________________
વર્તમાનકાળમાં આજે પણ અનેક જૈનમુનિઓ પોતાની રોજિંદી સાધનામાં સરસ્વતી મંત્રની ઉપાસના કરે છે. આસો માસની શારદીય નવરાત્રિના દિવસો સુદ ૭-૮-૯ આ મંત્રસાધના માટેના ઉત્તમ દિવસો છે. જૈન મુનિશ્રીઓ એ ત્રિદિવસીય મંત્ર અનુષ્ઠાન સ્વયં કરે છે અને સાથે સમૂહમાં અનેક આરાધકોને કરાવે પણ છે.
એમાંના એક એવા જૈનમુનિ ‘બંધુત્રિપુટી’ તરીકે ખ્યાતિ પામેલા મુનિશ્રી જિનચંદ્રજી મહારાજ, વલસાડ નજીક દરિયાકિનારે તીથલ ગામે જૈન આરાધના કેન્દ્રમાં બિરાજે છે.
માત્ર આઠ વર્ષની બાલવયે, ગુજરાતી બીજા ધોરણનો શાળાકીય અભ્યાસ અધૂરો છોડી આચાર્યશ્રી પ્રેમસૂરિશ્વરજી મહારાજ પાસે દીક્ષિત થયા હતા. ત્યારબાદ તેમની દશેક વર્ષની ઉંમરે, એકવાર તેમના ગુરુજીએ તેમને પોતાની પાસે એકાંતમાં બોલાવી સમજણ આપી. “જિનચંદ્ર, તીર્થંકર ભગવાનના શાસનના આપણા ઉપર અનેક ઉપકારો છે. એ ભગવાનનો ધર્મ વધુ ને વધુ લોકો સુધી પહોંચાડવાનો પુરુષાર્થ તારે કરવાનો છે. એ માટે તારે એક મંત્રનું અનુષ્ઠાન ત્રણ દિવસ સુધી આયંબિલના તપ સાથે એકાંતમાં બેસીને કરવાનું છે. મંત્રોચ્ચાર સિવાય એકપણ શબ્દ તારે બોલવાનો નથી.’’ અંતે ગુરુદેવે તેમને શ્રુતદેવી મા સરસ્વતીનો બીજમંત્ર સંપૂર્ણ વિધિસર પ્રદાન કર્યો. ગુરુઆજ્ઞાનું અક્ષરશઃ પાલન કરી બાલમુનિએ પ્રથમ વાર મંત્રજપ અનુષ્ઠાન કર્યું હતું અને એ મંત્રસાધનાના ફળસ્વરૂપે તેમની જ્ઞાનક્ષિતિજોનો ઉઘાડ થયો. જાણે સ્વયં મા સરસ્વતી તેમની જીભ પર બેસી ગયા.
દેશવિદેશમાં તેમના હજારોની સંખ્યામાં પ્રવચનો થયા. પોતાની હૃદયસ્પર્શી વાણી દ્વારા હજારો ભક્તોના દિલ જીતી લીધા. આજે વિદેશોના અનેક દેશો અને શહેરોમાં જિનમંદિરો અને જૈનસંઘોની સ્થાપના તેમના દ્વારા થઈ છે. આજે ૭૩ વર્ષની જૈફ વયે, હજીયે તેમની રોજિંદી સાધનામાં મંત્રજપ અને ધ્યાનની સાધના અવિરત ચાલુ જ છે અને મંત્રબળના પ્રતાપે થયેલી જ્ઞાનસમૃદ્ધિ, તેમની વિમલ વાણી દ્વારા વિવિધ પ્રકારની પૂજા અને પ્રવચનો દ્વારા વહાવી રહ્યા છે.
૨૦૨
જ્ઞાનધારા - ૨૦
ઉપસંહાર કરતા પૂર્વે, મા સરસ્વતીના બીજમંત્રની જપસાધનાના પ્રભાવે મારા જીવનબાગમાં જે સુગંધ પ્રસરી તે નમ્ર અને નિખાલસભાવે વર્ણવવાની લાલચ રોકી શકતો નથી.
વતનના ગામની પ્રાથમિક શાળાના બીજા - ત્રીજા વર્ગમાં ભણતો ત્યારે એક સુંદર ભાવવાહી પ્રાર્થના ગવાતી હતી,
“પેલા મોરલાની પાસ બેઠા શારદા જો ને,
આપે વિદ્યા કેરું દાન માતા શારદા જો ને.’’
એ મોરલાની પાસે બેઠેલી મા શારદા મારી ૬-૭ વર્ષની શિશુવયે એવી રીતે મારા હૃદયમાં બેસી ગઈ જાણે કે મારી સહેલી બની ગઈ.
સને ૧૯૮૮ ના વર્ષ દરમિયાન નવરાત્રિમાં તીથલ મુકામે બિરાજતા પૂ. બંધુત્રિપુટી મુનિવરોની નિશ્રામાં પ્રથમવાર સરસ્વતીમંત્ર આરાધના શિબિરમાં જોડાવાની અમૂલ્ય તક મળી. પૂ. જિનચંદ્રજી મહારાજ દ્વારા સાધનાનું મહત્ત્વ, સ્તુતિ - સ્તવનો વગેરે જાણવા મળ્યું. ત્યારબાદ તેમણે વિધિસર સમૂહમાં સર્વે આરાધકોને સરસ્વતી બીજમંત્ર પ્રદાન કર્યો અને સહુની સાથે મળીને સમૂહજપ કરાવ્યો. મારા જીવનની એ યાદગાર શિબિર દ્વારા પ્રાપ્ત થયેલ એ અણમોલ મંત્રની જપ આરાધના અવિરત ચાલુ રહી શકી છે. એ મારા ઉપર માની કૃપા મને મુનિવરોની અમીનજરથી જ શક્ય બન્યું છે.
મનને તારનાર મંત્ર સૌ કોઈ માટે સુલભ છે. જપ સાધક કોઈ મહાજ્ઞાની સંત મહાત્મા હોય કે ઘરગૃહસ્થી ધરાવતો સામાન્ય કક્ષાનો આરાધક હોય, પોતપોતાની શ્રદ્ધા અને સમર્પણભાવે આરાધના કરે તો તે યથાશક્તિ લાભાન્વિત બને જ છે.
(જૈનદર્શનના અભ્યાસુ જિતેન્દ્રભાઈ યોગશિબિરોનું સંચાલન કરે છે. તીથલના પૂ. બંધુત્રિપુટી આશ્રમ શાંતિનિકેતન સાધના કેન્દ્ર સાથે સંકળાયેલા છે.)
જૈન મંત્ર, સ્તોત્ર અને યંત્ર
૨૦૩
