Book Title: Abhaykumar Mantrishwar Jivan Charitra Part 03
Author(s): Motichand Oghavji, Satyasundarvijay
Publisher: Jinshasan Aradhana Trust
View full book text
________________
પર્યુષણા પર્વ આવ્યા એટલે શ્રાવક શિરોમણિ ઉદાયન રાજાએ ઉપવાસનાં પચ્ચખ્ખાણ કર્યાં. કેમકે એક ઉતરતામાં ઉતરતો શ્રાવક પણ એ દિવસે કંઈક પણ પચ્ચખ્ખાણ કર્યા વિના રહેતો નથી. પછી રસોઈવાળાએ ચંડપ્રધોતને જઈ પૂછ્યું-મહારાજ ! તમે આજે ભોજન લેશો કે કેમ ? એનું એવું વચન સાંભળીને એને તો ત્રાસ છુટ્યો. કારણ કે શત્રુના સ્વાધીનમાં રહેલાઓને પદે પદે ભયનું કારણ રહે છે. પણ એણે તો “આજે આ મને પુછવા આવ્યો છે એનું કંઈ સારું પરિણામ લાગતું નથી. વધ કરનારાઓ જેવું પશુનું કરે છે એવું કદાચિત એ મારું કરશે. નિશ્ચયે દાઝયા ઉપર ડામ જેવો એ મારો ઉપહાસ કરે છે.” એમ ચિંતવીને ઉત્તર આપ્યો કે “આજે તું મને પૂછવા આવ્યો છે તો શું આજે કંઈ વિશેષ છે ? નિત્યના કાર્યમાં આવી અન્યથા પૃચ્છા શી ?”
રસોઈઆએ એ સાંભળી કહ્યું-આજે પર્યુષણાપર્વ છે માટે અમારા રાજાને અને અંતઃપુર તથા સર્વ પરિવાર સુદ્ધાંને ઉપવાસ છે માટે તમને પૂછ્યું છે. હે રાજન ! જો તમે જમવાના હો તો તમારે માટે રસોઈ કરું. કારણ કે જેવા અમારા સ્વામી એવા જ તમે અમારા મનથી અમારા સ્વામી છો. એ સાંભળીને એને શંકા થઈ કે કદાચિત હું એકલો જમનારો હોઉં ને મને આ લોકો વિષ આપે તો શું થાય ? એમનો અપર માતા સંબંધી સ્નેહ હું સારી રીતે જાણું છું. આમ ચિંતા થવાથી એણે રસોઈયાને ઉત્તર આપ્યો ભલા માણસ, બહુ સુંદર થયું કે તેં મને આ પર્વનું સ્મરણ કરાવ્યું. એમ પણ પૂર્વે આ પર્વ દિવસે ઉપવાસ કરતાં. પણ અત્યારે ધ્યાન ન રહ્યું કારણ કે ધર્મ સુખી માણસોના ચિત્તમાં જ હોય છે. મારા માતપિતા શ્રાવક ધર્મ પાળતા. તો હું પણ આજે ઉપવાસ કરીશ. આ હકીક્ત રસોઈઆએ જઈને ઉદાયન રાજાને નિવેદન કરી ઉદાયને તો હાસ્યપૂર્વક કહ્યું-પ્રધોત વળી ક્યારનો શ્રાવક ! વ્રત પચ્ચખ્ખાણ તો એનાથી નાસીને ક્યાંયને ક્યાંય જતા રહે છે ! એ ઉપવાસ કર્યાનું કહેતો હશે એ ફક્ત ભયને લીધે જ ! પર્વ દિવસની ગણત્રી એ એનું વૃથા બાનું છે. જેમ પૂરી લઈ આવ્યો હોય કાક, ને નામ દેવાય આદિત્યનું-એના જેવું આ થાય છે. ગમે તેમ હો, એ જેવો તેવો પણ હું એને મારો કરીને રાખીશ.
અભયકુમાર મંત્રીશ્વરનું જીવનચરિત્ર (ભાગ-૩)
૭૮
