Jambuchariyam

Author(s): Jinvijay, Chandanbalashree
Publisher: Bhadrankar Prakashan

Page 276

२४३
सोलसमो उद्देसओ
ता उवइससु जगुत्तम ! जमेत्थमम्हेहिं होइ कायव्वं ।
भुवणुद्धरणसमत्थे संपत्ते तुम्ह पयकमले" ॥६४१।। तओ इमं च भणमाणा सव्वे वि समकालमेव सुरीसरपमुहा जयजयरवाऊरमाणा(ण)सयलदिसिविवरंतरालववत्थियसयलजंतुयण किं किं ति'संजणियनिययभावावन्नसमाउलमाणसुत्तत्थभयविहलवेविरतणुसुरासुरनरीसरकिन्नरोरगाइणो देवमणुयविसेसा पहरिसुद्दामपसरंतहिययभिन्नरोमायमाणपयडिउ[भिन्नबहलरोमंचकंचुइयसरीरा सयललक्खणोववेयविमलपयकमलजुयले पणिवइया । तओ भववया वि जयगुरुणा सयलजयजंतुहिययाणंदयारिणा विमलदसणावलीजुइपडिप्पहामुज्जोइयभुवणयलेण सजलजलजलहरुद्दामनिनाइणा भणियं जंबूसामिकेवलिणा-'भो ! भो ! मणुयासुरदेवदाणवगणा निसुणह, तावेत्थ जिणेहिं भगवंतेहिं वीयरागेहिं सव्वन्नूहि सव्वदरिसीहि सयलजयजंतुपरमहिययब्भुज्जएहिं पणीयस्स परमधम्मस्स पहाणोवएसो' । अवि य- चारित्तनाणदंसणसुहभावसमुज्जयस्स जीवस्स ।
उवएसो उ जिणाणं रोव(य)इ बहुखवियकम्मस्स ॥६४२॥ दुक्खाहिणंदिणो पुण अहवा जीवस्स गरुयकम्मस्स । मणयं पि न होइ मणे जिणिंदवयणस्स सब्भावो ॥६४३॥ सम्मइंसणनाणं चारित्तं जेण मोक्खवरमग्गा ।
एएसि विवरीओ संसारपहो अभव्वाणं ॥६४४॥ जओ जिणवयणं
"सम्मइंसणसुद्धं जो नाणं विरइमेव पावेइ । दुक्खनिमित्तं च इमो तेण सुलद्धो हवइ जम्मो ॥६४५॥ सम्मत्तविरहिया पुण अविरबहुलाण नाणहीणाणं । लद्धो वि होइ विहलो मणुयभवो अह इमो तेसिं ॥६४६॥ तुम्हेत्थ पुण सुलद्धो एस भवो जेण जिणमयपवन्ना । सम्मत्ताइगुणजुया अरिहा उवएसदाणस्स ॥६४७॥ पाणवहालियविरईअदत्तमेहुणपरिग्गहाणं च । एसो परमुवएसो जिणपन्नत्तो समासेणं ॥६४८॥