Book Title: Naykarnika
Author(s): Fattehchand K Lalan, Mohanlal D Desai
Publisher: Shardaben Chimanbhai Educational Research Institute
View full book text
________________
ઉપોદ્ઘાત
૧૫
જૈનવિદ્વાનોનું છે. પ્રત્યેક નયને પોતાનું કર્તવ્ય સમજાવી, બીજા નયના અનુમોદક બનાવવાની જોખમદારી સર્વનયને સંપૂર્ણ માનનારા શ્રી જિનદર્શન પર નથી તો તે કોના પર છે? નયજ્ઞાનવિશારદ જૈનોએ મહાન સર્વધર્મપરિષદ બોલાવી પોતાનું તેઓની સાથેનું અવિરુદ્ધપણું અનુક્રમે સાતે નયપૂર્વક ઉદાર ઉપદેશ આપી જાહેર કરવું ઘટે છે. એટલું જ નહિ પરંતુ તેઓ જે સ્થાને હોય તેના કરતાં ઉચ્ચ સ્થાનના અનુરાગી તેઓને કરવા જોઈએ. સરિતા સરખા તે નય-દર્શનોમાં જળ વધતાં વધતાં તેઓ પોતાની મેળે જ સમુદ્ર સરખા જિનદર્શનમાં ભળશે. પ્રથમ એવો સામાન્ય ઉપદેશ હવે કરવો જોઈએ છે કે જેથી સર્વ નાયરૂપી આજ્ઞાંકિત રાજાઓને પોતાના કર્તવ્યનું સ્પષ્ટ અને વિશેષ ભાન થાય તથા તેમના બીજા સહયોગી બધુઓની સાથે એકરાગતા સમજાવાય. આમ કરવાથી જગતમાં ધર્મને અંગે પ્રવર્તતો વિરોધભાવ ઘણો ભાગે દૂર થયા વિના કેમ રહે? માનનીય જૈન બાંધવો ! અન્યથા માર્ગે ભ્રમણ કરતાં તમારા માનવબાંધવોની તમને કરુણા નથી ઊપજતી ? તમારું સાતે નયનું જ્ઞાન ધર્મોમાં – માનવોમાં વિરોધ જગાડવાને છે કે વિરોધ શાંત કરવાને ? ઠેષ જગાડવાને માટે છે કે શાંતિ લાવવા માટે છે? સમભાવ રચવા માટે છે કે અભાવ પરસ્પર વધારવા માટે છે ? માટે દયાના સ્વરૂપરૂપ શ્રી વીરપ્રભુએ જગતના નિબિડ અંધકારને ભેદી જૈનનો તેજ:પુંજ પ્રકટાવવાની કરેલી આજ્ઞાપાલન કરવાની ભાવના તમને રહેલી હોય તથા દુનિયાના સર્વ લોકોને ધર્મ પમાડવાની જવાબદારી તમે સમજી શકતા હો તો એક વાર તે ઉદેશના સાધન માટે પ્રવૃત્ત થાઓ. તમે એ કામ નહીં સાધી શકો એમ માની લેવાની કશી જરૂર નથી. જગતમાં જ્યાં જુઓ ત્યાં જૈનધર્મ જ પ્રવર્તે છે, એવું જગતના અંતરમાં તમને દેખાતાં જ વિવિધ નામે પ્રવર્તતા ધર્મોને શ્રી જિનશાસનરૂપ સમ્રાટની સેવામાં સહેલાઈથી ધર્મ સ્થાપી શકશો. આથી સર્વ ધર્મોમાં સુસંપ જાગ્રત થશે. જૈનધર્મનું સર્વોપરીપણું કે જે વચનમાં જ રહ્યું છે, તે તદુપરાંત ભૂમંડળના જનોમાં વિશેષ સમજાશે. વળી તેથી તેઓ અવશ્યકલ્યાણ સાધવામાં ઉજમાળ થશે, એટલું જ નહિ પરંતુ શ્રી જિનશાસનના શાંતિમય સામ્રાજ્યની છાયામાં પદાર્થોનું સ્વરૂપ તથા વિરૂપ વિચારવા એકત્ર થઈ શકશે.
