Jambuchariyam

Author(s): Jinvijay, Chandanbalashree
Publisher: Bhadrankar Prakashan

Page 256

सोलसमो उद्देसओ
२२३ तओ इमं च भणियाहिं अवलोइयं ताहिं तं जिणभवणं । केरिसं दिटुं च ?अवि य- "जोइंदनीलमणिनियरजालकुवलयकओवयारं व ।
विहुमलयजालेहिं संझाराओं व्व तं दिटुं ॥४००॥ मुत्ताहलनियरेहिं नज्जइ गयणं व तारयाइन्नं । आयंबकणयतेएण बालसूरो व्व दिप्पंतं ॥४०१॥ नज्जइ ससलंछं पिव मरगमणि[ सिय? ]मयूहपडलेहिं । आलंबियवरमुत्तावलीहिं धारानिहायं व ॥४०२॥ सुद्धफलिहभित्तीहि य निरावलंबं व संठियं गयणे । जणि उल्लोचं नज्जइ बहुरयणमिलंतकिरणेहिं" ॥४०३॥ एवं पेच्छंताई काऊण पयाहिणं च तिक्खुत्तं । पणिवइऊण जिणिदं रइया पूया जिणिंदाणं ॥४०४॥ "कप्पूरागरुपूरो दट्ठो(ड्डो) य जिणिंदयाण भत्तीए ।
भत्तीसु विरइयाओ कत्थूरियबहलचच्चाओ ॥४०५॥ कुंकुमजलेण धोयं कोट्टिमवीढं च दासचेडीहिं ।
परिमलमिलंतमहुयरदिन्ना कुसुमोवयारा य'' ॥४०६॥ तओ एवं च निम्मविए सयलपूओवयाराइए करणीए विरइयकरकमलंजलिउडो जंबुकुमारो सह जायाहिं भयवं वद्धमाणजिणयंदभवणगुरुं एवं थुणिउं समाढत्तो
"भवभयपणासणसहं जिणिंद ! पणमामि तुम्ह पयकमलं ।
अजलामलामलाणं सुपबुद्धं कंटयविहीणं ॥४०७॥ पणयस्स देसु जयगुरु ! कह वि हु पसिऊण चरिमजिणयंद ! ।
नियपयकमले विमले भसलत्तं लंपडमणस्स" ॥४०८॥ तस्स य समकालमेव भणियं करकमलंजलिउडाहिं जिणसंथवंताहिं वहूहि । कह?अवि य- "तुम्ह चलणारविंदे केवलमयरंदबहललुद्धाओ ।
जिणवर ! भवभीयाओ लीणाओ महुयरीओ व्व ॥४०९॥