Thanangsuttam Mulam

Page 11

ठाणंगसुत्तं (मूलम्) खीणकसायवीयरागसंजमे चेव अचरिमसमयअजोगिके वलिखीणकसायवीयरागसंजमे चेव / 62. दुविहा पुढविकाइया पन्नत्ता, तंजहा-सुहुमा चेव बायरा चेव 1 // एवं जाव दुविहा वणस्सतिकाइया पन्नत्ता, तंजहा-सुहुमा चेव बायरा चेव 5 / दुविहा पुढविकाइया पन्नत्ता, तंजहा-पज्जत्तगा चेव अपज्जत्तगा चेव 6 / एवं जाव वणस्सतिकाइया 10 // दुविहा पुढविकाइया पन्नत्ता, तंजहा-परिणता चेव अपरिणता चेव 11, एवं जाव वणस्सतिकाइया 15 / दुविहा दव्वा पन्नत्ता, तंजहा-परिणता चेव अपरिणता चेव 16 // दुविहा पुढविकाइया पन्नत्ता, तंजहा-गतिसमावन्नगा चेव अगतिसमावन्नगा. चेव 17, एवं जाव वणस्सतिकाइया 21 / दुविहा दव्वा पन्नत्ता, तंजहागतिसमावन्नगा चेव अगतिसमावन्नगा चेव 22 // दुविहा पुढविकाइया पन्नत्ता, तंजहा-अणंतरोगाढगा चेव परंपरोगाढगा चेव 23, जाव दव्वा 28 // 64. दुविधे काले पन्नत्ते, तंजहा-ओसप्पिणीकाले चेव उस्सप्पिणीकाले चेव। दुविधे आगासे पन्नत्ते, तंजहा-लोगागासे चेव अलोगागासे चेव / 65. णेरइयाणं दो सरीरगा पन्नत्ता, तंजहा-अब्भंतरगे चेव बाहिरगे चेव / . अब्भंतरए कम्मए, बाहिरए वेउव्विए / एवं देवाणं भामियव्वं / पुढविकाइयाणं दो सरीरगा पन्नत्ता, तंजहा-अब्भंतरगे चेव बाहिरगे चेव। अब्भंतरगे कम्मए, बाहिरगे ओरालिगे / जाव वणस्सइकाइयाणं / बेइंदियाणं दो सरीरगा पन्नत्ता, तंजहा-अब्भंतरए चेव बाहिरए चेव / अब्भंतरगे कम्मए, अट्ठि-मंससोणितबद्धे बाहिरए ओरालिए। जाव चरिंदियाणं। पंचिंदियतिरिक्खजोणियाणं दो सरीरगा पन्नत्ता, तंजहा-अब्भंतरगे चेव बाहिरगे चेव / अब्भंतरगे कम्मए, अट्ठि-मंस-सोणिय-हारु-छिराबद्धे बाहिरए ओरालिए / मणुस्साण वि एवं चेव / / विग्गहगतिसमावन्नगाणं नेरइयाणं दो सरीरगा पन्नत्ता, तंजहा-तेयते चेव कम्मते चेव / निरंतरं जाव वेमाणियाणं /