________________
નિવેદન
પરમ દાર્શનિક પૂ. શ્રી જયંતમુનિનાં પ્રથમ બે પુસ્તક, “૧૪ મંગલ સ્વપ્ન : મહિમા અને રહસ્ય' અને “કહો, કેવા હતા પ્રભુ મહાવીર?”માં તેમના ગહન મૌલિક ચિંતન, જૈનદર્શનની તલસ્પર્શી અને સ્પષ્ટ અભિવ્યક્તિ અને ભાષાના પ્રભુત્વથી વિદ્વાન વર્ગમાં વિસ્મયભર્યા આનંદની લાગણી પ્રસરી હતી.
પ્રખ્યાત વિદ્વાન ડૉ. કુમારપાળ દેસાઈએ શ્રી જયંતમુનિના “૧૪ મંગલ સ્વપ્ન : મહિમા અને રહસ્ય'માં ‘દર્શન પ્રતિભાના વિરલ અને મૌલિક ઉન્મેષ'નાં દર્શન કર્યા છે. જ્યારે “કહો, કેવા હતા પ્રભુ મહાવીર?” માટે તેમણે નોંધ્યું છે કે, “પ્રત્યેક ઉપમાનું અનુસંધાન તીર્થકર ભગવાન મહાવીર સ્વામીના વ્યક્તિત્વની સાથોસાથ જૈનદર્શનની મૂળગામી ભાવના સાથે વણાયેલું છે. ઉપમાના આવા અર્થસંકેતો સમાજને પહેલી વાર પ્રાપ્ત થાય છે.”
સ્વાભાવિક છે કે સૌના હૃદયમાં આવી વિરલ પ્રતિભાનાં ઉદ્ગમ, વિકાસ અને તેની ભૂમિકાને જાણવાની અને સમજવાની ઉત્કંઠા જાગ્રત થાય.
એક વર્ગ મુનિશ્રીને દ્રષ્ટા અને દાર્શનિકના રૂપમાં નિહાળી રહ્યો છે, ત્યારે ઝારખંડના આદિવાસીઓ માટે તેઓ કરુણાસભર, હૃદયભીના, પ્રેમાળ “બાબા' છે. આ બે બિંદુની વચ્ચે એક એવો વિશાળ વર્ગ છે જે મુનિશ્રી પ્રત્યેની ભક્તિમાં મુગ્ધ છે. તેમની બનારસની ઐતિહાસિક યાત્રા, અનેક ક્ષેત્રોમાં પહેલ, સરળતા, નિર્ભયતા, સાદી ભાષામાં પણ પ્રભાવશાળી પ્રવચન, આબાલવૃદ્ધ સૌની સાથે એકરૂપતા, એવા અનેક પાસાઓથી તેમની પ્રતિભા ઝળકતી રહી છે. દરેક વ્યક્તિને મુનિશ્રીમાં પોતાનું જ પ્રતિબિંબ દેખાય છે. તેમના આ બહુમુખી વ્યક્તિત્વને ઉજાગર કરવાનો અને તેની પાછળ કામ કરી રહેલાં પરિબળોનો સંકેત આપવાનો અને તેમની દર્શનપ્રતિભાની ઝાંખી આપવાનો અહીં નમ્ર પ્રયાસ કર્યો છે.
વાણીભૂષણ પૂ. શ્રી ગિરીશમુનિજી અત્યારે કોલકતામાં બિરાજમાન છે. તેઓશ્રીએ મહત્ત્વનાં સૂચનો આપીને મારું કામ હળવું કર્યું છે. તેમના માર્ગદર્શન બદલ હું તેમનો આભાર માનું છું.
ગોંડલ ગચ્છના પૂજ્ય મુનિવરો અને પૂજ્ય સાધ્વીજીઓનાં માર્ગદર્શન, પ્રોત્સાહન અને શુભેચ્છાઓ બદલ તેમનો આદર સાથે ઋણસ્વીકાર કરું છું.
પૂ. દર્શનાબાઈ અને પૂ. સ્વાતિબાઈ મહાસતીજી ઘણાં વર્ષોથી ગુરુદેવ શ્રી જયંતમુનિના અંતેવાસી છે અને તેમની સેવામાં તલ્લીન છે. બંને મહાસતીજીઓ તરફથી બહુમૂલ્ય સહયોગ મળ્યો છે. હું
જ્યારે જ્યારે પેટરબાર ગયો છું ત્યારે મારા મુનિશ્રી સાથેના વાર્તાલાપ અને ચર્ચાઓની તેમણે કાળજીથી નોંધ ઉતારી છે. તે ઉપરાંત કલકત્તાથી જ્યારે પણ કોઈ વિગત મંગાવી હોય ત્યારે તેઓ તે તત્કાલ મોકલવાની વ્યવસ્થા કરી આપી છે. તેમના સહયોગમાં ગુરુભક્તિ છલકાતી હતી. હું તેમનો આભાર માનું છું.
