Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
આપબળે અને આત્મશ્રદ્ધાથી જીવન ઘડનારાને આવું પરાવલંબન ક્યાંથી ગમે ?
ઉત્તમભાઈ પંદરેક દિવસ આરામ લઈને મુંબઈ ગયા. મુંબઈ હૉસ્પિટલના વિખ્યાત ન્યુરોલોજિસ્ટ ડૉ. સિંગલ અને ડૉ. વાડિયાને પોતાની તબિયત બતાવી. એમણે બ્રેઇનનો એમ.આર.આઈ. કરાવવાની સલાહ આપી. અગાઉના એમ.આર.આઈ.માં પરિવર્તનો આવ્યાં હતાં, પરંતુ એ પરિવર્તનો ડૉક્ટરના કહેવા પ્રમાણે સમય અને ઉંમરને કારણે આવ્યાં હતાં. ઉત્તમભાઈને સ્વાથ્ય અંગે વધુ સાવચેતી રાખવાનું ડૉક્ટરોએ ભારપૂર્વક જણાવ્યું. એ પછી અઢાર મહિના સુધી કશું થયું નહીં.
આમ તો દર છ મહિને મેડિકલ ચેક-અપ માટે મુંબઈ જવાનું હતું, પરંતુ એ શક્ય બનતું નહીં અને તબિયત સારી થઈ ગઈ હતી. વળી બીજી કોઈ ફરિયાદ નહોતી તેથી ચિંતાનો કોઈ સવાલ નહોતો. પરિણામે મુંબઈ બતાવવા જવાનું પાછું ઠેલાતું ગયું.
છેક ૧૯૯૨ની ૨૨મી જાન્યુઆરીએ ઉત્તમભાઈના સાટુને ત્યાં લગ્ન હોવાથી તેઓ અમદાવાદથી વહેલી સવારની ફ્લાઇટમાં મુંબઈ ગયા. ચોવીસમી તારીખે લગ્નપ્રસંગ હતો. ત્રેવીસમી જાન્યુઆરીએ કોઈ બીજું ખાસ કામ નહોતું, તેથી એમણે અમદાવાદથી જ મુંબઈમાં જરૂરી ટેસ્ટ લેવાય તે માટેની વ્યવસ્થા કરી હતી. એમણે મુંબઈ મેડિકલ સેન્ટરમાં કેરોટીનાનો ટેસ્ટ કરાવ્યો. આ ટેસ્ટનો રિપોર્ટ મેળવીને ડૉ. સિંગલને મળવાનો એમનો વિચાર હતો. ટેસ્ટ થયો કે તરત જ ડૉક્ટરે કહ્યું કે પેરૅલિસિસની કોઈ શક્યતા નથી, કિંતુ તમારા ટેસ્ટમાં મલ્ટિપલ લિમ્ફનોડ આવે છે.
આ સાંભળતાં જ ઉત્તમભાઈના માથે ધોળે દિવસે વીજળી ત્રાટકી. ચૌદ વર્ષ પહેલાં એમને થયેલા ભયાવહ રોગે ફરી દેખા દીધી હતી. ભારતમાં નામાંકિત ડૉક્ટરોમાં પણ ગણ્યાગાંઠ્યા ડૉક્ટરોને જ આની માહિતી હતી. ઉત્તમભાઈના ચિત્તમાં ૧૯૭૭-'૭૮નો આખોય ભૂતકાળ ઘૂમવા લાગ્યો. આ રોગનું નામ સાંભળતાં જ એમના ઘરમાં સૌને કેટલી બધી ચિંતા થઈ હતી તેની વ્યથાજનક સ્મૃતિઓ મનમાં ઉભરાવા લાગી. એમણે વિચાર કર્યો કે કુટુંબીજનોને કહેવું કે નહીં ? છેવટે નક્કી કર્યું કે આવતીકાલે લગ્નપ્રસંગ છે, તે રંગેચંગે પતી જાય પછી વાત કરીશું.
ચોવીસમી તારીખે એમના સાટુને ત્યાં યોજાયેલા લગ્નપ્રસંગમાં એમણે હાજરી આપી. પચીસમી તારીખે એમણે પોતાની તબિયત અંગે વધુ ડૉક્ટરી ચકાસણી કરાવવાનું નક્કી કર્યું. એમણે બીચ કેન્ડી હૉસ્પિટલમાં એમ.આર.આઈ. માટે
136
