Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
ભયમાં આવી પડતું હતું. કેટલીયે મહેનત બાદ એ આફતને પાર કરતા હતા. આફતના ડુંગરને ઓળંગીને માત્ર છ મહિનાનો “ઇન્ટરવલ” પડ્યો હોય કે તરત જ કોઈ બીજી આફત અણધારી દિશાએથી સામે આવીને ઊભી રહેતી અને તે પણ એટલી જ અસામાન્ય.
ક્યારેક મજાકમાં તેઓ મને કહેતા પણ ખરા કે આ છ મહિનાના “ઇન્ટરવલ”ને બદલે એકાદ વર્ષનો સુખ-શાંતિભર્યો “ઇન્ટરવલ” કેમ આવતો નથી ? ઇન્વેક્શનથી બચવા માટે એમણે નક્કી કર્યું કે બને ત્યાં સુધી ભારતમાં ફરવા જવું કે વેપાર ખેડવા જવું નહીં. જો ફરવું જ હોય તો વર્ષે કે બે વર્ષે યુરોપઅમેરિકા જઈ આવવું. ૧૯૮રમાં ઉત્તમભાઈ વિચારતા હતા કે યુરોપ ફરી આવીએ. ઉત્તમભાઈની સાથે પહેલેથી જ છાયાની માફક શારદાબહેન રહેતાં હતાં. એક તો ઉત્તમભાઈની માંદગી એવી કે સતત એમની સાથે રહેવું પડતું હતું. અગાઉ એક સમય એવો હતો કે ઉત્તમભાઈ એમ્ફટેમિનની ગોળી ન લે એ માટે પણ એમની સાથે રહેવું પડતું હતું.
ઈ. સ. ૧૯૮૨માં યુરોપના પ્રવાસે નીકળવાના હતા તેના અગાઉના દિવસે જ એમને જાણ થઈ કે એમના એક સાથીએ વેચાણના ઉજળા ભવિષ્યની શક્યતા જોઈને સાઠ લાખનો ઓર્ડર એક કંપનીને આપ્યો છે. જો એમને ખ્યાલ હોત તો તેઓએ આવું થવા દીધું ન હોત. પણ હવે કરવું શું?
ઉત્તમભાઈના પ્રયાસથી કંપનીએ જંગી નફો મેળવવાની સાથોસાથ મોટી ખોટ ખમવાની શક્તિ પણ મેળવી હતી. ઉત્તમભાઈએ આ ખોટ સહન કરી. એથીયે વિશેષ તો આવો ઑર્ડર મૂકનાર કોઈનાય પર તેઓ સહેજે ગુસ્સે થયા નહિ. માત્ર એટલું જ કહ્યું કે આટલો મોટો ઑર્ડર મૂકતાં પહેલાં તમારે મને પૂછવું જોઈએ. બીજી બાજુ એમના જ એક મિત્રના પુત્રએ વેપારમાં ચાલીસ હજાર રૂપિયા ગુમાવ્યા અને એના પિતાએ બીજા જ દિવસે દીકરાની વ્યવસાયની લાઇન બદલાવી નાખી હતી.
૧૯૮૬ના ડિસેમ્બર મહિનામાં હૃદયની બીમારીને કારણે ઉત્તમભાઈ અમેરિકા ગયા. સૌપ્રથમ લોસ એન્જલિસ ગયા. અહીં એમણે એન્જિયોગ્રાફી કરાવી, પણ તે બરાબર થઈ નહિ. આ સમયે ઉત્તમભાઈને લૉસ-એન્જલિસમાં થયેલી એન્જિયોગ્રાફીની ચકાસણી કરવાનો સ્વયં વિચાર આવ્યો. પછી હ્યુસ્ટન હાર્ટ સેન્ટરમાં ડૉ. વીરેન્દ્ર માથુરે એન્જિયોગ્રાફી કરી અને ત્રણ આર્ટરી બ્લોક હોવાથી ડૉ. ડેન્ટન કૂલીએ બાય-પાસ સર્જરી કરી. ડિસેમ્બર મહિનામાં નાતાલની રજાઓ હોવાથી હૉસ્પિટલના વ્યવસ્થાતંત્રમાં
134
