Agam 03 Ang 03 Sthanang Sutra Shwetambar Agam Guna Manjusha

Author(s): Gunsagarsuri
Publisher: Jina Goyam Guna Sarvoday Trust Mumbai

Page 17

(३) ठाणं २. अ. विद्वाणं उ३ [७]
गुहाओ पन्नत्ताओ बहुसमतुल्लाओ अविसेसमणाणत्ताओ अन्नमन्नं णातिवट्टंति आयामविक्खंभुच्चत्तसंठाणपरिणाहेणं, तंजहा तिमिसगुहा चेव खंडगप्पवायगुहा चेव, तत्थ णं दो देवा महिड्डिया जाव पलिओवमाद्वितीया परिवसंति, तंजहा कयमालए चेव नट्टमालए चेव । एरावयए णं दीहवेयडे दो गुहाओ पन्नत्ताओ जाव कयमालए चेव नट्टमालए चेव । ८७. जंबूमंदरस्स पव्वयस्स दाहिणेणं चुल्लहिमवंते वासहरपव्वए दो कूडा पन्नत्ता बहुसमतुल्ला जाव विक्खंभुच्चत्तसंठाणपरिणाहेणं, तं जहा चुल्लहिमवंतकूडे चेव वेसमणकूडे चेव । जंबूमंदरदाहिणेणं महाहिमवंते वासहरपव्वते दो कूडा पन्नत्ता बहुसम जाव महाहिमवंतकूडे चेव वेरुलियकूडे चेव । एवं निसढे वासहरपव्वते दो कूडा पन्नता बहुसम जाव निसढकूडे चेव रुयगकूडे चेव । जंबूमंदरउत्तरेण नीलवंते वासहरपव्वते दो कूडा पन्नत्ता बहुसम जाव तंजहा नीलवंतकूडे चेव उवदंसणकूडे चेव । एवं रुप्पिम्मि वासहरपव्वते दो कूडा पन्नत्ता बहुसम जाव तंजहा रुप्पिकूडे चेव मणिकंचणकूडे चेव । एवं सिहरिम्मि वासहरपव्वते दो कूडा पन्नत्ता बहुसम जाव तंजहा सिहरिकूडे चेव तिर्गिच्छिकूडे चेव । ८८. जंबूमंदरउत्तरदाहिणेणं चुल्लहिमवंत सिहरीसु वासहरपव्वतेसु दो महद्दहा पन्नत्ता बहुसमतुल्ला अविसेसमणाणत्ता अण्णमण्णं णातिवट्टंति, आयामविक्खंभउव्वेहसंठाणपरिणाहेणं, तंजहा पउमद्दहे चेव पुंडरियद्दहे चेव, तत्थ णं दो देवयाओ महिड्डियाओ जाव पलिओवमद्वितीयाओ परिवसंति, तंजहा सिरी चेव लच्छी चेव । एवं महाहिमवंत-रुप्पीसु वासहरपव्वएस दो महद्दहा पन्नत्ता बहुसम जाव तंजहा महापउमद्दहे चेव महापुंडरीयद्दहे चेव, देवताओ हिरिच्चेव बुद्धिच्चेव । एवं निसढनीलवंतेसु तिगिच्छिद्दहे चेव केसरिद्दहे चेव, देवताओ धिती चेव कित्ती चेव । ८९. जंबूमंदरदाहिणेणं महाहिमवंताओ वासहरपव्वयाओ महापउमद्दहाओ दहाओ दो महाणदीओ पवहंति, तंजहा रोहियच्चेव हरिकंतच्चेव । एवं निसढाओ वासहरपव्वताओ तिगिच्छिद्दहाओ दहाओ दो महाणईओ पवहंति, तंजहा हरिच्चेव सीतोतच्चेव । जंबूमंदरउत्तरेणं नीलवंताओ वासधरपव्वताओ केसरिद्दहाओ दहाओ दो महानईओ पवहंति, तंजहासीता चेव नारिकंता चेव । एवं रुप्पीओ वासहरपव्वताओ महापुंडरीयद्दहाओ दहाओ दो महानईओ पवहंति, तंजहा णरकंता चेव रुप्पकूला चेव । ९०. जंबूमंदरदाहिणेणं भरहे वासे दो पवायद्दहा