________________
(૧૪) પર્યુષણ પર્વાધિરાજની પવિત્ર પ્રસાદી
પત્રાંક -૧
ભાવના ભવ નાશિની” પ્રિય ચેતન,
સપ્રેમ ધર્મલાભ
પ્રાણીમાત્ર પ્રત્યે પવિત્ર પ્રેમપૂર્ણ પ્રવર્તન કરવાનો પાવનકારી પયગામ લઇને પર્વાધિરાજ શ્રી પર્યુષણનું પુનીત પદાર્પણ થયું છે. ત્યારે કંઇક પ્રેરણાનું પાથેય પૂરું પાડવા માટેની તારી પ્રેમળ વિનંતિથી પ્રેરાઈને આ કલમ ચલાવવાનો પ્રારંભ કરું છું. તેમાં જે કાંઇ સારું લખાચ તે શ્રી દેવ-ગુર તથા અનેક મહાત્માઓની અસીમ કૃપા પ્રસાદી સમજવી. જે કાંઇ ઉણપ હોય તેને માટે મારી છદ્મસ્થદશા જવાબદાર હોઇ તું હંસની માફક સાર ગ્રહણ કરવા પ્રયત્ન કરજે. તને યોગ્ય લાગે તો આ પત્રશ્રેણિ તારા મિત્રવૃંદને પણ ખુશીથી વંચાવજે.
ચેતન! તને ખબર હશે જ કે શ્રી પર્યુષણ મહાપર્વનું પ્રાણરૂપ મુખ્ય કર્તવ્ય હોય તો તે“ક્ષમાપના”નું આદાન-પ્રદાન કરવાનું છે.
“ક્ષમાપના”ની જરૂરીયાત ક્યારે ઊભી થાય છે કે જ્યારે કોઇપણ જીવ સાથે છદ્મસ્થપણાને કારણે મૈત્રી ભાવનો સંબંધ ખંડિત થાય છે. બે અંતર વચ્ચે અંતર પડી જાય છે ત્યારે તેને પુનઃ જોડવા માટે ક્ષમાપના રૂપી ફેવીકોલની મુખ્યત્વે જરૂર પડતી હોય છે.
એટલે ખરેખર તો પ્રાણીમાત્ર પ્રત્યે અને તેમાંય ખાસ કરીને આપણા સંપર્કમાં આવતા જીવો પ્રત્યે એવો નિઃસ્વાર્થ પ્રેમભાવ કેળવવો જોઇએ કે જેથી કોઈપણ જીવ સાથે આપણો મૈત્રીભાવ કદાપિખંડિત ન થાય.
શ્રી જિનશાસનમાં જીવમૈત્રી ઉપર ખૂબજ ભાર મૂકવામાં આવ્યો છે. ૧૪૪૪ ગ્રંથપ્રણેતા શ્રી હરિભદ્રસૂરિજી મહારાજ “ધર્મબિંદુ” ગ્રંથના પ્રારંભમાં ધર્મની વ્યાખ્યા કરતાં જણાવે છે કે “રાગ-દ્વેષ”વિજેતા એવા શ્રી જિનેશ્વર ભગવંતોની આજ્ઞા મુજબ મૈત્રી આદિ ભાવોથી યુક્ત જે અનુષ્ઠાન કરાયતે ધર્મ કહેવાય છે.
મૈત્રી આદિ ભાવોથી ભાવિત થયા વિના કરાતી તમામ ધર્મક્રિયાઓ મીઠા વગરની રસોઈ જેવી નીરસ હોઇ આત્માને આહલાદ પમાડી શક્તિ નથી. જીવનું ભવભ્રમણ સીમિત બનાવી શક્તિ નથી.
* 64 6
