Aatm Sadhnanana Amrut Anushthan

Author(s): Pravinchandra L Shah
Publisher: Jain Center of Connecticut

Page 3

અનુમોદના
અનંત ઉપકારી પરમાત્મા શ્રી વીતરાગ પ્રભુના શાસનમાં અનેક મહાત્મા પુરુષો થયા છે. ચૌદ પૂર્વધારી તથા દશ પૂર્વધારી એવા સુધર્માસ્વામી, જંબુસ્વામી ઇત્યાદિ અનેક ધર્મવીર પુરુષો થયા છે. છેલ્લા એક હજાર વર્ષના ગાળામાં કલિકાલસર્વજ્ઞ શ્રી હેમચંદ્રાચાર્ય તથા પૂજયપાદ હરિભદ્રસૂરિજી મહારાજ તથા મલયગિરિ મહારાજ સાહેબ આદિ અનેક ધર્મશાસ્ત્રો રચનારા તથા ટીકાગ્રંથો રચનારા ધર્મવીર પુરુષો થયા છે.
કલિયુગના પ્રભાવે ઘટતી જતી બુદ્ધિ અને ઘટતી જતી જ્ઞાનદશાવાળા કાળમાં પણ છેલ્લા ત્રણસો વર્ષ પહેલા નીચેના ચાર મહાત્મા પુરુષો ભક્તિયોગાચાર્યો થયા છે. ૧. પૂજ્ય શ્રી આનંદઘનજી મહારાજ સાહેબ ૨.પૂજ્ય ઉપાધ્યાય શ્રી યશોવિજયજી મહારાજ સાહેબ ૩. પૂજ્ય શ્રી મોહનવિજયજી મહારાજ સાહેબ ૪. પૂજ્ય શ્રી દેવચંદ્રજી મહારાજ સાહેબ
ઉપરોક્ત ચારે મહાત્મા લગભગ સત્તરમા સૈકામાં થયા છે. કોઇ આગળ અને કોઇક પાછળ, પણ આ અરસામાં આ મહાત્મા પુરુષો ગુજરાતમાં થયા છે. તેઓએ ચોવીશે તીર્થંકર પરમાત્માના ભક્તિભાવ સ્વરૂપે ચોવીશ-ચોવીશ સ્તવનો બનાવ્યા છે. જે અતિશય રસપ્રદ, ભક્તિયોગથી ભરપૂર, અધ્યાત્મ અને વૈરાગ્યરસથી છલોછલ ભરેલા, ગાતા-ગાતા ઘણો જ આત્મિય આનંદ ઉપજે એવા આ સ્તવનો બનાવ્યા છે. તે સર્વ સ્તવનોના અર્થ ભણવા જેવા, ગાવા જેવા અને કંઠસ્થ કરવા જેવા છે. ગાનાર સાધકનો આત્મા અવશ્ય કંઇક નવું અદ્દભૂત તત્ત્વ પ્રાપ્ત કરે જ તેવું દૈવત આ સ્તવનોમાં છે.
આત્મસાધનાના અમૃત અનુષ્ઠાન
આ સ્તવનોના અર્થ લખવાનો ઘણા વક્તાઓએ સારો એવો પ્રયત્ન કર્યો છે. ઘીના પ્રકાશિત થયેલા દીપકમાં જેમ એક ચમચી ઘી ઉમેરવામાં આવે તો દીપક લાંબો સમય પ્રકાશ આપતો જ રહે છે, તેમ પરમાત્માના ભક્તિરસથી લખેલા આ સ્તવનોના સરળ ગુજરાતી ભાષામાં અર્થો લખીને પ્રવીણભાઇએ અમેરિકામાં રહીને પણ જૈન સમાજને ભક્તિરસમાં દાખલ થવા આવું જ એક નાનકડું જ્ઞાન પ્રભાવનાનું ઉત્તમ કાર્ય કર્યું છે તે જાણીને ઘણો જ આનંદ થાય છે.
આ ચારે મહાત્માઓએ જે સ્તવનો બનાવ્યા છે તે ઘણા ગૂઢાર્થ અને આત્માની એકાકારતાની સાક્ષી સ્વરૂપ છે. તેમાંથી પણ કેટલાક સ્તવનો તો અતિશય આનંદકારી, આત્મતત્ત્વની સાધના આપનારા અને પરમાત્માની સાથે મીઠા-મધુરા બોલ સાથે સર્વથા એકાકાર થવા સ્વરૂપ છે. તેવા કેટલાક અણમોલ સ્તવનોના સરળ ભાષામાં અર્થ સહિત પંડિતવર્ય શ્રી પ્રવીણભાઇએ પરમાત્મા સાથે એકાકાર થઇને આ અથ લખ્યા છે. આ કાર્ય ઘણું જ અનુમોદનીય અને પ્રશંસનીય છે. વારંવાર આ વિષયનો અભ્યાસ કરવા માટે ઉચિત માર્ગદર્શન આપતું આ પુસ્તક છે.
સર્વે પણ આરાધક જીવોએ ઓછામાં ઓછું પાંચ વાર આ પુસ્તક મનન-ચિંતન-નિદિધ્યાસન કરવાપૂર્વક વાંચવા હું વિનંતી કરું છું.
આ પુસ્તક દ્વારા આપણે પણ વીતરાગ પરમાત્માની ભક્તિમાં લયલીન બનીને આત્મ કલ્યાણ સાધનારા બનીયે. જૈન શાસનમાં આવા પુસ્તકોનો અભ્યાસ વૃદ્ધિ પામે અને લેખકના ઉત્સાહને ઉત્તેજના મળે એ જ આશા સાથે...
એ-૬૦૨, પાર્શ્વદર્શન કોમ્લેક્ષ, નવયુગ કોલેજ સામે, રાંદેર રોડ, સુરત-૯ (ઇન્ડિયા) ફોન ઘર : ૦૨૬૧-૨૭૬૩૦૭૦ મો. ૯૮૯૮૩૩૦૮૩૫
ધીરલાલ ડાહ્યાલાલ મહેતા