Jain Darshan Praveshak

Author(s): Vairagyarativijay
Publisher: Pravachan Prakashan

Page 57

जैनदर्शनप्रवेशकः दो पुण नया भगवया दव्वट्ठिअपज्जवट्ठिआ निअया । एत्तो अ गुणविसेसे गुणट्ठिअनओ वि जुज्जंतो ॥१०७॥ जं च पुण अरहया तेसु तेसु सुत्तेसु गोअमाईणं । पज्जवसण्णा निअमा वागरिआ तेण पज्जाया ॥१०८॥ परिगमणं पज्जाओ अणेगकरणं गुणो त्ति एगत्था । तह वि न गुणो त्ति भणइ पज्जवनयदेसणा जम्हा ॥१०९।। जंपंति अत्थि समए एगगुणो दसगुणो अणंतगुणो । रूवाईपरिणामो भणइ तम्हा गुणविसेसो ॥११०॥ गुणसद्दमंतरेणावि तं तु पज्जवविसेससंखाणं । सिज्झइ नवरं संखा न सत्थधम्मो तइ गुणो त्ति ॥१११॥ जह दससु दसगुणम्मि एगम्मि दसत्तणं समं चेव । अहिअम्मि वि गुणसद्दे तहेव एअं पि दट्ठव्वं ॥११२।। एगंतपक्खवाओ जो पुण दव्वगुणजाइभेयम्मि । अह पुव्वं पडिकुट्ठो उ आहरणमेत्तमेयं ति ॥११३॥ पिअपुत्तमित्तभज्जयभाऊणं एगपुरिससंबंधो । न य सो एगस्स पिउ त्ति सेसयाणं पिआ होइ ॥११४|| जह संबंधविसिट्ठो सो पुरिसो पुरिसभावनिरइसओ । तह दव्वमिंदिअगयं रूवाइविसेसणं लहइ ॥११५।। होज्जाहि दुगुणमहुरं अणंतगुणकालयं च जं दव्वं । न हु डहरओ महल्लो व होइ संबंधओ पुरिसो ॥११६॥ भन्नइ संबंधवसा जइ संबंधित्तणं अणुमयं ते । णणु संबंधविसेसं संबंधिविसेसणं सिद्धं ॥११७॥