Aafatoni Aandhi Vachhe Samruddhinu Shikhar U N Mehtanu Jivan Charitra

Author(s): Kumarpal Desai
Publisher: Torrent Limited

Page 170

આમ જ્યારે આફત આવી હોય ત્યારે ઉત્તમભાઈ સાંત્વના કે સધિયારો તો આપતા હતા, પણ એથીયે વિશેષ સથવારો આપતા હતા. કદાચ નિષ્ફળ જવું પડે તો પણ સહેજે મૂંઝાવું નહિ, એવું એમનું વલણ એમના સાથીઓ અને કર્મચારીઓને સફળતા મેળવવા માટે કટિબદ્ધ કરતું હતું. આથી જ ટોરેન્ટ લિ. અને ગુજરાત ટોરેન્ટ એનર્જી કૉર્પોરેશન (જીટેક) લિ.ના મેનેજિંગ ડિરેક્ટર શ્રી માર્કડ ભટ્ટને લાગતું કે જેટલી મોટી કટોકટી આવતી તેટલો એનો સામનો કરવાનું વિશેષ ધૈર્ય ઉત્તમભાઈમાં જોવા મળતું હતું. અણધારી રીતે કે અસાધારણ વ્યાવસાયિક પરિસ્થિતિ ઊભી થાય ત્યારે પોતે વધુ શાંત અને સ્વસ્થ લાગતા હતા, એટલું જ નહીં પણ બીજાઓને એટલી જ હિંમત આપતા હતા. રશિયાની ઊથલપાથલ સાથે વ્યાવસાયિક પરિસ્થિતિમાં મુશ્કેલી સર્જાતાં સુધીરભાઈ ચિંતાતુર લાગતા હતા, ત્યારે ઉત્તમભાઈએ એમને કહ્યું કે આનાથી સહેજ ગભરાઈશ નહીં.
ઉત્તમભાઈએ એમને હિંમત આપતાં કહેતા કે, “છાપીથી અમદાવાદ આવ્યા ત્યારે આપણી પાસે શું હતું ?” આ રીતે ઉત્તમભાઈએ હંમેશાં પોતાના પુત્રો અને સહકાર્યકરોને જીવંત અને મજબૂત સાથ આપ્યો હતો.
ઉત્તમભાઈના ઉદ્યોગના સંચાલનના વિશિષ્ટ ગુણ તરીકે એમના પુત્ર સમીરભાઈ એમના “પૉઝિટિવ સ્પિરિટ’ને ગણાવે છે. કોઈ પણ બાબતમાં અને કોઈ પણ પરિસ્થિતિ વિશે વિધેયાત્મક અભિગમ અપનાવવો. કોઈએ વેપારમાં ભૂલ કરી હોય, અથવા તો મોટી ખોટ ખાધી હોય તો પણ ઉત્તમભાઈ એને ક્યારેય ઠપકો આપતા નહીં કે કટુ વચનો કહેતા નહીં. એને બદલે ભવિષ્યમાં આવી ભૂલ ન થાય તે માટે કેવી તકેદારી રાખવી જોઈએ તેનો પદાર્થપાઠ શીખવતા.
તેઓ સતત એ વાત પર ભાર મૂકતા કે, “ઉદ્યોગમાં સાહસિકતા આવકાર્ય ગણાય, પણ સફળ સંચાલન તો અનિવાર્ય ગણાય.” પરિણામે કોઈએ ભૂલ કરી હોય કે નુકસાન કર્યું હોય, તો પણ એ નિઃસંકોચ ઉત્તમભાઈને કહી શકતા હતા. આ બાબતને સમીરભાઈ એમના વ્યવસાયનું સૌથી સબળ અને પ્રબળ પાસું ગણાવે છે.
એવી જ રીતે છોકરાને પકડી-પકડીને ચલાવવા કરતાં એને પાણીમાં નાંખો તો તરતા શીખશે એવો ઉત્તમભાઈનો અભિગમ હતો. આથી સોંપેલા કામમાં ક્યારેય કોઈના કાર્યનું ‘સુપરવિઝન' કરતા નહીં.
ઉત્તમભાઈના આ વિધેયાત્મક અભિગમ(પૉઝિટિવ સ્પિરિટ)ને દર્શાવતાં અમદાવાદ ઇલેક્ટ્રિસિટી કંપની લિમિટેડના વાઇસ પ્રેસિડન્ટ શ્રી મુરલી રંગનાથને ટોરેન્ટ ગૃહે ચીનમાં કરેલા વ્યાપારનો ખ્યાલ આપ્યો, ઉદ્યોગપતિ એ 166