Mulshuddhi Prakaranam Part 01

Author(s): Dharmdhurandharsuri, Amrutlal Bhojak
Publisher: Shrutnidhi

Page 307

२८४
सविवरण मूलशुद्धि प्रकरण चतुर्थ स्थानके
‘सा वि ते कंबले सव्वे मोल्लं दाऊण गिण्हई । वणिणो वि नियावासे गया, एत्थंतरम्मि य ।।४८। विण्णत्तो सेणिओराया चेल्लणाए जहा मम । अट्ठाए कंबलं एवं महामोल्लं पि घेप्पउ' ।।४९।। वारंवारं भणंतीए सद्दिया वणिणो तओ । भणिया य कंबलं एवं अम्हं मोल्लेण देह भो!' ।।५०।। वुत्तं तेहिं जहा देव ! दिण्णा सव्वे वि कंबला । भद्दाए इब्भभज्जाए' तओ रण्णा तदंतिए ।।५१ ।। गोरव्वो पेसिओ एक्को भद्दो नियमहंतओ । जहा ‘आणेहि मोल्लेण, भद्दापासाउ कंबलं' ।।५२।। तेणावि जंपिया गंतुं ‘भद्दे ! राया विमग्गई । जहाकिइयमोल्लेण एवं रयणकंबलं' ।।५३।। भद्दा पयंपई ‘भद्द ! ते मे फालित्तु कंबले । सालिभद्दस्स भज्जाणं पायलूहणगा कया ।।५४ ।। ता विण्णवेहि रायाणं जइ जुण्णेहि सिज्झई । कज्जं तो लेह सेच्छाए, जओ अण्णं न विजई। ५५ । तं तेण राइणो सव्वं गंतुं जाव निवेइयं । चेल्लणा ता पयंपेई 'देव ! पेच्छसु अंतरं' ।।५६।।
अम्हाणं वणियाणं च' इई वुत्तो नराहिवो । कोऊहलेण अप्फुण्णो एवं मंतिं पभासई ।।५७।। 'भणेहि भद्द ! तो भद्दे जहा-अम्हाण कोउगं । ता पेसेहि इहं भद्दे ! सालिभदं खणंतरं' ।।५८।। तेणावि जाव सा वुत्ता ताव भद्दा ससंभमा । उठ्ठित्ता राइणो पासे सयमेव समागया ।।५९।। विण्णवेई जहा देव ! न मे पुत्तो कयाइ वि । पेच्छए चंद-सूरा ता चिट्ठउ बहिनिग्गमं ।।६० ।। ता घरागमणेणऽम्ह पसाओ देव ! कीरउ' । कोऊहलेण रण्णा वि तं तहेवाऽणुमण्णियं ।।६१।। ‘पसाओ' त्ति भणंतीए पुणो भद्दाए जंपियं । ‘खणमेक्कं विमालेहि जावाऽऽगच्छामऽहं पुणो' ।।६२। गेहं गंतूण कारेइ हट्टसोहं निरंतरं । सगेहदारदेसाओ सीहद्दारं निवस्स जा ।।६३।। नाणापेच्छणयाइण्णं तं काऊणं तओ निवं । विण्णवेइ 'गिहं गंतुं पसाओ देव ! कीरउ' ।।६४।।
तत्तो राया तहिं सिग्घं सव्वोरोहसमण्णिओ । पेच्छंतो पेच्छणे दिव्वे सालिभद्दगिहं गओ ।।६५।। तं च के सरिसं ?
सुरत्तहेमभित्तियं, विचित्तचित्तचित्तियं । माणिक्कबद्धभूतलं, विणिंततेयमंडलं ।।६।। सुभंगसालभंजियं, विपंचिवससिंजियं । सुवण्णथंभसंगयं, पणच्चमाणरंगयं ।।६७।। ललंतमुत्तमालयं, रणंततारतालयं । फुरंतवारतोरणं, मणुस्ससोक्खकारणं ।।६८।। उत्तुंगसत्तभूमियं सम्मट्टघट्टदूमियं । कीरंतवत्थसोहयं, वज्जंतमद्दलोहयं ।।६९।। एरिसं तं नियच्छंतो विहियाणेयमंगलो । पविठ्ठो तत्थ सो राया विम्हउप्फुल्ललोयणो ।।७०।। कमसो जाव आरूढो चउत्थं भूमिगातलं । सव्वप्पहाणए तत्थ आसणम्मि निवेसिओ ।।७१।। वत्था-ऽलंकारमाईयं दाउं भद्दा तैयंतओ । सालिभद्दसयासम्मि सत्तमं भूमिगं गया ।।७।।
१. ला० ता ॥ २. ला० गेहे ॥ ३. सं० वा० सु० गिहे ॥ ४. सं० वा० सु० तयं ॥ ५. ला० तहिं ।