________________
૧૦
બંધસ્વામિત્વનામા તૃતીય કર્મગ્રંથ
પંકપ્રભા આદિ ૩ થી ૬ નારકીને વિશે બંધસ્વામિત્વ
૪ થી ૬ નારકીના જીવો ભવસ્વભાવે જ જિનનામનો બંધ કરતા નથી. જિનનામ કર્મનો બંધ કર્યા પછી તીર્થંકર થનાર આત્મા ચોથી આદિ નરકમાં જતા નથી માટે ઓઘમાં જ જિનનામ આદિ ૨૦ પ્રકૃતિઓ વિના ૧૦૦ પ્રકૃતિઓ જાણવી.
કારણકે નારકીનાં જીવો ભવસ્વભાવે દેવ-નારક-એકેન્દ્રિયવિક્લેન્દ્રિયમાં જતા નથી તેના પ્રાયોગ્ય બંધ કરતા નથી. ૪ થી વિગેરે નરકના જીવો જિનનામ પણ બાંધે નહીં. કારણકે તીર્થંકરનો આત્મા ત્રણ નરક સુધી જ જાય છે. માટે ઓધે તથા મિથ્યાત્વ ગુણઠાણે ૧૦૦ પ્રકૃતિ બાંધે છે.
૧ લા ગુણઠાણાને અંતે ૪ પ્રકૃતિનો અંત થાય છે. તેથી ૨જા ગુણઠાણે ૯૬ પ્રકૃતિઓ બંધાય છે.
આ ૪ પ્રકૃતિનો બંધ મિથ્યાત્વ હોતે છતે થાય છે. ૨ જા આદિ ગુણઠાણે મિથ્યાત્વ ન હોવાથી બંધ થાય નહીં.
૨ જા ગુણઠાણાને અંતે ૨૫ પ્રકૃતિનો બંધવિચ્છેદ (અંત) અને ૧ પ્રકૃતિનો અબંધ થવાથી ૩ જા ગુણઠાણે ૭૦ પ્રકૃતિનો બંધ થાય છે.
આ ૨૫ પ્રકૃતિઓનો બંધ અનંતાનુબંધીના ઉદયથી થાય છે. અનંતાનુબંધીનો ઉદય ૨જા ગુણઠાણા સુધી છે. તેથી ૩જા આદિ ગુણઠાણે ૨૫ પ્રકૃતિ બંધવિચ્છેદ થવાથી અને મિશ્ર ગુણઠાણે જીવ આયુષ્ય બાંધતો નથી. માટે મનુષ્યાયુષ્યનો અબંધ થાય છે તેથી મિશ્રગુણસ્થાનકે ૭૦ પ્રકૃતિઓ બંધાય છે.
૩જા ગુણઠાણાને અંતે એકપણ પ્રકૃતિનો બંધવિચ્છેદ થતો નથી. પરંતુ ચોથા ગુણમાં ૧ મનુષ્યાયુષ્ય બંધ થતો હોવાથી ૪ થા ગુણઠાણે ૭૧ પ્રકૃતિ બંધાય છે.
:
