________________
- આચાર્ય તુલસીના નેતૃત્વમાં તેરાપંથી સાધ્વીજીઓ પ્રગતિ અને શાસનસેવા કરી રહી છે. એ જ રીતે મૂર્તિપૂજક સંપ્રદાયની સાધ્વીજીઓ પણ અધિકાધિક શાસનસેવા કરવા સમર્થ થાઓ.
સાધુઓ કરતાં સાધ્વીઓની સંખ્યા વધુ છે. તેઓ બધી રીતે યોગ્ય બને તો વધુમાં ધર્મપ્રચાર અને શાસનસેવા થઈ શકે.
મૂર્તિપૂજક સંપ્રદાયમાં ખરતર ગચ્છ, પાશ્ર્વચન્દ્ર ગચ્છ અને અચલ ગચ્છની સાધ્વીઓ તો સ્વતંત્ર રીતે વ્યાખ્યાન આપે છે. તપાગચ્છમાં મહાન આચાર્ય વલ્લભસૂરિજીએ પોતાની આજ્ઞાવર્તી અને અન્ય ગચ્છની સાધ્વીઓને ઘણું પ્રોત્સાહન આપ્યું. તે પ્રમાણે અન્ય આચાર્ય અને મુનિગણ પણ સાધ્વીઓની મહાન શક્તિને વધુ ને વધુ લાભદાયી બનાવે. એમના શિક્ષણ માટે ઉત્તમ વ્યવસ્થા કરે. જેથી સાધ્વીઓ સારી લેખિકાઓ અને વક્તા તરીકે બહાર આવે.
સમાજને સ્ત્રી પણ બહુ આગળ લઈ જઈ શકે છે. બાળકોનો વિકાસ માતા ઉપર જ નિર્ભર હોય છે. આજે શ્રાવક અને શ્રાવિકાઓ ઉચ્ચ શિક્ષણ પ્રાપ્ત કરી રહ્યાં છે ત્યારે સાધ્વીઓને પણ અધિક યોગ્ય બનાવવાની આવશ્યકતા છે. નવા યુગની નવી સમસ્યાઓનું સમાધાન કરવાની શક્તિ આપણાં સાધ્વીજીઓમાં હોવી જોઇએ. એમના સર્વાંગી વિકાસ માટે પૂર્ણ સુવિધાઓ અને પ્રોત્સાહન આપવું જોઇએ.
વર્તમાન યુગમાં સ્ત્રી શક્તિનો વિકાસ કરી એનો યોગ્ય ઉપયોગ મહાત્મા ગાંધીજીએ કર્યો તેનાં પરિણામ આપણી સામે છે. આજે રાષ્ટ્રનાં વિવિધ સેવાક્ષેત્રોમાં સ્ત્રીઓ પ્રવૃત્ત છે. આચાર્ય વિનોબા ભાવેએ પણ કહ્યું છે, સ્ત્રીઓ દેશસેવા અને શાંતિ કાર્યમાં વિશેષ સફળ થઇ શકે છે, કારણ કે સેવા એમને ગળથૂથીમાં મળે છે. ઘરમાં તો તેઓ સેવા કરતી જ રહે છે. જો એમનો દ્રષ્ટિકોણ ઉદાર અને વિશાળ થઈ જાય તો દેશની સેવા અનેક રીતે - ઘણી સારી થઈ શકે.
વર્તમાન યુગ નવી અને જૂની વિચારધારાઓનો સંધિ યુગ છે. આપણે આપણી પરંપરાને સુરક્ષિત રાખી વર્તમાન યુગની વિશેષતાઓને અપનાવતા જવાનું છે. એમ નહીં કરીએ તો આપણે પાછળ રહી જઇશું, જમાનાને સાથ નહીં દઈ શકીએ તો ભાવિ પેઢીના નિમાર્ણમા આપણે અસફળ અને અયોગ્ય ઠરીશું. - પૂજય સાધ્વી શ્રી શીલવતીશ્રીજીનું જીવન આપણને ઘણી પ્રેરણા આપે છે. જે રીતે એમણે સ્થળે સ્થળે ફરીને પોતાની શિષ્યાઓના સહયોગથી વિશિષ્ટ ધર્મ પ્રચાર કર્યો અને પોતાની શિષ્યાઓને અધિકાધિક યોગ્ય બનવામાં સહયોગ આપ્યો. એ રીતે આપણે સૌ સાધ્વી સમાજના ઉત્થાનમાં પૂર્ણ સહયોગ આપીએ.
(“સેવા સમાજ સાપ્તાહિકના પૂ શીલવતીજી પુણ્ય સ્મૃતિ અંકમાંથી સાભાર)
મહત્તરા શ્રી મૃગાવતીશ્રીજી
૧૩૭.
