Sadguru Sange Vishwa ne Panthe

Author(s): Manorama B Khanderiya, Balwantrai N Khanderiya
Publisher: Vishwavatsalya and Santbal Award Foundation Ahmedabad

Page 78

૫૯
વાત કરતા, પ્રસન્ન વદને, ‘ખોટી રૂઢિઓને કાઢવા સંતો જો તપ ન કરે તો બીજું કોણ કરે. કાયમ સારું સારું ખાવાનું. પાતરાં ભરીને સંતોએ આરોગવું અને તપત્યાગનો આવો પ્રસંગ આવે ત્યારે પાછા હઠી જવું એ તો કાયરતા કહેવાય.’ આમ ઘણી-ઘણી રીતે ગુરુદેવ ભાવિક આગંતુકોને સમજાવતા. (૬) ખૂબ ઇચ્છા છતાં તબિયતના કારણે પારણાના દિવસે મારાથી ચિંચણ રોકાઈ શકાયું નહીં તેનું દુઃખ છે. આમ તો લગભગ ત્રણ વર્ષથી ગુરુદેવ એકાસણાં ખેંચે છે. તેમાં આ ઉપવાસ ઉમેરાણા તેથી મનને સંતોષ થયો. તોફાનીઓ છેવટ સુધી ભૂલની કબૂલાત કરવા ન જ આવ્યા પણ નિશ્ચય મુજબ ગુરુદેવે તો પાંચ ઉપવાસ પૂરા જ કર્યા. શ્વાસની તક્લીફ હવે ગુરુદેવને શરૂ થઈ, આ વસ્તુ પણ બતાવે છે કે આ એકાસણા અને આવા ઉપવાસોથી ગુરુદેવની શરીરશક્તિ ઘટતી જાય છે. ઉપવાસ દરમિયાન ગુરુદેવનો બધાને મળવા તથા પત્રલેખન વગેરે દૈનિક ક્રમ કશો બદલાયો નહિ.
તા. 27-5-75
તત્ત્વમાં અને વ્યવહારમાં મૌલિક સત્ય જાળવવાની જરૂર
(૧) સત્યમાં કાંઈક વ્યવહાર અંગે કચાશ રહે પણ મૂળ સત્ય જળવાતું હોય તો તેને જૈન ધર્મ ગૃહસ્થાશ્રમી સાધક માટે ક્ષમ્ય ગણ્યું છે. એમ છતાં આ કાળે તત્ત્વમાં અને વ્યવહારમાં બંનેય રીતે મૌલિક સત્ય જળવાઈ રહે એ જરૂરી છે. તેટલા માટે ‘બુવા’ના પત્ર વિશે ટકોર કરેલી તે તમો સમજી ગયા તે સારું થયું.
(૨) અંબુભાઈ તો અંબુભાઈ જ છે, પરંતુ તેમની શરીરસ્થિતિ તથા ગુજરાતવ્યાપી, રાષ્ટ્રવ્યાપી અને વિશાળ અર્થમાં વિશ્વવ્યાપી કામનું દબાણ જોતાં એમને એવા જ મજબૂત સાથીઓ નાના-મોટા હોવા જોઈએ. તેમાં ટાંચ હોય, તે બધું જોવું જરૂરી છે.
(૩) મનોરમાબહેન એ પણ એક તમોને સાંપડેલી કુદરતની બક્ષિસ છે. એ વાત ધીરે ધીરે પણ સમજાતી જાય છે, તે શુભ લક્ષણ છે.
(૪) ઉપવાસો, એકટાણાં, ત્રણેક વર્ષથી ચાલુ હોવા છતાં આવી પડ્યા; જે અનિવાર્ય હતા એમ થોડે અંશે પણ સમજાયું તો વધુ અંશે સમજાતાં વિશેષ સમાધાન તમોને થશે જ.
શ્રી સદ્ગુરુ સંગે : વિશ્વને પંથે
સંતબાલ