબિંબિત થતી હતી. પોતાના વિષયોનો ઊંડો અભ્યાસ કરતા, ડૉક્ટરોને જરૂરી પુસ્તકો આપતા, મેડિકલ સાયન્સના અદ્યતન, મોંઘી કિંમતવાળાં સામયિકો મંગાવીને તેઓ અભ્યાસ કરતા હતા. બસ, ટ્રેન કે પ્લેનમાં મુસાફરી કરતા હોય, ત્યારે એમનું વાચન ચાલુ જ હોય. એમના વાચનના વિષયોમાં મુખ્યત્વે એમના વ્યવસાયના વિષયોનું વાચન હોય, તે પછી ધાર્મિક વાચન હોય. પોતાની કંપનીમાં એમણે સમૃદ્ધ પુસ્તકાલય ઊભું કર્યું હતું. અમદાવાદના ડૉ. સુમન શાહ જેવા નિષ્ણાત અને અભ્યાસી ડૉક્ટરોને પણ પોતાની પાસે આવેલાં ખૂબ મોંઘાં સામયિકો સ્નેહથી મોકલી આપતા હતા, જુદી જુદી શાખાના ડૉક્ટરોને એમના વિષયની જે છેલ્લામાં છેલ્લી માહિતી પોતાને મળી હોય તે પહોંચતી કરતા હતા.
પોતાના વ્યવસાયનો જ વિચાર કરવાની સંકુચિત મર્યાદામાં ઉત્તમભાઈ રહ્યા નહોતા. એમણે વ્યવસાયના વિકાસની સાથોસાથ એ વ્યવસાયની આસપાસ સંકળાયેલા સહુ કોઈનો વિચાર કર્યો હતો. એમણે મેડિકલ લાઇનના જુદા જુદા સેમિનારોમાં આર્થિક સહયોગ આપ્યો, તો બીજી બાજુ ડૉક્ટરોને એમના વિષય અંગે મદદરૂપ થવાનો પણ પ્રયાસ કર્યો. ઑલ ઇન્ડિયા સાઇકિયાટ્રિસ્ટ કૉન્ફરન્સમાં તેઓ જાતે હાજર રહેતા હતા. આ કૉન્ફરન્સમાં હાજર રહેવા છેક કલકત્તા સુધી ગયા હતા. તેઓની કંપની દ્વારા કોઈ કૉન્ફરન્સનું આયોજન થતું, ત્યારે એની ઝીણામાં ઝીણી વિગતોનો વિચાર કરતા હતા. એક અર્થમાં કહીએ તો આવી કોઈ કૉન્ફરન્સ હોય અથવા ઘેર કોઈ પ્રસંગ હોય, ઉત્તમભાઈ એના આયોજનમાં કોઈ કચાશ રાખે નહીં.
212
