________________
એમને પારણાનું નિમંત્રણ આપ્યું. પણ આ નિમંત્રણ જ જાણે પર વેરને નિમંત્રવાનું હતું. એથી તપસ્વીના પારણાના દિવસો
ગણતા રહીને એમની પ્રતીક્ષા કરતા રાજવી બરાબર પારણાના દિવસે જ ગંભીર માંદગીમાં પટકાઈ પડ્યા. બીમારીની ધાંધલ-ધમાલમાં તપસ્વીના પારણાની વાત સૌ કોઈ સાવ જ વિસરી ગયા.
રાજમહેલમાં રાજવીની બીમારી ગંભીરતા અને ગમગીની સરજી રહી હતી. બરાબર આ ટાણે મધ્યાહે જ તપસ્વી યેનક ભિક્ષાં દેહિ'ની અહાલેક સાથે રાજમહેલના આંગણે આવી ઊભા. પણ જ્યાં રાજવી બીમારીમાં પટકાયા હોય, ત્યાં તપસ્વીનો ભાવ પણ કોણ પૂછે ? થોડીઘણી પ્રતીક્ષા બાદ ભિક્ષાની સંભાવના ન જણાતા તપસ્વી યેનક એ જ પ્રસન્નતા સાથે પાછા ફર્યા અને બીજા મહિનાના ઉપવાસની પ્રતિજ્ઞા સ્વીકારીને ધૂણી ધખાવીને બેસી ગયા. મહિના પછી પણ રાજભવનના આંગણે તપસ્વીનું ભિક્ષાપાત્ર ખાલી જ રહ્યું. આ સમાચારે એમના શિષ્યવર્ગમાં સન્નાટો બોલાવી લીધો. આ અંગે કોઈ વધુ વિચારે, એ પૂર્વે તો રાજવી તરફથી મંત્રીશ્વરની સવારી આવી ઊભી.
મધ્યાહ્ન પછી કંઈક તબિયત સુધરતાં જ રાજવીને પારણાના દિવસની યાદ આવી, ને એમનું હૈયું પસ્તાવાથી ભરાઈ ગયું. પૂછપરછ કરતાં જાણવા મળ્યું કે, એક તપસ્વી આંગણે આવીને થોડી ઘડીઓ પૂર્વે જ ચાલ્યા ગયા ! આ ગંભીર ભૂલની ક્ષમા યાચવા માટે જવાની રાજવીએ પોતે તૈયારી દાખવી, પણ તબિયતની ગંભીરતા જોઈને મંત્રીશ્વરે કહ્યું : રાજવી! અત્યારે આપના વતી હું ક્ષમા યાચી આવીશ, આપ પછી પધારી શકો છો.
6 | જૈનશાસનના જ્યોતિર્ધરો ભાગ-૧
