________________
Shri Mahavir Jain Aradhana Kendra
www.kobatirth.org
Acharya Shri Kailassagarsuri Gyanmandir
ગુજરાતના જૈનતીર્થો
પ્રસંગ પ્રથમ વાર આવેલો હોવાથી બન્નેનાં અંતરમનમાં હર્ષ માતો નહોતો. રાજા અને મંત્રી કેવલી ભગવંતનાં દર્શનથી ધન્ય બની ઊઠ્યા. . કેવળી ભગવંતે જિન-ભક્તિનો પરમ મહિમા દર્શાવતી દેશના આપી. રાજા અને મંત્રી ભાવુક બનીને કેવળી ભગવંતની દેશના હૈયામાં ઉતારી રહ્યા હતા. દેશનાનું શ્રવણ કરીને રાજા અને મંત્રીએ જિનપૂજા કર્યા વિના અન્નજળ ન લેવાનો દઢ નિશ્ચય કર્યો. કેવળી ભગવંતને પુન: વંદના કરીને રાજા અને મંત્રી વટવૃક્ષ પાસે આવી પહોંચ્યા.
રાત્રિનો અંતિમ પ્રહર ચાલી રહ્યો હતો. એકાદ ઘટિકા બાદ સૂર્ય મહારાજ પૃથ્વીપટને ભીંજવવા આવવાના હતા. પ્રથમ દિવસે જ રાજ અને મંત્રીના દઢ નિશ્ચયની પરીક્ષા થવાની હતી.
ગાઢ વન્યપ્રદેશમાં જિનબિંબ ક્યાં મળે? શ્રી જિનપૂજા શી રીતે કરાશે? રાજા અને મંત્રીનાં મનમાં આ પ્રશ્નો ઉત્પન્ન થયા. પ્રાતઃકાળ થયો. એમ કરતાં મધ્યાહન થયો. રાજા અન્ન અને જળ વિના અશક્ત જેવો બની ગયો. મંત્રીને મહારાજાની ભારે ચિંતા થઈ, આથી તે આસપાસમાં કોઈ નગર હોય તો તેની શોધમાં નીકળી પડ્યો. આગળ જતાં એક મનોહર તળાવે મંત્રીની નજરમાં આવ્યું.
મહામંત્રી બુદ્ધિસાગર તળાવની પાળે ગયો. તેણે નવકાર મહામંત્રનું સ્મરણ કરતાં શુદ્ધ અને ભીની માટીમાંથી આગામી ત્રેવીસમા તીર્થંકર શ્રી પાર્શ્વપ્રભુની દર્શનીય મૂર્તિ બનાવી. તે મૂર્તિ લઈને મહામંત્રી બુદ્ધિસાગર અતિ હર્ષિત બનીને નવકારનું સ્મરણ કરતો મહારાજા પ્રજાપાલ પાસે આવ્યો.
અત્યંત મનોહર પ્રતિમા જોઈને રાજા હર્ષિત બન્યો. તે પ્રબળ શ્રદ્ધા અને ભક્તિથી પરમાત્માની અષ્ટપ્રકારી પૂજા કરવા ઉત્સુક બન્યો. પણ વેળુના આ બિંબની જલપૂજા કેમ કરવી? તે પ્રશ્ન મનમાં સતાવવા લાગ્યો.
રાજા અને મંત્રી જિનબિંબની સામે બેસી ગયા અને નવકારનું સ્મરણ કરવા લાગ્યા, ત્યારે બન્નેની ભક્તિથી પદ્માવતી પ્રસન્ન થયાં
For Private and Personal Use Only
