Parshvapurana

Author(s): Bhudhardas Kavi, Nathuram Premi
Publisher: Sanmati Trust Mumbai

Page 161

१६०/पार्श्वपुराण
जिनके सुखकौं ग्यानकी, नहिं उपमा जगमाहिं ।। जोतिरूप सुखपिंड थिर, इंद्रीगोचर नाहिं ||२९७।। अब तिनको आकार कछु, एकदेस अवधार ।। लिखौं एक दृष्टांत करि, जिन-सासन अनुसार ||२९८।।
चौपाई। मोममई इक पुतला ठान | नखसिख समचतुरस्र-संठान ।। सब तन सुंदर पुरुषाकार | नराकार इसही बिध सार ||२९९।। माटीसौं इमि लेपहु सोय । जैसे त्वचा देहपर होय ।। कहीं अंग खाली नहिं रहै । सब उपचार कल्पना यहै ||३००।। पुनि सो लीजै अगनि तपाय । सांचा रहै मोम गल जाय ॥ अब ता भीतर करो विचार | कहा रह्यौ बुध ताहि निहार ||३०१।।
अंतर मस पोल है जहां । पुरुषाकार रह्यौ नभ तहां ।। याही अंबरके उनहार | ब्रह्मस्वरूप जान निरधार ||३०२।।
यह आकास सून्य जडरूप । वह पूरन चेतन चिद्रूप ॥ यही फेर है या वामाहिं । आकृतिमैं कछु अंतर नाहिं ||३०३।। या बिध परब्रह्मको रूप । निराकार साकार-सरूप ॥ यह दृष्टांत हिय निज धरो । भवि जिय अनुभवगोचर करो ||३०४॥
दोहा । बसैं सिद्ध सिवखेतमैं, ज्यों दर्पनमै छाहिं ।। ग्यान-नैनसौं प्रगट हैं, चर्म-नैनसौं नाहिं ॥३०५।।
चौपाई। तब इंद्रादिक सुर समुदाय । मोख गये जाने जिनराय ।। श्रीनिर्वानकल्यानक काज । आये निज निज बाहन साज ||३०६।। परम पवित्त जानि जिन-देह । मनि-सिविकापर थापी तेह ।। करी महापूजा तिहिं बार । लिये अगर चंदन घनसार ||३०७।।