Book Title: Aafatoni Aandhi Vachhe Samruddhinu Shikhar U N Mehtanu Jivan Charitra
Author(s): Kumarpal Desai
Publisher: Torrent Limited
View full book text
________________
લીધી નહીં. વળી વધારામાં સ્નેહથી કહ્યું, “જ્યારે જ્યારે કંઈ પણ પૂછવું હોય, તો ભારતથી નિ:સંકોચ ફોન કરીને મને પૂછજો.”
એવામાં ઉત્તમભાઈને વિચાર આવ્યો કે આ દર્દના બીજા નિષ્ણાત હેન્રી રાપાપોર્ટ માત્ર સાઠ કિલોમીટર દૂર રહે છે. અહીં સુધી આવ્યો છું તો એમને પણ મળતો જાઉં. પરંતુ તેઓ મળ્યા નહીં, પણ ત્યાં નથવાણી નામના એક ભારતીય ડૉક્ટર મળી ગયા.
એમણે ઉત્તમભાઈને કહ્યું કે, તમારી સ્લાઇડ તો આખા અમેરિકામાં પૅથોલૉજીના જગતમાં જાણીતી થઈ ગઈ છે. અનેક સંશોધકો એના પર વિચારણા કરી રહ્યા છે. ડૉ. નથવાણી પણ રૉબર્ટ લ્યુક્સ અને હેન્રી રામાપોર્ટ સાથે કામ કરતા હતા. ડૉ. લ્યુકસ પછી એમને સ્થાને ડૉ. ઍલેકઝાન્ડર લેવિન આવ્યાં હતાં.
ઉત્તમભાઈ લોસ એન્જલસમાં હતા ત્યારે ડૉ. મણિભાઈ મહેતા અને તેમનાં પત્ની સવિતાબહેને ઉત્તમભાઈ અને શારદાબહેનની ખૂબ સંભાળ લીધી. જો એમના જેવાં સ્નેહી ન હોત તો ઉત્તમભાઈને આ અજાણ્યા પ્રદેશમાં કોઈ હોટેલ કે મોટેલમાં ઊતરવું પડ્યું હોત. ઉત્તમભાઈએ પોતાની સાથે પોતાના મોટા પુત્ર સુધીરભાઈ આવી શકે તે માટે એમનો પાસપોર્ટ પણ તૈયાર કરાવ્યો હતો, પરંતુ મણિભાઈએ કહ્યું કે હાલ સુધીરભાઈએ આવવાની જરૂર નથી. તેઓ એમને બરાબર સાચવશે. તેમ છતાં પછી જરૂર પડશે તો સુધીરભાઈને બોલાવી લઈશું. હકીકત એ બની કે ઉત્તમભાઈને સઘળી સુવિધા મળતાં સુધીરભાઈને ભારતથી બોલાવવાની પરિસ્થિતિ જ ઊભી થઈ નહીં.
ડૉ. ઍલેકઝાન્ડર લેવિન એક અત્યંત સમર્પણશીલ મહિલા તબીબ હતાં અને અમેરિકામાં સારી એવી નામના ધરાવતાં હતાં. એઇડ્રેસના રોગમાં પણ એમનું સંશોધન જાણીતું હતું. ડૉ. લેવિને પણ લાગણીપૂર્વક ઉત્તમભાઈને કહ્યું કે ક્યારેય કોઈ તકલીફ આવે તો નિ:સંકોચ એમને ફોન કરી શકે છે અને વધુ જરૂર લાગે તો રૂબરૂ અહીં મળવા આવી શકે છે. એ પછી તો ડૉ. લેવિન જોડે એટલો બધો લાગણીભર્યો સંબંધ થયો કે એમની “એપોઇન્ટમેન્ટ' લીધી હોય અને એમાં ક્યારેય કોઈ ચૂક થઈ જાય તો પણ તેઓ એ જ સ્નેહથી ઉત્તમભાઈને આવકારતાં હતાં. ડૉ. લેવિનને જુદા જુદા ઘણા શોખ હતા અને તેમાંનો એમનો એક શોખ એ ભારતીય કલાનો હતો. તેઓને ભારતીય કલાની રેખાસૃષ્ટિ ખૂબ ગમતી હતી. એ સમયે ઉત્તમભાઈ “ટોરેન્ટ'નાં કલામય કૅલેન્ડર એમને મોકલતા અને ડૉ. લેવિનને તે ખૂબ પસંદ પડતાં હતાં.
ઉત્તમભાઈના સ્વભાવમાં એવું કે કોઈ પણ વ્યક્તિ મદદ કરે તો એને એનું યોગ્ય વળતર ચૂકવવું જોઈએ. સંબંધના હિસાબે કોઈ સામાન્ય મદદ કરે તો ઠીક, 128
