________________
——————— વિશ્વની આધ્યાત્મિક અજાયબીઓ——————— હવે એમના ૧૨ સાધુઓના છંદની વિશેષ બાબતો.
- તમામ સાધુઓ ઓછામાં ઓછું એકાસણું કરે જ. એમના ગુરુજીને ૨૫ વર્ષ દરમ્યાન પોતાના કોઈપણ સાધુને એકાસણાથી ઓછું પચ્ચ. આપવાનો અવસર હજી સુધી આવ્યો નથી.
- સવારે સજઝાય કરે, તે સૂર્યોદય વખતે. પ્રતિલેખન એ રીતે જ શરુ કરે. એટલે અજવાળામાં જ પ્રતિલેખન થાય.
– ગમે એટલો લાંબો વિહાર હોય પણ સવારે સૂર્યોદય સઝાય કર્યા બાદ પાંચેક મિનિટ પછી વિહાર શરુ કરે.
– સાંજે પણ સૂર્યાસ્ત પૂર્વે પહોંચી જવાય એ રીતે વિહાર કરવાનો.
- અત્યાર સુધી કોઈએ પણ અંડિલનો પ્યાલો વાડામાં મુક્યો નથી. પૂરતી કાળજી સાથે યોગ્ય વિધિ કરી છે.
– અત્યાર સુધી ક્યારેય વિહારમાં એકપણ માણસ સાથે રાખ્યો નથી.
– વિહાર-જીંડિલ-માત્રુ આ અનિવાર્ય કારણ સિવાય કાળવેળામાં કામળી ઓઢીને પણ બહાર જવાનું નહિ. (દેરાસર પણ કામળીકાળ બાદ...).
- વિહાર ન હોય ત્યારે બધા સાધુઓ સૂત્રપોરિસીમાં સ્વાધ્યાય કરે. પાત્રાપોરિસીનો સમય થાય એટલે બધા સાધુઓ સાથે જ પોરિસી ભણાવે. સાંજે સંથારા પોરિસી પણ એ જ રીતે બધા સાથે ભણાવે, સમયસર ભણાવે.
- બપોરનું પ્રતિલેખન લગભગ સાડા ત્રણ કલાકે કરવાનું. વહેલું નહિ.
– કોઈપણ બહેનો કે સાધ્વીજીઓ સૂર્યોદય પૂર્વે કે સૂર્યાસ્ત બાદ ઉપાશ્રયમાં પ્રવેશ ન કરી શકે. એની પાકી કાળજી ! સાંજે કોઈ મળવા આવ્યા હોય, તો ય સૂર્યાસ્ત પૂર્વે તમામ બહેનોને કે સાધ્વીજીઓને બહાર નીકળી જવાનું કહેવામાં આવે.
- કેળા સિવાય તમામ ફળો બધાને સંપૂર્ણ બંધ. (કેરી વગેરે કંઈ જ નહિ, કોઈ છૂટ નહિ.) નિર્દોષ છૂટ મળે, તો પણ કોઈ જ ન વાપરે. બધાને બંધ.
– વિહારમાં જૈનઘરો ન હોય, તો જૈનેતરોમાંથી ગોચરી લાવવાની. એ પણ જો શક્ય ન બને અને રસોડાની આધાકર્મી ગોચરી લેવાનો પ્રસંગ આવે, તો માત્ર ખીચડી + કઢી આ સિવાય કોઈપણ વસ્તુ લેવાની નહિ. --
– એક વૃદ્ધ મહાત્માને પગમાં તકલીફ હોવાથી મોજા પહેરે. બાકી કોઈ નહિ.
– શક્ય હોય તો ઘરોમાંથી જ પાણી લાવવાનું. (આંબિલખાતાનું નહિ... જે દોષિત હોય...) જો ઘરોમાં ન જ મળે, તો પછી દોષિત પાણી લેવું. પણ એનો ઉપયોગ માત્ર પીવા પૂરતો કરવાનો. (કાજો-લુણાં ખરા.) પણ કાપાદિમાં ઉપયોગ ન કરવો. અર્થાત્ દોષિત પાણીથી કાપ ન કાઢવો.
