Mulshuddhi Prakaranam Part 01

Author(s): Dharmdhurandharsuri, Amrutlal Bhojak
Publisher: Shrutnidhi

Page 306

सङ्गमकाख्यानकम्
२८३
गोभद्दइन्भभज्जाए भद्दागब्भे समागओ । सालीछित्तं सुनिप्पण्णं सुमिणे सा नियच्छिउं ।।२१।। विबुद्धा नियदइयस्स सुमुही सा पसाहए । तेणावि पुत्तजम्मेणं वरेणं साऽहिनंदिया ।।२२।। तं सोउं हट्टतुट्ठा सा तओ एवं पयंपई । 'देवाईणं पसाएणं होउ एवमिमं पहू !' ।।२३।। एवं च साऽहिनंदित्ता सुहेणं गब्भमुव्वहे । पुण्णेसु दोसु मासेसु उप्पण्णो तीए दोहलो ।।२४।। जहा दाणाइसद्धम्मकम्माइं जइ करेमहं । पूरिए सेट्टिणा तम्मि सुहं गब्भो पवडिओ ।।२५।। पत्ते पसूइकालम्मि पसूया सा सुहे दिणे । पुत्तं सुरकुमारं व लोयणाणंददायगं ।।२६।। तओ वद्धाविओ सेट्ठी चेडियाहिं दुयं दुयं । दाऊण ताण सो दाणं सहत्थेणं च मत्थयं ।।२७।। धा(धो?)विऊणं पुणो तुट्ठो पवत्तेइ महूसवं । वज्जिराउज्जसंसद्दभरिज्जंतनहंगणं ।।२८।। तुटुंततारहारोहमुत्ताहलकयच्चणं । सिंगारफारनारीहि समाढत्तं सुनच्चणं ।।२९।। दिज्जंतदाणसंघायं छत्तकोलाहलाउलं । अच्छेरयसयाइण्णं विम्हावियमहायणं ।।३०।। एमाइबहुरिद्धीए वत्ते तम्मि महूसवे । संपत्ते बारसाहम्मि सम्माणित्ता नियल्लए ।।३१।। सुमिणस्साऽणुसारेण सेट्ठी बंधुसमण्णिओ । ठवेइ सालिभद्दो त्ति गुण्णं पुत्तस्स नामयं ।।३२।। एवं पवड्ढमाणो सो धाईपंचगलालिओ । किंचूणअट्ठवरिसो, कला सव्वा उ गाहिओ ।।३३।। संपत्तो जोव्वणं तत्तो रूवेणं जियवम्महो । लावण्णवण्णसंपण्णो कामिणीयणवल्लहो ।।३४।। रमंतो सह मित्तेहिं लीलाए जाव अच्छइ । ताव तत्थेव वत्थव्वा बत्तीसं वरसेट्ठिणो ।।३५।। रईसारिच्छरूयाओ घेत्तुं कण्णाओ आगया । बत्तीसं सव्वसाराओ इब्भगोभद्दमंदिरे ।।३६ ।। भणंति ‘जइ विनेयाओ जोग्गाओ तुह सुयस्स उ । मण्णऊ तो वि एयाओ काउं अम्हाणऽणुग्गह' ।३७/ हट्टतुट्ठो तओ सेट्ठी पसत्थे तिहिवासरे । महाविच्छड्डरिद्धीए पाणिग्गहणं करावए ।।३८।। उत्तमे भवणाभोए समारूढो तओ इमो । देवो दोगुंदुगो चेव भुंजए भोगवित्थरं ।।३९।। पुण्णाणुभावओ तस्स माया-वित्ताणि सव्वहिं । पवत्तयंति अक्खूणं एवं काले गलंतए ।।४०।। गोभद्दो गिण्हए दिक्खं सिरिवीरजिणंतिए । चिच्चा धणाइयं सव्वं तओ पालित्तु संजमं ।।४१ ।। भत्तं पच्चक्खिउं काले दिव्वकंतिधरो सुरो । उप्पण्णो देवलोगम्मि उवओगं पउंजई ।।४२।। द₹णं ओहिनाणेण नियपुत्तसिणेहओ । तप्पुण्णावज्जिओ तत्थ सुरो सिग्धं समागओ ।।४३।। वत्था-ऽलंकार-मल्लाई सव्वं दिव्वं पणामई । सभारियस्स निच्चं पि दाणप्फलवसीकओ ।।४४।। जं च माणुस्सयं कज्जं भद्दा तं से पसाहई । निच्तिो सव्वठाणेसु एवं भोगे पभुंजई ।।४५।। अण्णया वणिया केई घेत्तुं रयणकंबले । उवट्ठिया नरिंदस्स सेणियस्स सहंगणे ।।४६।। 'महग्घाणि' त्ति काऊण राया जाव न गिण्हई । ताव तत्तो विणिग्गंतुं वणिणो भद्दागिहं गया ।।४७।। १. सं० वा सु० च्चक्खियं ॥ २. ला० °ल्लाइ ॥