Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
સહકાર્યકરોને હિંમત આપી શકતી હોય છે અને એને પરિણામે જ ઔદ્યોગિક સાહસ ખેડવાની ઉત્તમભાઈની શક્તિ ઘણી હતી. સંપત્તિ વધુ ને વધુ સમૃદ્ધિમાં પલટાય તે માટે ઉદ્યોગ કરનાર પાસે સાહસિકતા હોવી જોઈએ. ટોરેન્ટ સંકુલે સામે તક જોઈને લીધેલાં સાહસો પાછળ ઉત્તમભાઈની દૃષ્ટિ અને કુનેહ કારણભૂત હતી.
ટોરેન્ટમાં ‘ફાઉન્ડર્સ ડે’ ઊજવવાનો રિવાજ હતો. અને આ દિવસે નાના-મોટા સહુ કર્મચારીઓ પ્રેમથી અને મુક્ત મનથી એકબીજાને મળતા હતા. ઉત્તમભાઈ આ સમયે જૂના કર્મચારીઓને યાદ કરતા હતા. અમુક વ્યક્તિ ક્યાં છે, એની જાણકારી મેળવતા હતા. ઘણા યુવાન કર્મચારી અને પ્રોફેશનલને એમના ચેરમેન સાથે ફોટો પડાવવાની ઇચ્છા હોય તો તે ઇચ્છા પણ પૂરી કરતા હતા. આ સમયે પરિવારના વડા તરીકેનો એમનો આનંદ એમના ચહેરા પર છલકાઈ ઊઠતો હતા. એ.ઇ.સી.ના મેનેજિંગ ડિરેક્ટર શ્રી સી. આર. શાહને એ વિશેષતા લાગી કે ગમે તેટલી નાદુરસ્ત તબિયત હોય કે કોઈ બીજી મુશ્કેલી હોય, પરંતુ ઉત્તમભાઈની વાતમાં ક્યારેય એમનું દુઃખ ડોકિયાં કરે નહીં.
ઉત્તમભાઈની કાર્યપદ્ધતિની એક આગવી વિશેષતા તે કોઈ પણ બાબતનો નિર્ણય લેતા પૂર્વે એનો સર્વગ્રાહી વિચાર કરવો તે હતી. એમની નિર્ણય લેવાની પ્રક્રિયામાં કશું તડ અને ફડ જોવા ન મળે. તેઓ પોતે જાતઅભ્યાસ કરે. એ વિષયના નિષ્ણાતો અને જાણકારોની સામે ચાલીને સલાહ લેતા હતા. બધાના અભિપ્રાય જાણ્યા બાદ પોતાનો નિર્ણય કરતા હતા. માત્ર વ્યવસાયમાં જ નહીં, બલ્કે સામાજિક અને શૈક્ષણિક કાર્યોમાં દાન આપવા અંગે એમનો આવો જ અભિગમ રહેતો હતો. એક અર્થમાં સુધીરભાઈ અને સમીરભાઈની ત્વરિત નિર્ણયશક્તિ અને ત્વરિત વિચારણાના પરિણામે એમના ઔદ્યોગિક ગૃહમાં એક પ્રકારનું સમતોલન સધાયું.
પોતાનાં પાછલાં વર્ષોમાં ઉત્તમભાઈ ‘ટોરેન્ટ'ની પ્રગતિ જોઈને સંતોષનો ભાવ અનુભવતા હતા. તેઓ સુધીરભાઈ અને સમીરભાઈને કહેતા પણ ખરા કે જે મોટા ઉદ્યોગો સ્થાપવાની એમની ભાવના અપૂર્ણ રહી હતી, તે એમણે પૂર્ણ કરી બતાવી. એમાં પણ પાવર સેક્ટરમાં મેળવેલી સફળતાને તેઓ અભૂતપૂર્વ સિદ્ધિ તરીકે બિરદાવતા હતા.
ઉત્તમભાઈએ પોતાના ઉદ્યોગના આયોજન પાછળ એક સ્પષ્ટ અને ચોક્કસ નીતિ અને દૃષ્ટિ રાખી. આજના જગતમાં ઘણી વાર માનવી અપ્રમાણિક માર્ગો
168
