Book Title: Upadhyay Yashovijayji Swadhyay Granth
Author(s): Pradyumnavijay, Jayant Kothari, Kantilal B Shah
Publisher: Mahavir Jain Vidyalay
View full book text
________________
પરિસંવાદમાં ભાગ લેનાર સૌ વિદ્વાનો પાસેથી નિબંધો એકત્ર કરવાની કામગીરીનો આરંભ કર્યો. જૂજ જ અપવાદો સિવાય સૌએ, ભલે થોડાક વહેલામોડા પણ, નિબંધો અમને મોકલી આપ્યા. વિષયસામગ્રીની દૃષ્ટિએ નિબંધો તપાસી જવાનો અને એ પરત્વે ઘટતાં સૂચનો કરવાનો અધિકાર કેવળ પં. શ્રી પ્રદ્યુમ્નવિજયજીનો જ ગણાય. એટલે તજ્ઞ તરીકે બધા લેખો જોઈ આપવાનું કામ તેઓશ્રી કરી આપે તો ગ્રંથસંપાદનની બાકીની જવાબદારી અમે સંભાળી લઈશું એવી એમને ખાતરી આપીને પ્રદ્યુમ્નવિજયજીને આ કામ સાથે સાંકળ્યા. જેમજેમ લેખો મળતા ગયા તેમ તેમ તેમને તેઓ વિહારમાં જ્યાં હોય ત્યાં, મોલાતા ગયા. મહારાજશ્રી, બહુ જ ચીવટથી બધા જ લેખો શબ્દશઃ જોઈ ગયા અને પ્રત્યેક લેખ સાથે જરૂરી પૂર્તિ-શુદ્ધિવૃદ્ધિ-સૂચનો અંગેની નોંધ મૂકતા ગયા. એ પછી કાંતિભાઈ શાહે લેખોને ભાષાદૃષ્ટિએ તપાસ્યા અને જયંત કોઠારીએ છેવટની સંપાદનક્રિયા કરી. આવશ્યક લાગ્યું ત્યાં શંકાસ્પદ સ્થાનો પરત્વે લેખકોનો સંપર્ક કર્યો. આ પ્રક્રિયામાં થોડો સમય ગયો, પણ કામ વધારે સાફસૂથરું થતું ગયું. - આ બધા સમય દરમિયાન પં. શ્રી પ્રદ્યુમ્નવિજયજીની એક પ્રબળ ભાવના હતી કે ઉપાધ્યાય યશોવિજયજીના જન્મસ્થળ કનોડા (મહેસાણા જિલ્લો) ખાતે આ ત્રિશતાબ્દી નિમિત્તે પણ કશોક ભવ્ય કાર્યક્રમ યોજવો જોઈએ જે યશોવિજયજીની ગરિમાને અનુરૂપ હોય.
૨૨-૨૩ ફેબ્રુઆરી ૧૯૯૨ના બે દિવસોએ કનોડા ખાતે યશોવિજયજીની પુણ્યસ્મૃતિમાં બાંધવામાં આવેલી માધ્યમિક શાળાનું ઉદ્ઘાટન, યશોવિજયજીના ગ્રન્થોનું પ્રદર્શન, યશોવિજયજીના ગ્રન્થ “અધ્યાત્મસારને ગજરાજની અંબાડીમાં મૂકી નીકળેલી ભવ્ય શોભાયાત્રા વગેરે કાર્યક્રમો પં. શ્રી પ્રદ્યુમ્નવિજયજીની પાવન નિશ્રામાં યોજાયા. અગાઉ મહારાજશ્રીની ઇચ્છા એવી હતી કે કાર્યક્રમોની સાથે જ ઉપાધ્યાય યશોવિજય સ્વાધ્યાય ગ્રંથની વિમોચનવિધિ પણ રાખવી. પરંતુ જયંતભાઈ કોઠારીની અણધારી આવી પડેલી અને લંબાયેલી માંદગીને કારણે આ સમયમર્યાદામાં ગ્રંથપ્રકાશનની શક્યતા નહોતી. એટલે કનોડા ખાતે યોજાયેલા અન્ય કાર્યક્રમોની સાથે પ્રસ્તુત ગ્રંથની મંગલ મુદ્રણ-આરંભ વિધિ યોજીને જ સંતોષ માનવો પડ્યો. બન્ને પરિસંવાદમાં ભાગ લેનાર સૌ વિદ્વાનોને મહારાજશ્રીએ કનોડા ખાતેના ઉત્સવમાં ભાગ લેવા માટે ભાવપૂર્વક નોતર્યા. આ અંગેની કાર્યવાહી કાંતિભાઈ શાહે સંભાળી. સૌ વિદ્વાનોને અમદાવાદથી કનોડા લાવવા-લઈ જવાની, રહેવા-જમવાની સગવડ કરવા સાથે ત્યાં એ સૌનું બહુમાન પણ કરવામાં આવ્યું. સૌ વિદ્વાનો માટે કનોડાનો આ મહોત્સવ એક ભવ્ય સંભારણું બની ગયો.
છેવટે ઠીકઠીક સમયથી હાથમાં લીધેલું ગ્રંથના સંપાદન-પ્રકાશનનું કામ હવે પૂર્ણતાને આરે છે એનો અમને સંતોષ છે. સ્વાધ્યાય ગ્રંથની વિષયસામગ્રી જ એની મૂલ્યવત્તા નક્કી કરી આપશે.
