Book Title: Abhaykumar Mantrishwar Jivan Charitra Part 03
Author(s): Motichand Oghavji, Satyasundarvijay
Publisher: Jinshasan Aradhana Trust
View full book text
________________
એને શાંત કરવાને પ્રતિપક્ષી ચતુર કળાબાજ રાજાએ પ્રથમથી જ પોતાના તરફનો કર મોકલાવી દીધો હોય નહીં એમ ભાસ થતો હતો. વળી એની. આગળ, પાછળ અને બાજુએ સૈનિકોનો પરિવાર સજ્જ થઈ ઊભો હતો. આવી આવી અનેક સમૃદ્ધિને લીધે તે જાણે સાક્ષાત્ દિવસ્પતિ ઈન્દ્ર પૃથ્વી પર ઉતરી આવ્યો હોય નહીં એવો વિરાજી રહ્યો હતો.
પછી ઉત્તરોત્તર કલ્યાણકારી અને વિજય પ્રાપ્તિ સૂચક ઉત્તમ શકુનો થતાં જોઈ હર્ષિત થઈ ઉદાયન મહારાજા નગરની બહાર નીકળ્યો. અશ્વો ચાલતાં ચાલતાં માર્ગમાં પૃથ્વીને પોતાનાં કઠોર ખરીઓ વડે ખોદી નાખવા લાગ્યા તે જાણે કઠોર ચરણવાળા રાજાઓની પણ આવી જ અવસ્થા થાય છે એમ સૂચવન કરતા હોય નહીં ! રથોનો સમૂહ પણ ચક્રોના આઘાત વડે ધરણીને ફાડી નાખવા લાગ્યો તે જાણે પૃથ્વીની નીચે રહી. એના ભારને ધારણ કરી રહેલ શેષનાગનાં દર્શન કરવાને માટે જ હોય નહીં ! પાછળ ચાલનાર હસ્તિઓ વળી અશ્વો તથા રથોએ ખોદી નાખેલી પૃથ્વીને પુનઃ દુરસ્ત કરતા આવતા હતા તે જાણે એમ સૂચવવાને કે નાનાઓએ બગાડેલું પુનઃ મોટાઓ સુધારી લે છે. જેમના પર માણસો સવાર થયેલા છે એવા, અને વેગમાં ચાલવાને લીધે બંને બાજુએ હવામાં ફરફરી રહેલાં સુંદર પક્ષો વાળા દઢ શરીરી ઉંટો વારંવાર નીચી ઊંચી ડોક કરતા હતા તે જાણે આકાશને વિષે ઉડવાને ઈચ્છતા હોય નહીં એમ ભાસ થતો હતો.
ધન અને ધાન્યથી ભરેલાં અનેક વાહનો પાછળ આવતાં હતાં તે જાણે પૃથ્વીમાંથી પ્રકટ થઈને નિધાનો રાજાની સાથે ચાલ્યાં આવતાં હોય નહીં ! ઉદાયન મહારાજાની પાછળ જ જાણે એના જેવા એક દાનેશ્વરી શૂરવીર પૃથ્વીપતિને સહાય કરવાને માટે દશ દિકપાળો પૃથ્વી પર ઉતરી આવ્યા હોય નહીં એવા, મહાસેન આદિ દશ મુકુટબંધ રાજાઓ વિરાજી રહ્યા હતા. એ વખતે વળી ભાસ્કર સૂર્યદેવતા પણ રાજાના સૈન્યના ચાલવાથી ઉડેલી રજ વડે ઢંકાઈ ગયો તેથી “અહો, બહુ સારું થયું કે આ ધૂળે મને છુપાવી દીધો, અન્યથા એ રાજા મને જોઈને મારો પણ પરાભવ કરવા આવત.” એમ જાણે ખુશ થતો હોય નહીં, પણ અમને તો એમ
અભયકુમાર મંત્રીશ્વરનું જીવનચરિત્ર (સર્ગ અગ્યારમો)
