________________
જૈન સંઘમાં પૂજ્યશ્રીની પ્રસિદ્ધિ વિદ્વાન, સંશોધક, દાર્શનિક તરીકેની વધુ છે આ પુસ્તક વાંચનથી ખ્યાલ આવશે...પૂજ્યશ્રીમાં સરળતા, નમ્રતા, નિખાલસતા, પ્રભુભક્તિ, ગુરુસેવા, શિષ્યવાત્સલ્ય, સાધર્મિકભક્તિ, જીવદયા, ઔચિત્યપાલન જેવા અનેક ગુણો પણ ટોચકક્ષાના હતા. એ અપેક્ષાએ આ પુસ્તકનું નામ તો ‘ગુણ સાગર’ જ રાખવું પડે... તેમ છતાં શ્રુતજ્ઞાન પ્રત્યેની તીવ્રભક્તિથી એમના જીવનમાં ઉપર બતાવેલા અનેક ગુણોનો વૈભવ વિસ્તર્યો, માટે આ પુસ્તકનું નામ શ્રુતસાગર રાખેલ છે.
એક વાત ફરીથી રિપિટ કરું છું... આ પુસ્તકથી પૂજ્યશ્રીના જીવનને સંપૂર્ણ ન્યાય આપી શકાય જ નહિ, તે હું જાણું છું. તેમ છતાં સાડાત્રણ વર્ષનો ગાળો થવા છતાં પૂજ્યશ્રીના જીવનવૈભવને બહાર પાડતું કોઇ પ્રકાશન નહિ દેખાતા મારી ધીરજ ન રહી. હવે વધુ વિલંબ થાય તે પાલવે તેમ ન હતું. એથી અનેક વિદ્વન્દ્વર્ય ગુરુભગવંતો પૂજ્યશ્રી ઉપર પ્રકાશ પાથરી શકે તેમ હોવા છતાં ‘જે મળ્યું તે સોનાનું' એ ન્યાયે જેટલા લેખો મળ્યા તેનું સંકલન કરીને આ પુસ્તક જૈન સંઘની સમક્ષ રજુ કર્યું છે. ભવિષ્યમાં પૂજ્યશ્રીના જીવનવૈભવને પ્રકાશિત કરતું સર્વતોમુખી પ્રકાશન બહાર પડે એવી શાસનદેવનેપ્રાર્થના.
અત્યારે એટલું જ કહીશ...
યહ તો સિર્ફ ઝાંખી હૈ, બડા પ્રકાશન અભી બાકી હૈ।
અને વાચકો પણ આ પુસ્તક વાંચ્યા પછી એટલું જરૂર બોલી ઉઠશેઃ શો-રુમમેં ઇતના તો ગોડાઉનમેં કિતના?
