________________
॥ શ્રી આત્મવલ્લભ સદગુરુભ્યોનમ ॥
ધર્મીનષ્ઠ, દેવગુરુધર્મોપાસક, ગુરુ વલ્લભના પરમ ઉપાસક શ્રી શૈલેશભાઇ કોઠારી,આપ અઠવાડિયામાં બે સામાયિક, સ્વાધ્યાય, સાચન જરૂર કરશો. ધર્મકાર્યમાં આદર રાખશો. ત્રણે બાળકોને તથા બહેન પ્રતિભાને સાથે લઇને અઠવાડિયામાં એક વાર કોઇ પણ મંદિરે જશો. બાળકોમાં સંસ્કાર પડે. ધર્મભાવનામાં વૃધ્ધિ થાય. મહિનામાં એક વાર ભાયખલા પૂ. ગુરુદેવના સમાધિમંદિરે પણ જશો.
બાળકોની સાથે રાતે હમેશાં ૧૦-૧૫ મિનિટ બેસવું. તેઓને અભ્યાસની પ્રગતિ વિશે પૂછવું વળી બીજી કોઇ ફરિયાદ હોય તો સાંભળવી તેઓની સાથે મનોરંજન કરવું. બાળકો પ્રત્યે પિતાનું કર્તવ્ય પાલન ખૂબ જરૂરી છે. હજી નાનાં છે, બે વર્ષ આપનું સાંભળશે. માટે તેઓના મનની બધી વાતો જાણવી- સાંભળવી જરૂરી છે. બાની પાસે પણ ૫- ૧૦ મિનિટ બેસવું
CH
જેણે જિનવાણીનું અમૃતપાન કર્યું હોય તેને પછી ખારું પાણી ન જ ગમે. તે તરફ વધુ વળવાનો પ્રયત્ન કરશો, સાચું તે જ છે. ધર્મનું શરણ સાચું છે. આ અમૂલ્ય જીવન આધ્યાત્મિક ઉત્થાન માટે જ છે. આપનામાં જે સરળતા, ઉદારતા, બીજાનાં માટે ઘસાવું, વીતરાગ પ્રભુ પ્રત્યેની શ્રધ્ધા વગેરે ગુણો સરાહનીય છે. તે માટે મને માન છે.
ભાઇ, આપને જે શકિત સૂઝબૂઝ મળ્યાં છે. તેનો આપ રચનાત્મક શુભ કાર્યોમાં ઉપયોગ કરશો. પ્રભુએ આપને ઘણું ઘણું આપ્યું છે, પૂરી અનુકૂળતા છે. આવો રૂડો રે મઝાનો અવસર નહીં રે મળે !
લિ. સાધ્વી મૃગાવતીના સાદર ધર્મલાભ.
૪-૪-૧૯૭૬
પરમપૂજય, જીવનસાધક, લોકોપકારક સાધ્વીજી મહારાજ,
મારી તથા અમારા આખા કુટુંબની સાદર વંદના સાથે લખતાં ખૂબ જ આનંદ થાય છે કે, તારીખ પ્રમાણે આજે આપના ઉજજવળ, પવિત્ર અને યશનામી જીવનનાં ૫૦ વર્ષ પૂરાં થાય છે. અને આપ એકાવનમા વર્ષમાં મંગળ પ્રવેશ કરો છો. ત્યારે નમ્રતા, સરળતા, વિવેકશીલતા, કરુણાપરાયણતા અને સહૃદયતા આદિ આપના અનેકાનેક ગુણોનું તેમ જ જીવનસ્પર્શી વિદ્વતા, હૃદયસ્પર્શી વકતૃત્વકળા અને પ્રશાંત નિર્ભયતા આદિ અનેક શકિતઓનું સ્મરણ કરીને આપનું અંતરથી અભિવાદન તથા અભિનંદન કરીએ છીએ અને સમાજના ભલા માટે આપ આંતરિક શાંતિ, સમતા અને તંદુરસ્તીભર્યું દીર્ઘજીવન ભોગવીને અધિકાધિક યશના ભાગી બનો એવી પરમાત્માને પ્રાર્થના કરીએ છીએ.
ચાર અઠવાડિયાં પહેલાં આપના સુખવર્તીના સમાચાર શ્રી વાલાસુંદરલાલજીએ અહીં આપ્યા હતા. વિશેષમાં એમણે પણ જણાવ્યું હતું કે, આપ પૂજય આચાર્ય મહારાજનું સ્મારક રચવાના કર્મયોગમાં પૂર્ણ યોગથી લાગી ગયાં છો અને એમાં ઊંઘ તથા આરામને પણ વિસરી ગયાં છો.
લિ. રતિલાલ દીપચંદ દેસાઇની સાદર વંદના (અમદાવાદ)
૧૬૦
મહત્તરા શ્રી મૃગાવતીશ્રીજી
