________________
૨૭૮
પ્રકરણ : ૧૦ જિનમંદિર ઉપર સોનાનો રત્નજડીત કળશ આપણે પ્રભુને વધાવવા ચડાવીએ છીએ તેવું જ આ રત્નોથી ઝડેલા શબ્દોનો કળશ આ પુસ્તકનું હાર્દ અને જિનભક્તિનો મહિમા અલૌકિક રીતે સમજાવે છે તેથી તેનો ભાવાર્થ ખૂબ જ ધ્યાનથી સમજવા સૌને નમ્ર વિનંતિ છે. આ સ્તવન મુખપાઠ કરીને ચૈત્યવંદનમાં ફરી ફરી સ્તવના કરવાથી જેમ લોઢાને પારસમણીનો સ્પર્શ થતાં સોનું બની જાય છે, તેમ આવી સમજણપૂર્વકની જિનભક્તિથી આપણા આત્માના ઉપાદાનમાં ““ઉપાદાનકારણતા' પ્રગટે છે અને તે મુમુક્ષુ અવશ્ય સમાપત્તિધ્યાન વડે પૂર્ણ વીતરાગ દશા અને સિદ્ધિપદને પામે છે તેવી મોક્ષમાર્ગની સંપૂર્ણ સાધનાનો Complete Process આ ક્રમ ખૂબ જ સુંદર રીતે અત્રે શ્રી દેવચંદ્રજીએ પ્રગટ કર્યો છે.
ઉપરની પ્રથમ ગાથામાં સમજાવે છે કે, શ્રી અજિતવીર્ય તીર્થકર ભગવાન, વર્તમાનમાં પુષ્કરાર્ધના મહાવિદેહ ક્ષેત્રમાં વિચરી રહ્યા છે. જે મનમોહન અથવા મુમુક્ષુજનના મનને મોહ પમાડનારા છે, આનંદ આપનારા છે. વળી આગમ શાસ્ત્રો પ્રમાણે તીર્થંકર દેવ દરરોજ શા કલાકની દેશના (અઢી કલાકની ત્રણદેશનાઓ દરરોજ) નિરંતર પ્રકાશે છે તેથી “ભવિ બોધના” એટલે ભવ્ય જીવોને તત્ત્વનો બોધના દાતાર છે. વળી શ્રી તીર્થકર ભગવંતો, ગામથી ગામ ભગવાન મહાવીરની જેમ, વિચરતા હોય છે તેથી શ્રી અજિતવીર્ય જિનેશ્વર દેવ પણ જંગમ તીર્થ એટલે હાલતા ચાલતા સુરતરુ અથવા કલ્પવૃક્ષ સમાન છે. આવા દેવાધિદેવ જિનેશ્વર ભગવાનની જે સેવા ભક્તિ કરે તે ભવ્યજીવોને ખરેખર ધન્ય ધન્ય છે. કારણ કે જિનભક્તિથી તે ભવ્યજીવો અજ્ઞાનને ટાળી સમ્યકદર્શનથી માંડીને કેવળજ્ઞાનરૂપી સૂર્યને પામશે, એમ જિનઆગમો પ્રમાણ આપે છે.
આત્મસાધનાના અમૃત અનુષ્ઠાન
૨૭૯ જિનેશ્વરભગવાનની વાણી કેવી અનુપમ હોય છે તેનો સુંદર ભાવ શ્રી દેવચંદ્રજીના શાંતિનાથ ભગવાનના ૧૬મા સ્તવનમાં જોવા મળે છે :
વાણી ગુણ પાંત્રીસ અનોપમ, અવિસંવાદ સરૂપે રે, ભવદુઃખવારણ, શિવસુખકારણ, શુદ્ધો ધર્મ પ્રરૂપે રે. ભવિક જન હરખો રે, નિરખી શાંતિનિણંદ. (ગાથા ૩)
ભગવાનની વાણી પાંત્રીસ અતિશયોથી શોભતી હોય છે, દેવો, મનુષ્યો, તિર્યંચના જીવો સૌને પોત-પોતાની ભાષામાં સમજાય તેવી અતિશયયુક્ત તથા અવિસંવાદ એટલે પૂર્વાપર વિરોધ ન હોય, સર્વથા સત્ય જ હોય તેવી તથા ભવ દુઃખવારણ એટલે જન્મ-જરામરણાદિ દુ:ખોનો નાશ કરનારી અને અવશ્ય મોક્ષનું કારણ બને તેવી શુદ્ધ આત્મતત્ત્વને પ્રકાશનારી આ વાણી હોય છે !
આવા દેવાધિદેવ જિનેશ્વર ભગવાનના અનંત ગુણો – અનંતજ્ઞાન - અનંતદર્શન આદિ ગુણોના બહુમાનપૂર્વકની ભક્તિથી ઉલ્લસિત થતો જીવ શું પામે છે ? તેનું સુંદર વર્ણન બીજી ગાથામાં પ્રસ્તુત સ્તવનમાં પ્રકાશે છે :
જિનગુણ અમૃતપાનથી રે, અમૃત ક્રિયા સુપસાય રે, અમૃત ક્રિયા અનુષ્ઠાનથી રે, આતમ અમૃત થાય રે. (૨)
આ સ્તવનમાં ર થી ૯ ગાથા સુધીમાં એટલો સુંદર જિનભક્તિનો મહિમા અને સાધનાનો ગુરુગમ ભરેલો છે કે, આ ભાવાર્થ લખતાં લખતાં મારા આત્માના આનંદનો પાર નથી ! શ્રી દેવચંદ્રજીએ પંચમકાળમાં જિનભક્તિના જાણે અમૃત વરસાવ્યા છે ! હજારો શાસ્ત્રોનો જાણે નિચોડ દરેક ગાથામાં સમાવી દીધો છે અને બહુ મોટો ઉપકાર જૈન સમાજ પર કર્યો છે !!! માટે ધ્યાનથી સમજીએ.
