Agam 06 Ang 06 Gnatadharma Sutra Shwetambar Agam Guna Manjusha

Author(s): Gunsagarsuri
Publisher: Jina Goyam Guna Sarvoday Trust Mumbai

Page 67

95
(६) णायाधम्मक हाओ प. सु.
/ ९ अ. मादी [ ५६ ]
भट्टविज्जा विज्जाहरकन्नगा, विपलायमाणी विव महागरुलवेगवित्तासिया भुयगकन्नगा, धावमाणी विव महाजणरसियसद्दवित्तत्था ठाणभट्ठा आसकिसोरी, णिगुंजमाणी विव गुरुजणदिट्ठावराहा सुयणकुलकन्नगा, घुण्णमाणी विव वीइपहारसततालिया, गलियलंबणा विव गगणतलाओ, रोयमाणी विव सलिलगठिविप्पइरमाणथोरंसुवाएहिं नववहू उवरतभत्तुया, विलवमाणी विव परचक्करायाभिरोहिया परममहब्भयाभिद्दुया महापुरवरी, झायमाणी विव कवडच्छोमणपओगजुत्ता जोगपरिव्वाइया, णीससमाणी विव महाकतारविणिग्गयपरिस्संता परिणयवया अम्मया, सोयमाणी विव तवचरणखीणपरिभोगा चयणकाले देववरवहू, संचुण्णियकट्ठकूवरा, भग्गमेढिमोडियसहस्समाला, सूलाइयवंकपारिमासा, फलहंतरतडतडेंतफुट्टंतसंधिवियलंतलोहखीलिया, सव्वंगवियंभिया, परिसडियरज्जुविसरंत सव्वगत्ता, आमगमल्लगभूया, अकयपुण्णजणमणोरहो विव चितिज्नमाणगुरुई, हाहाकयकण्णधार णाविय वाणियगजण-कम्मगारविलविया णाणाविहरयणपणियसंपुण्णा, बहूहिं पुरिससएहिं रोयमाणेहिं कंदमाणेहिं सोयमाणेहिं तिप्पमाणेहिं विलवमाणेहिं एवं महं अंतो जलगयं गिरिसिहरमासायइत्ता संभग्गकूवतोरणा मोडियझयदंडा वलयसयखंडिया करकरस्स तत्थेव विद्दवं उवगया । तते णं तीए णावाए विवज्जमाणीए ते बहवे पुरिसा विपुलकणियभंडमायाए अंतोजलंमि णिमज्जाविया यावि होत्था । ८० तते णं ते मागंदियदारगा छेया दक्खा पत्तट्ठा कुसला मेहाविणो णिउणसिप्पोवगया बहूसु पोतवहणसंपराएसु कयकरणा लद्धविजया अमूढा अमूढहत्था एवं महं फलगखंडं आसादेति, जंसिं च णं पदेसंसि से पोयवहणे विवन्ने तंसिं च णं पदेसंसि एगे महं रयणदीवे णामं दीवे होत्था, अणेगाई जोयणाति आयामविक्खंभेणं, अणेगाई जोयणाई परिक्खेवेणं, णाणादुमसंडमंडिउद्देसे सस्सिरीए पासातीए दरिसणिज्जे अभिरूवे पडिरूवे । तस्स
बहुमज्जसभा एत्थ णं महं एगे पासायवडेंसए यावि होत्था अब्भुग्गयमूसिए जाव सस्सिरीयरूवे पासातीए दरिसणिज्जे अभिरूवे पडिरूवे । तत्थ णं पासायवडेंसए रयणद्दीवदेवया नामं देवया परिवसति पावा चंडा रुद्दा खुद्दा साहसिया । तस्स णं पासायवडिंसयस्स चउद्दिसिं चत्तारि वणसंडा किण्हा किण्होभासा० । तते णं ते मागंदियदारगा तेणं फलयखंडेणं ओवुज्झमाणा २ रयणदीवं तेणं संवूढा यावि होत्था । तते णं ते मागंदियदारगा थाहं लभंति, २ त्ता मुहुत्तंतर आससंति, २ त्ता फलगखंड विसज्जेति, २ त्ता रयणदीवं उत्तरंति, २ त्ता फलाणं मग्गणगवेसणं करेंति, २ त्ता फलातिं आहारेति, २ त्ता णालिएराणं मग्गणगवेसणं करेति, २ ता नालिएराइं फोडेंति, २ त्ता नालिएरतेल्लेणं अण्णमण्णस्स गत्ताई अब्भंगेतिं, २ त्ता पोक्खरणी ओगाहेति, २ जलमज्जणं करेति, २ जाव पच्चुत्तरंति, पुढविसिलापट्टयंसि निसीयंति, २ आसत्या वीसत्था सुहासणवरगया चंपं नगरिं, अम्मापिऊण आपुच्छणं च लवणसमुद्दोत्तारं च, कालियावायसंमुच्छणं च, पोतवहणविवत्तिं च, फलयखंडस्स आसायणं च, रयणद्दीवुत्तारं च, अणुचिंतेमाणा २ ओहतमणसंकप्पा जाव झियायंति। तते णं सा रयणद्दीवदेवया ते मागंदियदारए ओहिणा आभोएति, २ असिखेडगवग्गहत्था सत्तट्ठतलप्पमाणं उड्डुं वेहासं उप्पयति, २ त्ता ताते उक्किट्ठाए जाव देवगतीए वीईवयमाणी २ जेणेव मागंदियदारए तेणेव उवागच्छति, २ आसुसत्ता ते मागंदियदारए खरफरूसनिडुरवयणेहिं एवं वदासी हं भो मागंदियदारया ! अप्पत्थियपत्थिया ! जति णं तुब्भे मए सद्धिं विउलाति [भोगभोगाई भुंजमाणा] विहरह तो भे अत्थि जीवियं, अह णं तुब्भे भए सद्धिं विउलातिं भोगभोगाई भुंजमाणा नो विहरह तो भे अहं इमेणं नीलुप्पलगवलगुलिय जाव खुरधारेणं असिणा रत्तगंडमंसुयाई माउयाहिं उवसोहियाइं तालफलाणीव सीसाई एगंते एडेमि । तते णं ते मागंदियदारगा रयणदीवदेवताअंतिए एयमहं सोच्चा निसम्म भीया करयल [परिग्गहियं सिरसावत्तं मत्थए अंजलि कट्टु ] एवं वयासी जण्णं देवाणुप्पिया वतिस्सति तस्स आणाउववायवयणनिद्देसे चिट्ठिस्सामा । तते णं सा रयणदीवदेवता ते मागंदियदारए गेण्हति, जेणेव पासायवडेंसए तेणेव उवागच्छइ, २ त्ता असुभपोग्गलावहारं करेति, २ त्ता सुभपोग्गलपक्खेवं करेति, २ ता ततो पच्छा तेहिं सद्धिं विपुलाई भोगभोगाई भुंजमाणी विहरति, कल्लाकल्लिं च अमयफलातिं उवणेति । ८१. तते णं सा रयणदीवदेवया सक्कवयणसंदेसेणं सुट्ठिए लवणाहिवइणा लवणसमुद्दे तिसत्तखुत्तो अणुपरियट्टियव्वे त्ति जं किंचि तत्थ तणं वा पत्तं वा कट्टं वा कयवरं वा असुर पूतियं दुरभिगंधमचोक्खं तं सव्वं आहुणिय २ तित्तखुत्तो एगंते एडेयव्वं ति कट्टु णिउत्ता । तते णं सा रयणदीवदेवता ते मागंदियदारए एवं वदासी एवं खलु अहं देवाणुप्पिया ! सक्कवयणसंदेसेणं सुट्ठिएणं
ॐ श्री आगमगुणमंजूषा ६४६ फ्र
•