Book Title: Abhaykumar Mantrishwar Jivan Charitra Part 03
Author(s): Motichand Oghavji, Satyasundarvijay
Publisher: Jinshasan Aradhana Trust
View full book text
________________
અન્યથા આ બે પુરુષોનો, ને આ બે સ્ત્રીઓનો આવો સંવાદ ક્યાંથી થાય ? નિશ્ચય આપણી પાછળ, આપણા પુત્રનું જ પ્રારબ્ધ સારું નથી. માટે આપણે એને માટે એક કોટિ સુવર્ણ ભૂમિને વિષે ભંડારી રાખીએ. શેષ છે એ ક્ષીણ થશે તોયે આ નિધાનને લીધે પુત્ર અને એની સ્ત્રી દુ:ખી નહીં થાય. એમ કહી નિધિને ભૂમિની અંદર ભંડારી પુત્રને બોલાવી બતાવી કહ્યું-અમે વિદ્યમાન છીએ ત્યાં સુધી તું સ્વેચ્છાએ ખા, પી, ને આનંદ કર. બીજું દ્રવ્ય ખુટે નહીં ત્યાં સુધી તારે આ નિધિનો સ્પર્શ કરવો નહીં. શેઠે આ સર્વ કહ્યા પછી તો ભાઈ સાહેબ ઊલટા આડે રસ્તે ઉતર્યા. એનો દુરાચાર એટલો વધી ગયો કે માંજરમાં ભ્રમર લપટાય એમ એ એક મદનમંજરી નામની વેશ્યાના ફંદમાં ફસાયો. અન્ય સર્વ કાર્ય ત્યજી દઈને એ કુલટામાં આસક્ત થઈ રહેવા લાગ્યો એવામાં કેટલેક દિવસે એના માતપિતા પંચત્વ પામ્યા.
પરાપૂર્વથી બનતું જ આવે છે એમ, માતપિતાના અવસાન પછી. સર્વ લક્ષણે પુરો હતો છતાં પુત્ર હતો એટલે એ અભદ્રભાઈ ઘરનો માલિક થયો. ભાગ્યહીન રૂપાળાં અલક્ષ્મીબાઈ પણ ઘેર આવ્યાં. પતિ પત્નીનો વિધિએ સરસ મેળ મેળવ્યો હતો. તેમનો અમેળ કેમ બને ? વળી પેલો પુરુષ અપુણ્ય ને પેલી સ્ત્રી અસંપત્તિ રાહ જોઈ રહ્યા હતાં એ યે હવે યોગ્ય અવસર પ્રાપ્ત થયો એટલે આવીને ઊભાં રહ્યાં ને જોગેજોગ મળ્યો. અભદ્રે વળી અધુરામાં પૂરું મદનમંજરીને ઘરમાં લાવીને બેસાડી. કુળ મર્યાદા છોડી એને લાજ વળી શી ! ‘જેણે છોડી લાજ એને ત્રણ ભુવનનું રાજ' વૃદ્ધ સ્વજનોએ હિતૈષી થઈને એને બહુ બહુ સમજાવ્યોભાઈ અભદ્ર, આ વેશ્યાને ઘરમાં લાવી રાખી તે રુડું નથી કહેવાતું. ધનની હાનિ થાય છે. લોકો નિંદા કરે છે ને ઉપરાંત તારા શરીરનો પણ ક્ષય થાય છે. માટે ભલો થઈ આ વેશ્યાને છોડી દે જેથી તારું ભદ્રકલ્યાણ થઈ જાય. પરંતુ શરમનો છાંટોય જેનામાં નહોતો એવો .અભદ્ર ભદ્ર માગતો જ નહોતો, એટલે કહેવા લાગ્યો-અરે વૃદ્ધો, તમારી બુદ્ધિ ભ્રષ્ટ થઈ ગઈ છે. તમે તમારું ઘર સંભાળો, મારું ઘર સંભાળનારો હું ક્યાં નથી ? એ સાંભળી શિક્ષા આપવા આવેલા વિલખું મોં કરી સૌ સૌને ઘેર ગયા.
અભયકુમાર મંત્રીશ્વરનું જીવનચરિત્ર (સર્ગ અગ્યારમો)
૮૯
