________________
૧૫ વર્ષના ઈન્દ્રવદને પિતા ગુમાવ્યા!
વિ.સં. ૨૦૦૬ વૈશાખ સુદ-૯, નો દિવસ મહારાજજી પ્રેમસૂરીશ્વરજી મ.સા.ની નિશ્રામાં જીવતલાલ પ્રતાપશી પરિવાર દ્વારા આયોજિત શાશ્વત મંત્રાધિરાજની આરાધના શાશ્વત તીર્થાધિરાજ પાલીતાણા ખાતે ચાલતી હતી. એક ઈન્દ્રવદન સિવાય આખો પરિવાર પાલીતાણા ખાતે જ નમસ્કાર મહામંત્રની આરાધનામાં લીન હતો.
બે શાશ્વતો વચ્ચે અશાશ્વત સંસારે પોતાની લીલા પ્રગટ કરી. ધારેલું ન જ થાય તે જ સંસાર કહેવાય ને? અને મુંબઈ ખાતે ઈન્દ્રવદન સાથે રહેતા પિતાજી શેઠશ્રી કાન્તીભાઈનું “હાર્ટ ફેઈલ” થઈ જતા અવસાન થાય છે. જો કે પિતાજી પણ પાલીતાણા નવકાર મંત્રની આરાધનામાં જોડાવાની ભાવના સાથે સમય પસાર કરી રહ્યા હતા.
વૈશાખ સુદ-૯,ના સાંજે સુશ્રાવક કાન્તીભાઈ પ્રતિક્રમણ માટે કટાસણ પાથરે છે અને સામાયિક લેતા પહેલા લઘુ શંકા માટે બાથરૂમ જાય છે. બાથરૂમથી બહાર આવતા જ સુશ્રાવક શ્રી કાન્તીભાઈનું આયુષ્ય પૂર્ણ થાય છે. ત્યાં જ ઢળી પડે છે. કેવું કમાલ મૃત્યુ કે “માત્ર પ્રતિક્રમણની લેગ્યામાં જ પ્રાણ છુટે છે.” પવિત્રતાની ઝંખના સાથે પાલીતાણાના બદલે પિતાજીની પરલોક યાત્રા શરૂ થાય છે. અભૂત સમાધિથી મૃત્યુ વરેલા પિતાજીના અવસાનના સમાચાર પાલીતાણા પહોંચે છે.
સુશ્રાવિકા સુભદ્રા બહેન અવઢવમાં હતા. આરાધના છોડું કે ન છોડું ? જો કે સુભદ્રાબહેનને મહારાજજી સમજાવે છે કે “જુઓ સુભદ્રા ! હવે જઈને શું કરશો? આવી ઉત્તમઆરાધના શા માટે છોડો છો ? વળી અંતિમવિધિ માટે મોટો દિકરો ઈન્દ્રવદન ત્યાં જ છે. તો તમે શા માટે આરાધના છોડો છો.”
સુભદ્રાબહેન મહારાજજીની વાત માનીને મુંબઈ જવાનું માંડી વાળે છે. પાલીતાણા જ રોકાઈને ઉત્તમ ભાવો સાથે આરાધનામાં જોડાયેલા રહે છે. આ છે જિનશાસનની મહાશ્રાવિકાની જાગૃતિ અને સંબંધો પ્રત્યેની વિરક્તિ. તે જ વિરક્તિના હોરમોન્સ ઈન્દ્રવદનમાં મેજર બનીને નવપલ્લવિત થાય છે. ઇન્દ્રવદન સખ્ત મહેનત કરીને મેટ્રીક પાસ થાય છે અને બાપાજી પાસે પોતાની મક્કમ ભાવના પુનઃ રજૂ કરે છે.
૧૯
