Anusandhan 2006 06 SrNo 36

Author(s): Shilchandrasuri
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 11

अनुसन्धान ३६
तीर्थमालास्तवः ॥ श्री जिनाय नमः ॥ अरिहंतं भगवंतं सव्वन्नं सव्वदंसि तित्थयरं । सिद्धं बुद्धं निच्चं परमपयत्थं जिणं थुणिमो ॥१॥ जय जय तिहुअणमंगल ! भट्टारय ! सामिसाल ! भयवंतो । देवाहिदेव ! जगगुरु ! परमेसर ! परमकारुणिअ ! ।।२।। जय जय जगिक्कबंधव ! भवजलहीदीव ! तिहुअणपईव ! जय जय जगचिंतामणि ! तिहुअणचूडामणि ! जिणिंद !||३|| जय जय सिवपहसंदण ! असरणजणसरण ! दीणउद्धरण ! । जय जय भवभयभंजण ! जणरंजण ! च्छिन्नजरमरण ! ॥४|| जय कम्मजलहितारण-तरंड ! गुणरयणधारणकरंड !! जय विसमबाणवारण-वरंड ! मुणिसुमणवणसंड ! ॥५॥ धन्नोहं पुण्णोहं सहलो मह एस माणुसो जम्मो । जं जिण ! तुह पयपंकय-पसायपासायमभिरूढो ॥६॥ धन्नो एसो दिवसो जाम-मुहुत्तो वि एस सुपवित्तो । जम्मि तुमं तिजगगुरू भवमरुपहसुरतरू पत्तो ।।७।। अज्जं मह चिंतामणि-सुरतरु-सुरगावि-भद्दकुंभाई । सयलं सुलहं जं पहु ! अलद्धपुव्वो तुमं लद्धो ॥८॥ नरयभव-तिरिअ-नर-सुर-वरसमुदयनमिअचलणकमलदुगं । तिहुअणजणसुरतरुसम-महनिसमवि नमह तिजगपहुं ॥९॥ अट्ठदसदोसरहिए सहिए चउतीसअइसयवरेहिं । हयकोहे कयसोहे अट्ठमहापाडिहेरेहिं ॥१०॥ जिअरागे जिअदोसे जिअमोहे अट्ठकम्मनिम्महणे । सिवपुरपहसत्थोहे गयबाहे थोमि जिणनाहे ॥११॥ भरहम्मि तीअकाले पढमं वंदामि केवलि जिणिदं । निव्वाणिजिणं सायर-महाजसं चेव विमलजिणं ।।१२।। सव्वाणुभु(भू)इ सिरिहर, दत्तं दामोअरं सुतेअं च । सामिजिणं मुणिसुव्वय - सुमइं सिवगइ तहत्थाहं ॥१३॥