पन्नत्ता बहुसम जाव तंजहा गंगप्पवातद्दहे चेव सिंधुप्पवायद्दहे चेव । एवं हेमवए वासे दो पवायद्दहा पन्नत्ता बहु सम जाव तंजहा रोहियप्पवातद्दहे चेव रोहियंसप्पवातद्दहे चेव । जंबूमंदरदाहिणेणं हरिवासे वासे दो पवायद्दहा पन्नता बहुसम जाव तंजहा हरिपवातद्दहे चेव हरिकंतपवातद्दहे चेव । जंबूमंदरउत्तरदाहिणेणं महाविदेहे वासे दो पायद्दहा पन्नत्ता बहुसम जाव सीयप्पवातद्दहे चेव सीतोदप्पवायद्दहे चेव । जंबूमंदरउत्तरेणं रम्मए वासे दो पवायद्दहा पन्नत्ता बहु सम नरकंतप्पवायंद्दहे णारीकंतप्पवायद्दहे चेव । एवं हेरन्नवते वासे दो पवायद्दहा पन्नत्ता बहु समजाव सुवन्नकूलप्पवायद्दहे चेव रूप्पकूलप्पवायद्दहे चेव । जंबूमंदरउत्तरेणं एरवए वासे दो पायद्दा पन्नत्ता बहु सम जाव रत्तप्पवायद्दहे चेव रत्तावइप्पवातद्दहे चेव । ९१. जंबूमंदरदाहिणेण भरहे वासे दो महानईओ पन्नत्ताओ बहु सम जाव गंगा व सिंधू चेव । एवं जधा पवातद्दहा एवं ईओ भाणियव्वाओ, जाव एरवए वासे दो महानईओ पन्नत्ताओ बहुसमतुल्लाओ जाव रत्ता चेव रत्तवती चेव । ९२. जंबूदीवे दीवे भरहेरवतेसु वासेसु तीताए उस्सप्पिणीए सुसमदूसमाए समाए दो सागरोवमकोडाकोडीओ काले होत्था १, एवमिमीसे ओसप्पिणीए जाव पन्नत्ते २, एवं आगमेसाए उस्सप्पिणीए जाव भविस्सति ३ | जंबूदीवे दीवे भरहेरवतेसु वासेसु तीताए उस्सप्पिणीए सुसमाए समाए मणुया दो गाउयाई उड्डुंउच्चत्तेणं होत्था दोन्नि य पलिओवमाइं परमाउं पालयित्था ४, एवमिमीसे ओसप्पिणीए जाव पालयित्था ५, एवमागमेसाते उस्सप्पिणीए जाव पालयिस्संति ६ । ९३. जंबूदीवे दीवे भररवसु वासेस एगसमये एगजुगे दो अरहंतवंसा उप्पज्जिसु वा उप्पज्जेति वा उप्पज्जिस्संति वा ७, एवं चक्कवट्टिवंसा ८, दसारवंसा ९ । जंबू ( दीवे दीवे) भरहेरवतेसु वासेसु एगसमते दो अरहंता उप्पज्जिसु वा उप्पज्जेति वा उप्पज्जिस्संति वा १०, एवं चक्कवट्टि ११, एवं बलदेवा १२, एवं वासुदेवा जाव उप्पज्जिस्संति वा १३ । ९४. जंबूदीवे दीवे दोसु कुरासु मणुया सता सुसमसुसममुत्तमं इड्डि पत्ता पच्चणुभवमाणा विहरंति, तंजहा देवकुराए चेव उत्तरकुराए चेव १४ । जंबूदीवे दीवे दोसु वासेसु मणुया सता सुसममुत्तमं इद्धिं पत्ता पच्चणुभवमाणा विहरंति, तंजहा हरिवासे चेव रम्मगवासे चेव १५ । जंबूदीवे दीवे दोसु वासेसु मणुया सता सुसमदूसममुत्तममिडि पत्ता पच्चणुभवमाणा विहरंति, तंजहा हेमवते चेव हेरन्नवते चेव १६ । जंबूदीवे दीवे दोसु खेत्तेसु मणुया सता दुसमसुसममुत्तममिद्धिं पत्ता
श्री आगमगुणमजूषा - १०५