Shatkhandagama Pustak 15

Author(s): Bhutbali, Hiralal Jain, Fulchandra Jain Shastri, Balchandra Shastri
Publisher: Jain Sanskruti Samrakshak Sangh Solapur

Page 430

संतकम्मपंजिया
(५७ सुदणाणावरणाणं णत्थि । कुदो ? एदेसि दोण्हं उक्कस्सुदीरणं सण्णिपंचिदियपज्जत्ताणं सव्वसंकिलिढाणं होदि त्ति सामित्त भणित्तादो। एवं भणिदे किमळं जादमिदि चे ण, सण्णिपंचिदियपज्जत्तेसु पंचिदिय-णोइंदियाणं खओवसममत्थि, तेसिमेगदराणं उवजोगे वि दिस्सदि । एवं संते एदेसि उक्कस्साणुभागउदीरणं देसघादी होदि । एवं संते पुवावरविहो होदि ? ण, एदस्सत्थो एवं भणिज्जदि- दोण्हमावरणाणं उकस्साणुभागाणं सव्वघादणसत्ती पंचिंदियजादिकम्मोदएण पडिहयं होदूण गट्ठा, णठे वि सव्वघादित्तं ण णस्सदि । जहा अग्गिस्स दहणगुणमंतोसहपहावेण पच्छादिदे संते वि अग्गिस्स दहणगुणं ण णस्सदि, तहा चेव एत्थ वि ।
सम्मामिच्छत्तस्सेव सव्वघादित्तं किं ण उत्तं? ण, एवं संते अणुक्कस्ससव्वस्स वि सव्वधादित्तं पावदि । पुणो अणुक्कस्सुदीरणा एदेण कमेण सव्वघादी होदूण गच्छदि जाव ओघि-मणपज्जवणाणावरणाणं सव्वघादिजहण्णाणुभागेण अणुसरिसं जादे ति। तत्तो परं देसघादि होदि । णवरि एत्थ अणुक्कस्सदीरणा देसघादि-सव्वघादि त्ति उत्तकम्म (म)स्स अत्थं एवं होदि । तं जहा- कम्मेहि अवहरिज्जमाणगुणाणं दिस्समाणत्तादो अणुक्कस्सुदीरणं देसघादी होदूण गच्छदि जाव लद्धिअक्खरं ण पावदि ताव । पुणो पत्ते य सव्वघादित्तं होदि, खओवसमपहाणत्तेण विवक्खिदत्तादो त्ति । एदमत्थं जाणाविदं । अणुभागाणं कमो पुव्विल्लो चेव ।
पुणो अचक्खुदंसणावरणस्स उक्कस्साणुक्कस्सुदीरणं देसघादि त्ति । पृ०१७१.
कथमेदं घडदे ? कधं ण घडदे ? उच्चदे- मिच्छत्तासंजम-कसायसरूवपरिणामपच्चइयस्स णाणाणुसारिदसणं पच्छा द) यंतस्स अचक्खुदंसणावरणस्स मदिणाणावरणपरूवणाए समाणेण होदव्वमिदि ? ण, जमणभागुदीरणं जम्मि पडिवक्खं सव्वं घादयदि तमणुभागं तं पडुच्च उक्कस्सं सव्वघादित्तं च होदि । एत्थ पुण तं त्थि । कुदो ? सण्णिपंचिदिएण बध्दुकस्साणुभागं तं चेवुदीरिज्जमाणे खओवसमविसेसेण पंचिदियोदएण पडिहयं होदूण अणंतगुणहीणसरूवेण उदयावलियं पविसदि, मदिणाणावरणं व थिरं ण होदि । पूणो जादिवसेण खओवसमहाणीए च एदस्सणुभागउदीरणा वड्ढदि जाव सुहुमेइंदियजीवस्स लद्धियक्खरखओवसमे त्ति। णवरि जम्मि जम्मि जादिम्मि तम्मि पडिबद्धपरिणामपच्चएणुक्कस्सं होदि, बहिरंतरंगुवओगाणं छदुमत्थेसु समाणत्ताभावादो कज्जस्स त्थोवबहुत्तादो कारणस्स बहुत्त (त्तं)त्थोवत्तं च ण जाणिज्जदि त्ति दोण्हं सरिसपरूवणा ण होदि त्ति सिद्धं ।
पुणो चक्खुदंसणावरणस्स उक्कस्साणुभागस्सुदीरणा सव्वघादि (पृ १७१) त्ति उत्ते सव्वं एदस्सत्थं घादेदि त्ति सवधादि त्ति गेण्हिदव्वं । कधं ? तीइंदियस्स तत्थतणसव्वसंकिलिट्ठणिबंधणपच्चएण परिणदस्स उदीरज्जमाणचक्खुदंसणावरणेण णासिदचक्खुदंसणावरणखओवसमत्तादो सव्वघादि होदि त्ति । पुणो सण्णीसु किमट्ठमुक्कस्ससामित्तं ण दिण्णं ? ण, एदस्स पंचिदिय-चरिदिएसु खओवसमजादिवसेण च अणंतगुणहाणिसरूवेण अणुभागाणमुदयावलियाए पवेसुवलंभादो।
पुणो सादासाद-आउचउक्क-सव्वणाम-(उच्च-)णीचागोदाणं उक्कस्साणुभागउदीरणा धादियाघादीणं पडिभागिया इदि उत्तं । पृ० १७१.
मलग्रन्थे त्वेवंविधोऽस्ति पाठ:-- सादासादाउचउक्स्स सधणामपयडीणं उच्चाणीचागोदाणं उक्कस्सा अणुक्कस्सा च उदीरणा अघादी सव्वघादिपडिभागो।