________________
અકુંઠિત ભક્તિ એટલે શું ?
કુંઠા એટલે અવરોધ. અવરોધ વગરની ભક્તિ તે અકુંઠિત ભક્તિ.
અકુંઠિત ભક્તિ પ્રભુના પ્રસાદને અન્તસ્તરમાં લઈ જવાની એક પદ્ધતિનું નામ છે. તમારો વિચાર / ઈચ્છા ભળે તો ભક્તિમાં અવરોધ પેદા થાય. ન જોઈએ કોઈ જ અપેક્ષા.
અહીં તો છે ભક્તિ માટે ભક્તિ. કશા માટે ભક્તિ નહિ. મહોપાધ્યાય યશોવિજયજી યાદ આવે : ‘મુક્તિથી અધિક તુજ ભક્તિ મુજ મન-વસી, જેહસું સબળ પ્રતિબંધ લાગો; ચમક પાષાણ જિમ લોહને ખિંચશે, મુક્તિને સહજ તુજ ભક્તિ રાગો.'
સંત નાવમાં બેઠેલા. નાવમાં સહેજ કાણું પડ્યું. પાણી ધસારાબંધ અંદર આવવા લાગ્યું. સંત ચીપિયા વડે બીજું કાણું પાડવા મથે છે એ વખતે. લોકોને નવાઈ લાગી. લોકો પાણી ઉલેચે છે. સંત બહુ જ મોટા, પ્રભાવશાળી સંત હતા. એટલે એમને કોઈ કંઈ કહી રાકતું નથી.
ત્યાં તો હોડી કિનારા ભણી આવવા લાગી. સંતે કાણું પાડવાની પ્રક્રિયા બંધ કરી અને તેઓ લોકોની જોડે પાણી ઉલેચવા લાગ્યા.
લોકોને નવાઈ લાગી. પૂછ્યું ત્યારે સંતે કહ્યું કે જ્યારે નાવમાં કાણું પડ્યું ત્યારે મેં માન્યું કે પ્રભુની ઈચ્છા નાવને ડુબાડવાની છે. અને જો પ્રભુની ઈચ્છા આ હોય તો આપણે એને વધાવવી જોઈએ. પણ જ્યાં નાવ કિનારા તરફ આવવા લાગી ત્યારે મને લાગ્યું કે પ્રભુ આપણને બચાવવા ચાહે છે. ત્યારે પ્રભુની એ ઈચ્છાને પણ મેં વધાવી.
સમાધિ શતક | ૧૧૯
