________________
છે. વ્રતપાલનાદિમાં નિષ્ઠ આત્મા પણ જો ખોટા આગ્રહથી યુક્ત હોય તો એની એ નૈષ્ઠિકતા પણ કલ્યાણ કરવા સમર્થ નથી બનતી વિગેરે જબરદસ્ત નિરૂપણ આ અધિકારમાં છે.
પંદરમો યોગાધિકાર કર્મયોગ અને જ્ઞાનયોગનું સુપેરે વર્ણન કરી, સમત્વારોહણ કરનાર સાધકની આત્મસ્થિતિનું વર્ણન કરે છે. આ અધિકાર પણ સાધકજનને પ્રેરણા પીયૂષનું પાન કરાવે છે.
યોગાધિકાર પછી સોળમો ધ્યાનાધિકાર ભાવના, ચિંતા અને અનુપ્રેક્ષા એમ ત્રિવિધ ધ્યાનને વર્ણવે છે. આર્ત, રૌદ્ધ ધર્મ અને શુકલ એમ ચાર ધ્યાનોનું પણ અહીં વિસ્તારથી વર્ણન કર્યું છે.
ધ્યાનયોગનું સાધકના જીવનમાં કેવું મહત્વ છે એ ઉપાધ્યાયજી ભગવંતે ધ્યાન સ્તુતિ અધિકારના માધ્યમે કરેલી ધ્યાનની સ્તુતિ દ્વારા જ જણાય છે.
૧૮માં આત્મનિશ્ચયાધિકારથી છઠ્ઠા પ્રબંધનો પ્રારંભ થાય છે. આત્મતત્વને લગતા અનેકાનેક પદાર્થોનું આ અધિકારમાં વિશદ અને તલસ્પર્શી વર્ણન છે. વ્યવહારનય- નિશ્ચયનય, દ્રવ્યલિંગ-ભાવલિંગ વિગેરે ઘણા વિષયોને ૧૯૬ ગાથામાં મહોપાધ્યાયજીએ આ અધિકારમાં આવરી લીધા છે.
