________________
૫. ગુરુના સાન્નિધ્યમાં
થોડા વખત પછી ભગવાન નિત્યાનંદે સ્વામીજીને ગણેશપુરી આવીને ત્યાં સ્થાયી થવા માટે સંદેશો મોકલ્યો. પોતાના ગુરુની ઇચ્છાનુસાર સ્વામીજી સને ૧૯૫૬ના અંતમાં કાયમ માટે ગણેશપુરી આવ્યા અને ભગવાન નિત્યાનંદે બંધાવેલા ત્રણ રૂમોમાં રહેવા માંડ્યું.
ભગવાન નિત્યાનંદે સ્વામીજીને ગણેશપુરીમાં કઈ રીતે પ્રસ્થાપિત કર્યા તેની એક રસપૂર્ણ ઘટના છે. સને ૧૯૫૬ દરમિયાન એવી વાત હવામાં ફેલાઈ કે થોડાક સમયમાં ભગવાન નિત્યાનંદ મહાસમાધિ લેનાર છે. કેટલાક ભક્તોએ ભગવાન નિત્યાનંદને આ વાત સાચી છે કે કેમ તે પૂછતાં તેમણે ‘હા‘ કહી. એમના ભક્તો ચિંતાતુર થયા. ભગવાન નિત્યાનંદની સ્મૃતિમાં એક મંદિર બાંધીને તેમાં તેમની મૂર્તિની પ્રતિષ્ઠા કરવાનું તેમણે વિચાર્યું. ભગવાન નિત્યાનંદે તેમાં સંમતિ આપી અને એ ભક્તોને સૂચના આપી કે એ મંદિર સ્વામી મુક્તાનંદ રહે છે તે રૂમોની પાછળ બાંધવું. આ સ્થળ ગાંવદેવીના નામથી ઓળખાતું હતું. ભગવાન નિત્યાનંદના બીજા એક ભક્તસમુદાયે એમની એક સુંદર મૂર્તિ તૈયાર કરાવી. તેઓ ભગવાન નિત્યાનંદ પાસે ગયા ત્યારે એમણે કહ્યું, આ મૂર્તિને મહાસમાધિ આપો.'' ભકતોએ પૂછ્યું, “મૂર્તિને કેવી રીતે મહાસમાધિ આપવી !'' ભગવાને કહ્યું: ‘“એને પાણીમાં ડુબાડી દો.'' એમની સૂચના મુજબ મૂર્તિને વિધિવત્ ત્યાંની નદીમાં જળસમાધિ આપવામાં આવી.
""
૨૬
