Jindattakhyana Dwaya

Author(s): Sumtisuri, Amrutlal Bhojak
Publisher: Singhi Jain Shastra Shiksha Pith Mumbai

Page 66

..[३१-३३५] जिनदत्ताख्यानम् ।
तत्तो तिवग्गसारे, भोए मुंजतयाण सव्वेसि । वोलीणो बहुकालो, सुमिणे वि अदिट्ठदुक्खाणं ॥ ३२४ ॥ जाया य तओ पुत्ता, ताण चउण्हं पि जणमणाणंदा । 'तारुण्णपुण्णदेहा, कालेणं ते वि संजाया ॥ ३२५ ॥
जिनदत्तस्य धर्मोपदेशश्रवणम् । -- अह अनया कयाई, विहरतो आगओ तहिं नयरे।
निम्मलनाणचउको, सुहंकरो नाम आयरिओ ॥ ३२६ ॥ सोय केरिसो ? मंदरो इव खमाधरो राया असोगाउलो य, सायरो इव सारतरंगो बहुभंगगंगालिंगिओ य, संकरो इव सबाणीसंगओ उत्तमविसाहिडिओ य, गोविंदो इव गोवालसेविओ विगयवाहणो य त्ति । अवि य
हंसगई घणनाओ, वम्महरूवो समुदगंभीरो।
ससि-सूर-सोम-तेओ; सुरगुरुबुद्धी य सो भयवं ॥ ३२७ ॥ : तस्स य वंदणवडियाए निग्गओ सवसामग्गीए जिणयत्तो । वंदिऊण य विहाणेण, सग्गा-ऽपवग्गपावणप्पवणेण धम्मलाभेण आणदिओं निविट्ठो नाइहरे । तओ सजलजलयगंभीरभारतीए पारद्धा भगवया धम्मदेसणा । अवि य
जर-मरण-रोगतविए, संजोय-विओयदुक्खपडिहच्छे। संसारे जीवाणं, एको नरवर! हिओ धम्मो ॥ ३२८ ॥ धम्मेण धणसमिद्धी, संजुत्ता होइ चाय-भोएहि । आरोग्गसुहसमेयं, धम्मेण य आउयं दीहं ॥ ३२९ ॥ धम्मेण रायरिद्धी, धम्मेण य सग्ग-मोक्खसंपत्ती । किं बहुणा धम्मेणं, लब्भइ हियइच्छियं सद्धं ॥ ३३० ॥ पंचमहत्वयमूलो, धम्मो कहिओ तिलोयनाहेण । अहवा चउप्पयारो, नायबो दाण-सीलाई ॥ ३३१ ॥ दाणं गिहत्थधम्मे, मूलं सीलं च साहुधम्मम्मि । मूलपरिवालणाए, जत्तो सेसेसु कायबो ॥ ३३२ ॥ दाणेण होति भोया, सीलेण य होइ बंधवोच्छेओ । तव-भावणाहि झिजइ, बहुजम्मसमजियं कम्मं ॥ ३३३ ॥ इयमाइवित्थरेणं, कहिए धम्मस्स पवरमाहप्पे । लद्धावसरो पुच्छइ, जिणयत्तो मुणिवरं नमिउं ॥ ३३४ ॥ भयवं! केण कएणं , पत्ता एयारिसी मए रिद्धी । चत्वारि भारियाओ, थेवं थेवं च तह दुक्खं ॥ ३३५ ॥