________________
સમસ્ત જીવરાશિ પ્રત્યે આવો નિર્મળ મૈત્રીભાવ એજ સાચી સાધુતાનું મુખ્ય લક્ષણ છે.
એક પણ જીવ સાથે લેશમાત્ર વૈર વિરોધ ન હોય, મનદુઃખ ન હોય, બદલો લેવાની વૃત્તિ ન હોય પરંતુ તમામ જીવો પ્રત્યે બહુમાનનો ભાવ (Reverence For Life) હોય, જીવનમાત્ર માં શિવના દર્શનનો ભાવ હોય, આપણા સંપર્કમાં આવતા તમામ જીવોનું નિરપવાદપણે ભલું જ ઇચ્છાતું હોય, બધાને નિઃસ્વાર્થ ભાવે સહાય કરવાની જ વૃત્તિ-પ્રવૃત્તિ હોય એવી અંતઃકરણની ઉમદા સ્થિતિની કલ્પનામાત્ર પણ કેટલી આહ્લાદ જનક લાગે છે. તો પછી જ્યારે ખરેખર એવી વૃત્તિ સહજપણે આત્મસાત્ થાય ત્યારે કેવો અદ્ભુત આનંદ અનુભવાતો હશે તેની ત્રિરાશિ
માંડવી રહી!!!
મહાત્મા ગાંધીજીએ ભારતવાસીઓની રોટી, કપડા, મકાનની ચિંતા કરી તો લોકોએ તેમને બહુમાનપૂર્વક “રાષ્ટ્રપિતા” જેવા માનવંતા બિરુદથી નવાજ્યા. તો જે આત્મા ત્રણે લોકના સઘળાય જીવોને સર્વ દુઃખોથી સદાને માટે સર્વથા છોડાવીને શાશ્વત એવા અનંત, અક્ષય આત્મિક સુખને પમાડવાનો સાચો રાહ દેખાડવા માટે રાજપાટના સઘળાચ ભૌતિક સુખોનો પરિત્યાગ કરીને જંગલ વિગેરેમાં અનેક પરિષહો પ્રકારના ઉપસર્ગો કષ્ટોને સમતાપૂર્વક સહન કરીને મેળવેલ કેવલજ્ઞાનના પ્રકાશ દ્વારા જગતના જીવોને પરમ મુક્તિનો રાહ ચીંધે એવા આત્મા (તીર્થંકર પરમાત્મા) ના માતાની કુક્ષિમાં અવતરણ કે જન્મ આદિ પ્રસંગોમાં સમસ્ત પ્રકૃતિ આનંદ વિભોર બનીને અનેક પ્રકારે તેમનું બહુમાન કરે, ૫૬ દિક્કુમારિકાઓના તથા ૬૪ ઇન્દ્રોના સિંહાસન ડોલાયમાન થતાં સૂતિકા કર્મ તથા જન્મ મહોત્સવ ઉજવે, સાતેય નરક સહિત ૧૪ રાજલોકમાં અજવાળા પથરાય, નારકી જીવો તથા એકેન્દ્રિય જીવો પણ શાતાનો અનુભવ કરે તથા એ પ્રભુ કેવલજ્ઞાન પામીને વિચરતા હોય ત્યારે કાંટા પણ ઊંધા વળે, પક્ષિઓ પણ પ્રદક્ષિણા આપીને નમસ્કાર કરે, વૃક્ષો પણ ઝુકી ઝુકીને પ્રણામ કરે, પવન પણ અનુકૂળ વાય, છએ ઋતુઓ પણ પોતપોતાના ફૂલફળ દ્વારા પ્રભુની પર્યાપાસના કરે, સાપ અને નોળિયા વિગેરે જન્મજાત વૈરભાવવાળા પ્રાણીઓ પણ પરસ્પર વૈરભાવ ભૂલીને મિત્રભાવે સાથે બેસીને પ્રભુની દેશના સાંભળે, આવા આવા અનેક અતિશયો દ્વારા સમસ્ત પ્રકૃતિ તેમને “તીર્થંકર પરમાત્મા” તરીકે નવાજીને તેમની અનન્યભાવે પર્યુપાસના કરે તેમાં શી નવાઇ?...
-
-
68 888
