Death Before During and After Kannada

Author(s): Dada Bhagwan
Publisher: Dada Bhagwan Aradhana Trust

Page 7

ಸಂಪಾದಕೀಯ
ಈ 'ಮೃತ್ಯು' ಎನ್ನುವುದು ಮನುಷ್ಯನಿಗೆ ಎಷ್ಟೊಂದು ಭಯವನ್ನುಂಟು ಮಾಡಿಬಿಡುತ್ತದೆ. ಅದೆಷ್ಟೋ ರೀತಿಯಲ್ಲಿ ಆಘಾತವನ್ನುಂಟು ಮಾಡುವುದಲ್ಲದೆ, ಸಂಪೂರ್ಣವಾಗಿ ದುಃಖದಲ್ಲಿ ಮುಳುಗಿಸಿಬಿಡುತ್ತದೆ. ಪ್ರತಿಯೊಬ್ಬರ ಜೀವನದಲ್ಲಿ ಯಾರಾದರೊಬ್ಬರು ಮರಣದ ಸಾಕ್ಷಿಯಾಗಬೇಕಾಗಿ ಬರುತ್ತದೆ. ಆಗ ಆ ಸಮಯದಲ್ಲಿ ಕ್ಷಣಿಕ ಕಾಲದವರೆಗೆ ಮೃತ್ಯುವಿನ ವಿಷಯದ ಬಗ್ಗೆ ಮತ್ತು ಅದರ ಸ್ವರೂಪದ ವಾಸ್ತವಿಕತೆಯ ಬಗ್ಗೆ ಯೋಚಿಸ ತೊಡಗುತ್ತೇವೆ. ಆದರೆ ಆ ರಹಸ್ಯಗೆ ಪರಿಹಾರ ಸಿಗದೆ, ಅಲ್ಲಿಗೇ ಆ ಕುತೂಹಲವು ನಿಂತುಹೋಗುತ್ತದೆ. ಈ ಮೃತ್ಯುವಿನ ರಹಸ್ಯವನ್ನು ತಿಳಿಯಲು ಪ್ರತಿಯೊಬ್ಬರೂ ಉತ್ಸುಕರಾಗಿಯೇ ಇರುತ್ತಾರೆ. ಅಲ್ಲದೆ ಅದರ ವಿಷಯವಾಗಿ ಬಹಳಷ್ಟು ಕೇಳಲು ಮತ್ತು ಓದಲು ಸಿಗುತ್ತದೆಯಾದರೂ, ಅವೆಲ್ಲವೂ ಲೋಕವ್ಯವಹಾರದ ಮಾತುಗಳಾಗಿದ್ದು, ಕೇವಲ ಬುದ್ದಿಯ ಊಹಾಪೋಹಗಳಾಗಿವೆ.
ಮೃತ್ಯು ಅಂದರೆ ಏನಿರಬಹುದು? ಮೃತ್ಯುವಿನ ಮೊದಲು ಹೇಗಿರಬಹುದು? ಮೃತ್ಯುವಿನ, ಆ ವೇಳೆಯು ಹೇಗಿರಬಹುದು? ಮೃತ್ಯುವಿನ ನಂತರ ಏನಿರಬಹುದು? ಹೀಗೆ ಮೃತ್ಯುವಿನ ಅನುಭವವನ್ನು ಹೇಳುವವರಾದರೂ ಯಾರು? ಯಾರು ಮೃತ್ಯು ಹೊಂದಿದ್ದಾರೆ, ಅವರು ಅವರ ಅನುಭವವನ್ನು ಹೇಳಲು ಸಾಧ್ಯವಿಲ್ಲ. ಯಾರು ಜನ್ಮ ತೆಗೆದುಕೊಳ್ಳುತ್ತಾರೆ, ಅವರಿಗೆ ಅವರ ಹಿಂದಿನ ಅವಸ್ಥೆ, ಸ್ಥಿತಿಯು ತಿಳಿದಿರುವುದಿಲ್ಲ. ಜನ್ಮದ ಮೊದಲು, ಮೃತ್ಯುವಿನ ನಂತರದ ಅವಸ್ಥೆಯನ್ನು ಯಾರಿಗೂ ತಿಳಿಯಲಾಗುವುದಿಲ್ಲ. ಹಾಗಾಗಿ ಮೃತ್ಯುವಿನ ಮೊದಲು, ಮೃತ್ಯುವಿನ ವೇಳೆಯಲ್ಲಿ ಹಾಗು ಮೃತ್ಯುವಿನ ನಂತರ ಯಾವ ದಿಕ್ಕಿನೆಡೆಗೆ ಸಾಗಬೇಕಾಗುತ್ತದೆ ಎನ್ನುವುದರ ರಹಸ್ಯವು ಸರಿಯಾಗಿ ತಿಳಿಯಲು ಸಿಗುವುದಿಲ್ಲ. ದಾದಾಶ್ರೀಯವರು ತಮ್ಮ ಜ್ಞಾನದಿಂದ ಅವಲೋಕನೆ ಮಾಡಿ ಈ ಎಲ್ಲಾ ರಹಸ್ಯಗಳನ್ನು ಹೇಗಿದೆಯೋ ಹಾಗೆ ಯಥಾರ್ಥವಾಗಿ ಬಹಿರಂಗಪಡಿಸಿದ್ದಾರೆ. ಅವುಗಳ ಸಂಕಲನವನ್ನು ಇಲ್ಲಿ ಪ್ರಕಟಿಸಲಾಗಿದೆ.
ಮೃತ್ಯುವಿನ ರಹಸ್ಯವನ್ನು ತಿಳಿಯುತ್ತಿದ್ದಂತೆಯೇ, ಮೃತ್ಯುವಿನ ಭಯವು ಓಡಿಹೋಗುತ್ತದೆ!
ಪ್ರೀತಿಗೆ ಪಾತ್ರರಾದವರ, ಆತ್ಮೀಯರ ಮರಣಾವಸ್ಥೆಯ ಸಮಯದಲ್ಲಿ ನಾವು ಏನು ಮಾಡಬೇಕು? ನಮ್ಮ ನಿಜವಾದ ಜವಾಬ್ದಾರಿ ಏನು? ಅವರ ಮುಂದಿನ ಅವಸ್ಥೆಯನ್ನು ಯಾವ ರೀತಿಯಲ್ಲಿ ಸುಧಾರಿಸಬಹುದು? ಪ್ರೀಯ ಆತ್ಮೀಯರ ಮರಣದ ನಂತರ ನಾವು ಏನು ಮಾಡಬೇಕು? ಯಾವ ತಿಳುವಳಿಕೆಯೊಂದಿಗೆ ನಾವು ಸಮಾಧಾನದಲ್ಲಿ ಇರಬೇಕು?