________________
ખૂબ જ આદર પૂર્વક મુસ્લિમ મુખ્યમંત્રીએ ગુરુદેવશ્રીની વાત સાંભળી યોગ્ય કરવા માટે જરૂર પ્રયત્ન કરીશ તેવું વચન આપ્યું. અને મુખ્યમંત્રીએ આકોલા જિલ્લાના પ્રભારી મંત્રી અઝહરહુસેનને ઘટતું કરવા સૂચન પણ કર્યા.
આ રેલી પુનઃ મુખ્ય રીજ રોડ ઉપર આવી અને હેંગિગ ગાર્ડન પાસે પૂ. ગુરુદેવશ્રી સંઘને વિદાય માંગલિક સંભળાવે છે. સમગ્ર ચતુર્વિધ સંઘ ગદ્ગદ્ થઈ જાય છે. છેલ્લા વિદાય ઉદ્ધોધનમાં પૂ. ગુરુદેવ ઇતિહાસની નોંધ મૂકતા કહે છે શ્રુતરક્ષા માટે ભદ્રબાહુસ્વામી પાસે નેપાળ જવા ૧૫૦૦ સાધુ પાટલી પુત્રથી વિદાય લે છે, ત્યારે સકલ જૈનસંઘ તમામ મહાત્માઓને “શિવાસ્તે પંથાનઃ” ના આશિષ આપે છે. તે જ રીતે આજે અમે ૧૫ સાધુઓ તીર્થરક્ષા માટે જઈ રહ્યા છીએ. શ્રી સંઘ અમને હૃદયથી શુભેચ્છા આપે. સંઘના આશિષમાં તીર્થકરોનું ચૈતન્ય હોય છે.
પૂ. ગુરુદેવ ભાવ વિભોર થઈને કહે છે ““કફન બાંધીને જાઉં છું.” હવે અંતરિક્ષથી કાં મારી વિજયયાત્રા નીકળશે અને નહી તો સ્મશાનયાત્રા નીકળશે આ શબ્દો દેવી તેજ સાથે પૂ. ગુરુદેવના મુખમાંથી સરી પડ્યા. સમગ્ર સંઘ વેદના અને વ્હાલથી ગળગળો થઈ ગયો. સહુ માતા બહેનો ભાઈઓ ચન્દ્રશેખર મહારાજ ઉપર આશિષની હેલી વરસાવે છે.
તે વાતમાં લગીરે ય અતિશયોક્તિ નથી કે આ વિહાર તીર્થયાત્રા માટેનો ન હતો કેવલ તીર્થરક્ષા માટેનો હતો. અજ્ઞાત પ્રદેશ, ઝનૂની દિગંબર સંપ્રદાય સામે બાથ ભીડવાની હતી. પગપાળા વિહારમાં અકસ્માત આદિ અનેક જોખમો સાથે ચાલવાનું છે.
પણ ચન્દ્રશેખર મહારાજના સમગ્ર અસ્તિત્વ ઉપર કેસરીયા સત્વ પ્રકાશિત થતું જણાતું હતું. તેમની ચાલમાં પરાક્રમી સિંહની છલાંગો દેખાતી હતી.
૧૧૬
