Thanangsuttam Mulam

Page 39

ठाणंगसुत्तं (मूलम्) तिविधा जोणी पन्नत्ता, तंजहा-संवुडा वियडा संवुडवियडा / तिविधा जोणी पन्नत्ता, तंजहा-कुम्मुन्नत्ता संखावत्ता वंसीवत्तिया। कुम्मुन्नता णं जोणी उत्तमपुरिसमाऊणं, कुम्मुन्नताते णं जोणीते तिविहा उत्तमपुरिसा गब्भं वक्कमंति, तंजहा-अरहंता, चक्कवट्टी, बलदेव-वासुदेवा / संखावता णं जोणी इत्थीरयणस्स, संखावत्ताते णं जोणीते बहवे जीवा य पोग्गला य वक्कमंति विउक्कमंति चयंति उववजंति, नो चेव णं निप्फजंति / वंसीवत्तिता णं जोणी पिहजणस्स, बंसीवत्तिताते णं जोणीते बहवे पिहजणे गब्भं वक्कमंति / 149. तिविहा तणवणस्सतिकाइया पन्नत्ता, तंजहा-संखेजजीविता असंखेजजीविता अणंतजीविता / 150. जंबुद्दीवे दीवे भारहे वासे तओ तित्था पन्नत्ता, तंजहा-मागहे वरदामे पभासे, एवं एरवए वि / जंबुद्दीवे दीवे महाविदेहे वासे एगभेगे चक्कवट्टिविजये ततो तित्था पन्नत्ता, तंजहा-मागधे वरदामे पभासे 3 / एवं धायइसंडे दीवे पुरत्थिमद्धे वि 3, पच्चत्थिमद्धे वि 3, पुक्खरवरदीवड्डपुरस्थिमद्धे वि 3, पच्चत्थिमद्धे वि 3 / 151. जंबुद्दीवे दीवे भरहेरवतेसु वासेसु तीताते उस्सप्पिणीते सुसमाए समाते तिन्नि सागरोवमकोडाकोडीओ कालो होत्था 1 / एवं ओसप्पिणीते, नवरं पण्णत्ते 2 / आगमेस्साते उस्सप्पिणीते भविस्सति 3 / एवं धायइसंडे पुरत्थिमद्धे पच्चत्थिमद्धे वि 9, एवं पुक्खरवरदीवड पुरथिमद्धे पच्चत्थिमद्धे वि कालो भाणियव्वो 15 / जंबुद्दीवे दीवे भरहेरवतेसु वासेसु तीताते उस्सप्पिणीते सुसमसुसमाते समाए मणुया तिन्नि गाउयाई उटुंउच्चत्तेणं तिन्नि पलिओवमाइं परमाउं पालयित्था, एवं इमीसे ओसप्पिणीते, आगमेस्साते उस्सप्पिमीते / जंबूदीवे दीवे देवकुरुउत्तरकुरासु मणुया तिन्नि गाउयाई उटुंउच्चत्तेणं पन्नत्ता, तिन्नि पलिओवमाई परमाउं पालयंति, एवं जाव पुक्खरवरदीवडपच्चत्थिमद्धे / 152. जंबूद्दीवे दीवे भरहेरवतेसु वासेसु एगमेगाते ओसप्पिणउस्सप्पिणीते तओ वंसा उप्पजिंसु वा उप्पाजंति वा उप्पज्जिस्संति वा, तंजहा-अरहंतवंसे चक्कवट्टिवंसे दसारवंसे, एवं जाव पुक्खरवरदीवड्वपच्चत्थिमद्धे /