________________
ಮತ್ತು ಸಮಯದಲಿ
ಇದೆಲ್ಲಾ ಹೊಗಳಿಕೆಗಾಗಿ!
ಪ್ರಶ್ಯಕರ್ತ: ಈ ಮೃತ್ಯುವಿನ ನಂತರ ಹನ್ನೆರಡನೇ ದಿನದ ಆಚರಣೆ, ಹದಿಮೂರನೇ ದಿನದ ಆಚರಣೆ ಮಾಡುತ್ತಾರೆ, ಪಾತ್ರೆಗಳನ್ನು ಹಂಚುತ್ತಾರೆ, ಊಟ ಹಾಕುತ್ತಾರೆ, ಇದೆಲ್ಲದರ ಮಹತ್ವ ಏನು?
ದಾದಾಶ್ರೀ: ಇದೇನು ಮಾಡಲೇ ಬೇಕಾದ ಕೆಲಸವೇನಲ್ಲ. ಇದೆಲ್ಲಾ ಮಾಡುವವರು ಪ್ರಶಂಸೆಯನ್ನು ಪಡೆಯುವುದಕ್ಕಾಗಿಯೇ ಮಾಡುತ್ತಾರೆ. ಅಲ್ಲದೆ ಯಾರು ಯಾವುದಕ್ಕೂ ಖರ್ಚು ಮಾಡುವುದಿಲ್ಲವೋ, ಅವರು ಲೋಭಿಗಳಾಗಿಬಿಡುತ್ತಾರೆ. ಕೆಲವರಂತೂ ಎರಡು ಸಾವಿರ ರೂಪಾಯಿ ಖರ್ಚಾದರೆ, ಊಟ-ತಿಂಡಿಯನ್ನೂ ಮಾಡುವುದಿಲ್ಲ ಮತ್ತು ಆ ಎರಡು ಸಾವಿರ ರೂಪಾಯಿಯನ್ನು ಮತ್ತೆ ಸಂಗ್ರಹಿಸುವುದರಲ್ಲಿ ನಿರತರಾಗುತ್ತಾರೆ. ಆದುದರಿಂದ ಈ ರೀತಿಯ ಪದ್ದತಿಗಳಿಂದ ಅವರಿಂದ ಖರ್ಚು ಮಾಡಿಸಿದರೆ, ಆಗ ಮನಸ್ಸು ಸ್ವಚ್ಚವಾಗುವುದಲ್ಲದೆ ಲೋಭವು ಹೆಚ್ಚಾಗುವುದಿಲ್ಲ. ಆದರೆ ಎಲ್ಲಿಯೂ ಇದನ್ನು ಕಡ್ಡಾಯವಾಗಿ ಮಾಡಲೇ ಬೇಕೆಂದೇನೂ ಇಲ್ಲ. ನಿಮ್ಮಿಂದ ಆಗುವುದಾದರೆ ಮಾಡಿ, ಇಲ್ಲವಾದರೆ ಬೇಡ.
ಶ್ರಾದ್ಧದ ಸರಿಯಾದ ತಿಳುವಳಿಕೆ!
ಪ್ರಶ್ನಕರ್ತ: ಶ್ರಾದ್ಧದ ಸಮಯದಲ್ಲಿ ಪಿತೃಗಳನ್ನು ಆಹ್ವಾನ ಮಾಡಲಾಗುತ್ತದೆ, ಅದು ಯೋಗ್ಯವಾಗಿದೆಯೇ? ಅಲ್ಲದೆ ಪಿತೃಪಕ್ಷದ ಸಮಯದಲ್ಲಿ ಪಿತೃಗಳು ಬರುತ್ತಾರೆಯೇ? ಹಾಗೂ ಊಟ ಹಾಕುತ್ತಾರಲ್ಲ ಅದು ಏನು?
ದಾದಾಶ್ರೀ: ಮಕ್ಕಳೊಂದಿಗೆ ಇನ್ನೂ ಸಂಬಂಧವು ಉಳಿದುಕೊಂಡಿದ್ದರೆ, ಆಗ ಮಾತ್ರ ಬರಬೇಕಾಗುತ್ತದೆ. ಆದರೆ, ಇಲ್ಲಿ ಪೂರ್ತಿ ಸಂಬಂಧಗಳೆಲ್ಲಾ ಕಳಚಿ ಹೋದ ಮೇಲೆಯೇ ದೇಹವನ್ನು ಬಿಟ್ಟು ಹೋಗುವುದು. ಯಾವ ರೀತಿಯಲ್ಲೂ ಮನೆಯವರೊಂದಿಗೆ ಸಂಬಂಧವು ಉಳಿಯದೆ ಪೂರ್ಣಗೊಂಡಾಗ ದೇಹವು ಕಳಚಿ ಬೀಳುತ್ತದೆ. ನಂತರ ಎಂದೂ ಸಂಪರ್ಕದಲ್ಲಿ ಬರುವುದಿಲ್ಲ. ಹೊಸದಾಗಿ ಸಂಬಂಧವನ್ನು ಕಟ್ಟಿಕೊಂಡಿದ್ದರೆ, ಆಗ ಮತ್ತೆ ಮುಂದಿನ ಜನ್ಮವಾಗುತ್ತದೆ. ಹಾಗೆ ಸುಮ್ಮನೆ ಯಾರೂ ಬರುವುದಿಲ್ಲ. ಪಿತೃ ಎಂದು ಯಾರನ್ನು ಕರೆಯುವುದು? ಮಕ್ಕಳಿಗೆ ಹೇಳುವುದೋ ಅಥವಾ ಹಿರಿಯರಿಗೆ ಹೇಳುವುದೋ? ಮಕ್ಕಳೂ ಪಿತೃ ಆಗುತ್ತಾರೆ ಹಾಗೆ ತಂದೆಯೂ ಪಿತೃ ಆಗುತ್ತಾರೆ ಅಲ್ಲದೆ ತಾತನೂ ಪಿತೃ ಆಗುತ್ತಾರೆ. ಹಾಗಾದರೆ ಯಾರನ್ನು ಪಿತೃವೆಂದು ಕರೆಯುವುದು?
